Jafeta le ba morabe oa Efraime
1Banna ba Efraime ba kopana hammoho, ba tšelela Safone, ba re ho Jafeta: “Ke hobane'ng u ileng ua futuhela Baamone, 'me ua se ke ua re mema ho ea le uena? Re tla u cheseletsa ka tlung ea hao.”
2Jafeta a re ho bona: “'Na le sechaba sa ka, re ile ra ba le qabang e kholo le Baamone. Ke ile ka le mema, empa ha lea ka la 'namolela matsohong a bona. 3E ile eare ha ke bona hore ha le mphallele, eaba kea itèla, ke tšelela ho Baamone, 'me Morena a neelana ka bona matsohong a ka. Joale ke hobane'ng ha le mphutuhela kajeno?”
4Jafeta a khōbōkanya banna bohle ba Gileade, a loantša ba morabe oa Efraime. Banna ba Gileade ba hlōla ba morabe oa Efraime, hobane bano ba ne ba re: “Lōna, Bagileade, le babalehi ba tsoang morabeng oa Efraime, le morabeng oa Manase.” 5Bagileade ba hapa maliboho a Jorodane ho thibela ba morabe oa Efraime, 'me e ne e ee ere ha e mong oa ba morabe oa Efraime, ba phonyohileng, a re: “Ntumelleng ke tšele,” ebe banna ba Gileade ba re ho eena: “Na u oa morabe oa Efraime?” Ha a re: “Che,” 6ebe ba re ho eena: “E-re Shibolethe;” ebe o re “Sibolethe,” hobane a ne a sitoa ho le bitsa hantle. Joale ebe baa mo tšoara, 'me ba 'molaele lelibohong la Jorodane. Ka eona nako eo ha bolaoa ba morabe oa Efraime ba likete tse mashome a mane a metso e 'meli.
7Jafeta ea e-ba moahlōli oa Baiseraele ka lilemo tse tšeletseng. Eaba Jafeta oa Mogileade oa shoa, 'me a epeloa ho o mong oa metse ea Gileade.
Ibesane
8Kamora' Jafeta, Ibesane oa Betlelehema ea e-ba moahlōli oa Baiseraele. 9Ibesane o ne a e-na le bara ba mashome a mararo le barali ba mashome a mararo. Barali ba hae ba mashome a mararo ba nyaloa ke ba morabe osele, le eena a nyalisa bara ba hae baroetsana ba mashome a mararo ba morabe osele. Ea e-ba moahlōli oa Baiseraele ka lilemo tse supileng. 10Ibesane a shoa, 'me a epeloa Betlelehema.
Elone
11Kamora' Ibesane moahlōli ea e-ba Elone, oa morabe oa Sebulone; a ahlōlela Baiseraele ka lilemo tse leshome. 12Eaba Elone oa morabe oa Sebulone oa shoa, 'me a epeloa Aiealone e naheng ea Sebulone.
Abadone
13Kamora' Elone, Abadone, mora oa Hilele, oa Mopiratone, ea e-ba eena moahlōli oa Baiseraele. 14O ne a e-na le bara ba mashome a mane, le litlōhōlō tse mashome a mararo, 'me ba ne ba palama lipetsana tsa litonki tse mashome a supileng. Abadone ea e-ba moahlōli oa Baiseraele ka lilemo tse robeli. 15Eaba Abadone, mora oa Hilele oa Mopiratone, oa shoa. A epeloa Piratone e naheng e maralla ea Efraime, naheng ea Baamaleke.
