Mohau ke mpho ea Molimo
1“Lōna bohle ba nyoriloeng,
tloong le noe metsi,
le lōna ba se nang chelete,
tloong le reke lijo, le je!
Tloong le ithekele veine,
le ithekele le lebese,
le li reke le se na chelete,
le sa lefe letho.
2Le senyetsa'ng chelete
ka tseo e seng bohobe?
Lintho tse sa khotsofatseng,
ke'ng ha le li sebeletsa ka thata?
'Mameleng ka hloko,
le je tse molemo,
meea ea lōna e ithabise
ka tse monate.
3“Ntšekeheleng tsèbè,
'me le tle ho 'na, le 'mamele,
meea ea lōna e tle e phele.
Ke tla etsa selekane
sa kamehla le lōna,
e leng mehauhelo
eo ke neng ke e tšepise Davida.
4Bonang, ke entse Davida
paki ea ka ho lichaba,
ka mo etsa moetapele
le molaoli oa lichaba.
5Ruri le tla bitsa
chaba tseo le sa li tsebeng,
chaba tse sa le tsebeng
li tla mathela ho lōna
ka baka la Morena
Molimo oa lōna,
eena Ea Halalelang oa Iseraele,
hobane o le tlotlisitse.
6“Batlang Morena
ha a sa ntse a ka fumanoa,
ipiletseng ho eena a sa le haufi;
7ea khopo
a furalle litsela tsa hae,
molotsana
a furalle mehopolo ea hae,
a sokolohele ho Morena oa hae,
'me Morena o tla mo hauhela;
a sokolohele ho Molimo oa rōna,
hobane eena o tšoarela haholo.
8Mehopolo ea ka
hase mehopolo ea lōna,
tsela tsa lōna
hase tsela tsa ka,”
ho rialo Morena.
9“Joalokaha leholimo
le phahametse lefatše,
tsela tsa ka le tsona
li phahametse tsa lōna,
le mehopolo ea ka
e phahametse ea lōna.
10“Joalokaha pula le lehloa
li e-tsoa leholimong,
'me li sa khutlele teng
li sa kolobisa lefatše,
hore le melise limela li tle li atlehe,
li hlahisetse mojali peō,
batho ba fumane lijo;
11le lipolelo
tseo ke li buang li joalo,
li ke ke tsa khutlela ho 'na
li sa sebetsa letho,
empa li tla phethahatsa
seo ke se ratang,
li phethe merero
eo ke li rōmetseng ho e phetha.
12Le tla tloha ka thabo,
khotso e le eteletse pele,
lithaba le maralla
li bine le li talimile,
fate tsohle tsa naha
li le opele mahofi.
13Moo ho metseng leōka
ho tla mela molutu,
moo ho metseng hlabahlabane
ebe ho mela mohlakola.
Tsena ke tsona
tse tla tumisa Morena,
e be pontšo ea kamehla eohle,
e ke keng ea felisoa.”
