ESAEA 60

₁“Tsoha, phatsima,

hobane seli la hao le tlile,

tlōtla ea Morena

e phatsima holim'a hao.

₂Lefifi le tla aparela lefatše,

chaba li be fifing la bo-nka-ntjana;

empa Morena o tla phatsima,

a phatsime holim'a hao,

tlōtla ea hae e bonahale ho uena.

₃Balichaba ba tla hoheloa

ke seli la hao,

khosi li hoheloe

ke reli le phatsimang la hao

₄“Phahamisa mahlo

u qamake kahohle:

Bohle baa phutheha,

ba itlisa ho uena;

bara ba hao ba tla tsoa hōle-hōle,

barali ba hao ba tle

ba sikiloe ka matsoho.

₅Tsena u tla li bona,

thabo ea hao e khaphatsehe,

pelo ea hao e kōkōmōhe

ke ho nyakalla haholo.

Matlotlo a leoatle e tla ba a hao,

maruo a balichaba

a tla tlisoa ho uena.

₆“Boieane ba likamele

bo tla putukana ho uena,

mekoloko ea likamele

e tsoang Midiane le Efa;

Basheba bohle

ba tla tlisa khauta le mokubetso,

ba bine thoko tsa Morena,

ba mo tumise.

₇Mehlape eohle ea Kedare

e tla phuthoa, e tlisoe ho uena,

lipheleu tsa Nabajota

li tla u sebeletsa, li etsoe nyehelo

e amohelehang aletareng ea ka,

ebe Tempele ea ka

ke e tlotlisa haholo.

₈“Baa ba pakaselang

joaloka leru ke bafe?

Baa ba kang maeba

a fofela lihlaheng tsa 'ona?

₉Ke likepe tse bokanang mabōpong,

mabopong a lihlekehleke,

likepe tseo batsamaisi ba tsona

ba ntebeletseng,

likepe tsa Tarashishe

li li eteletse pele,

li tlisa bara ba hao

ba tsoang hōle-hōle,

ba tlang ba kakatetse

silefera le khauta ea bona,

ho tla tlotlisa Morena,

Molimo oa hao,

e leng Ea Halalelang oa Iseraele,

hoba ke eena ea u tlotlisitseng.

₁₀“Balichaba

ba tla tsosa marako a hao,

likhosi tsa bona li u sebeletse;

le hoja ha ke halefile

ke ile ka u otla,

empa ka baka la lereko la ka

ke u hauhetse.

₁₁Khoro tsa hao

li tla lula li ntse li butsoe,

ha li ka ke tsa koaloa

motšeare le bosiu,

batho ba u tlisetse maruo,

maruo a balichaba,

likhosi tsa bona

li tla li entse mokoloko.

₁₂Chaba sa 'muso

o ke keng oa u sebeletsa,

se tla timela,

e, chaba seo

se tla fela se timelle ruri.

₁₃“Tlōtla ea Lebanone

e tla tlisoa ho uena:

Lifate tsa molutu, le tsa phaene,

le tsa kiperese,

tsena li tla tlisoa

ho khabisa sehalalelo sa ka,

'me ke tla tlotlisa Tempele

eo ke ahileng ho eona.

₁₄Bara ba bahatelli ba hao

ba tla u obamela,

bohle ba neng ba u nyelisa

ba koqame maotong a hao,

ebe ba u bitsa Motse oa Morena,

Sione ea Ea Halalelang oa Iseraele.

₁₅“Le hoja u n'u furaletsoe,

u bile u hloiloe,

ho se na motho ea keng a u chakele,

ke tla u etsa ea khabane

kamehla eohle,

ea tla thabisa

e mengata-ngata melōko.

₁₆U tla anya lebese la balichaba,

u anye matsoele

a likhosi tsa bona,

u tsebe hore 'na Morena,

ke Mopholosi oa hao,

Molopolli oa hao,

Ea Matla oa Jakobo.

₁₇Bakeng sa lethose

ke tla u tlisetsa khauta,

bakeng sa tšepe

ke u tlisetse silefera;

bakeng sa lehong

ke tla u tlisetsa lethose,

ke u tlisetse tšepe

bakeng sa majoe a moralla.

Ke tla etsa hore kahohle

khotso e rene,

ho loka e be eena 'musi oa hao.

₁₈Lerata la lintoa

ha le sa tla utloahala,

naheng ea hao,

leha e le tšenyo

le nanaola meeling ea hao;

marako a hao

u tla a rea lebitso la Topollo,

khoro tsa hao

tsona u li ree la Thoriso.

₁₉Letsatsi e ke ke ea hlola

e e-ba leseli la hao motšeare,

le bosiu ngoeli e ke ke ea hlola

e u bonesetsa;

Morena e tla ba leseli la hao,

seli la kamehla eohle,

Molimo oa hao

e be eena tlōtla ea hao.

₂₀Tsatsi la hao ha le ka ke

la hlola le sa likela,

khoeli ea hao ha e ka ke

ea hlola e e-ea fifing;

hoba Morena e tla ba leseli la hao,

seli la kamehla eohle,

tšiu tsa bofifi ba hao

le tsona li fele.

₂₁Chaba sa hao sohle

e tla ba sa ba lokileng,

naha e be lefa la sona

la kamehla eohle,

e be lehlōmela

le hlomiloeng ke 'na,

e be mosebetsi oa matsoho a ka,

oo ke tlotlisoang ka oona.

₂₂Lelapa le lenyenyane

le tla ngatafala e be likete,

sechaba se fokolang

sona se matlafale,

'na Morena, ke tla potlakisa sena

ke se potlakise ka nako ea sona.”