ESAEA 59

₁Tsoho la Morena

ha le lekhutšoanyane,

hoo a ke keng a pholosa;

tsèbè ea hae ha ea thibana

hoo a ke keng a utloa.

₂Empa makhopo a lōna

a le arohantse le Molimo oa lōna,

libe tsa lōna

li patile fahleho sa hae,

e le hore a se ke a le utloa.

₃Matsoho a lōna

a khanathetse mali,

menoana ea lōna

e silafalitsoe ke bokhopo.

Le buile leshano

ka melomo ea lōna,

maleme a lōna a buile tse khopo.

₄Ha ho le ea mong ea batlang toka,

ha ho le ea mong

ea buang 'nete linyeoeng;

ba tšepa likhang tsa mafeela,

ba bua leshano;

mehopolo ea bona e mebe,

'me e tsoala bokhopo.

₅Ba qhotsisa mahe a marabe,

ba lohe likhoele

tse kang tsa bolepo ba sekho;

ea jang mahe a marabe oa shoa,

ha le leng le pshatloa,

ho tsoa marabe.

₆Bolepo ba bona

bo ke ke ba fetoha liaparo,

ba ke ke ba ikapesa

ka tseo ba li etsang.

Mesebetsi ea bona

ke mesebetsi e khopo,

ka ketso tsa bona

ba tsosa moferefere.

₇Maoto a bona

a ba mathisetsa sebeng,

a bobebe ho tšolla mali

a se nang molato,

menahano ea bona

ke menahano e khopo,

mehlaleng ea bona

ke mophula oa tšenyo,

le oa timetso.

₈Tsela e isang khotsong

ha ba e tsebe,

mehlaleng ea bona

toka ha e fumanoe.

Tsela tsa bona

ke tse matsoelintsoeke,

ea tsamaeang ho tsona

a ke ke a fumana khotso.

₉Ka baka leo, toka e hōle le rōna,

le ho loka ha ho fihle ho rōna.

Re batla leseli,

empa re bona lefifi,

re batla khanya,

empa re tsamaea lefifing.

₁₀Re phōphōletsa mabota

joaloka batho ba lifofu,

re phōphōletsa tsela

joalokaha eka ha re na mahlo,

re khōthōmetseha

har'a motšeare oa lengeta

joalokaha eka ke ka shoalane;

har'a ba phelang

rōna re joaloka bafu.

₁₁Bohle re puruma joaloka libèrè,

re lla habohlōkō joaloka maeba.

Re batla toka,

empa ha re e fumane,

re batla topollo,

empa e hōle-hōle le rōna.

₁₂Re litšito li ngata mahlong a hao,

re ahlōloa ke bopaki

ba libe tsa rōna.

Litšito tsa rōna

li re maname kamehla,

bokhopo ba rōna

re bo tseba hantle:

₁₃Ke ho siteloa Morena

le ho bua leshano,

ke ho furalla Molimo oa rōna,

ho khothaletsa bohatelli

le bofetoheli,

ho nahana leshano

le ho le bua ka pelong tsa rōna.

₁₄Kahoo toka e chechisoa kasanthao,

ho loka ho emeletse hōle le rōna;

literateng 'nete ha e sa le eo,

botšepehi le bona

ha bo sa fumanoa.

₁₅E, 'nete e fela e lahlehile,

ea furallang bokhopo

o etsoa hampe.

Tsena tsohle Morena a li bona,

a se ke a thabisoa ke bosieo ba toka.

₁₆Morena a bona hore ha ho na motho,

a makala ha a bona

ho se ea kenang lipakeng;

ka matla a hae a hlōla lira tsa hae,

ho loka ha hae ha mo tšehetsa.

₁₇Ho loka ha sireletsa sefuba sa hae,

hloohong a roala

katiba ea tšepe ea pholoho;

a apara liaparo tsa boiphetetso,

cheseho ea e-ba eona kobo ea hae.

₁₈O tla ba putsa

ho ea ka liketso tsa bona,

a halefele lira tsa hae

a be a li otle,

ba lihlekehlekeng

a ba nee moputso oa bona.

₁₉Bitso la Morena le tla tšajoa,

le tšajoe ho tloha bophirimela,

tlōtla ea hae e tšajoe,

e tšajoe ho tloha bochabela.

Ha sera se futuha joaloka sekhōhōla,

Moea oa Morena

o tla se lelekela hōle.

₂₀“Mopholosi o tla tla Sione,

a tle ho ba Jakobo

ba bakelang libe tsa bona,”