Ntoa pakeng tsa Nebukadenesare le Arefakesade
1E ne e le selemo sa leshome le metso e 'meli Nebukadenesare a busa Baasiria motse-moholo, Ninife, nakong eo Arefakesade eena a neng a busa Bamede, Ekebatana. 2Ho pota-pota motse oa Ekebatana, Arefakesade o ne a hahile lerako la majoe a betliloeng, a bophara ba lisentimethara tse lekholo le mashome a mararo, bolelele ba 'ona e le lisentimethara tse makholo a mabeli le mashome a tšeletseng. Bophahamo ba lerako e ne e le limethara tse mashome a mararo, 'me morumo oa lona e le limethara tse mashome a mabeli a metso e meli. 3Likhorong o ne a emisitse litora tsa bophahamo ba limethara tse mashome a mane a metso e mene, metheong e le limethara tse mashome a mabeli a metso e tšeletseng ka bophara; 4liheke tsona li le bophahamo ba limethara tse mashome a mararo, le bophara ba limethara tse leshome le metso e robeli, ho lumella mabotho a hae ho feta habonolo kaofela ha 'ona, le bahlabani ba litaaso ho hlakisa.
5Joale ka nako eo, khosi Nebukadenesare a hlasela khosi Arefakesade thoteng e kholo e naheng ea Ragese. 6Ba neng ba mo tlatsitse e ne e le batho ba tsoang lihlabeng, le ba tsoang mabopong a Euferatese le Tigerese le Hidasepese, le ba tsoang liphuleng tse neng li le tlas'a puso ea Arioke, khosi ea Baelame. Ka hona, lichaba tse ngata li ne li ikopantse ho thusana le bara ba Keleode.
7Nebukadenesare, khosi ea Baasiria, a romela molaetsa ho baahi bohle ba Peresiea, le ho baahi bohle ba linaha tse ka bophirimela, ho bohle ba Silesia le Damaseka, le ba Lebanone le Antilebanone, le ho bohle ba ahileng lebopong la leoatle, 8le ho machaba 'ohle a Karmele, Gileade, Galelea e Kaholimo le phula e kholo ea Jesereele, 9ho batho bohle ba Samaria le metse ea eona, le ho ba ka mose ho Jordane, ho ea fihla Jerusalema, Batania, Kelose, Kadeshe, nokeng ea Egepeta, Tafenese, Ramesese le naha eohle ea Goshene, 10le ho feta Tanise le Memfise, le ho baahi bohle ba Egepeta, ho ea fihla meeling ea Ethiopia. 11Feela baahi ba mafatše ao ba nyelisa taelo ea Nebukadenesare, khosi ea Baasiria, 'me ba se ke ba ikopanya le eena ho loana. Ba ne ba sa mo tšabe, hobane chebong ea bona o ne a eme a le mong. Ka hona, ba khutlisa maqosa a hae ho se letho leo a le fihletseng 'me a soabile.
12Nebukadenesare a halefela linaha tseo tsohle hampe. A hlapanya ka terone ea hae le ka 'muso oa hae ho iphetetsa holim'a linaha tsohle tsa Silesia, Damaseka le Siria, le ho ripitla ka sabole baahi bohle ba Moabe, le bana ba Amone, le baahi bohle ba Judea, le ba Egepeta ho ea fihla lipheletsong tsa maoatle a mabeli.
13Ka selemo sa leshome le metso e supileng sa puso ea hae, Nebukadenesare le mabotho a hae a futuhela khosi Arefakesade, 'me a mo hlola ntoeng eo. A qhalanya lebotho lohle la Arefakesade, 'moho le bapalami le ba likariki tsa lona. 14A hapa metse ea hae, a ba a futuhela Ekebatana; a hapa litora tsa motse oo, a inkela thepa ea mapatlelo a thekiso ea oona, 'me bokhabane ba oona ba pele ba fetoha sekhobo. 15Eaba o tšoara Arefakesade lithabeng tsa Ragese, a mo hlaba ka marumo, a mo timetsa tu! 16Joale a khutlela Ninife le mabotho a hae le a bathusani le eena, e le letšoelehali la bahlabani. Ke moo eena le mabotho a hae a ileng a itahlela moketeng oa lijo ka matsatsi a lekholo le mashome a mabeli, a sa tšoenngoe ke letho.
