Morero oa Juditha
1Juditha a re ho bona: “Mamelang, bana beso. Nkang hlooho ena, le e fanyehe lerakong la motse. 2Ha bosiu bo e-sa, 'me letsatsi le chabile, monna ka mong a ke a hlomele, 'me banna bohle ba shahlileng ba tsoe motseng. Le khethe molaoli, 'me le etse sa mokana eka le tla theohela phuleng, ka nqa ea lebotho la lihloela tsa Baasiria; empa le se ke la theoha. 3Lebotho leo le tla nka libetsa tsa lona, le lebe liahelong ho tsosa balaoli ba lebotho lohle la Baasiria. Bao ba tla mathela tenteng ea Holofernese, 'me ha ba ka ke ba mo fumana. Joale ba tla tšoaroa ke tšabo, 'me ba tla le baleha. 4Ba lelekiseng, lona le bohle ba ahileng naheng ea Iseraele, le ba khabele ka lisabole ha ba ntse ba baleha. 5Empa pele le etsa joalo, mpitsetseng Akiore oa Moamone, hore a tl'o bona le ho tseba monna eane ea neng a nyelisa ntlo ea Iseraele, 'me ea ileng a mo romela ho rona joaloka ea seng a laoletsoe ho shoa.”
Akiore oa sokoloha
6Joale ba lata Akiore ka tlung ea Usiea. Ha ba fihla le eena, a bona hlooho ea Holofernese letsohong la monna e mong oa phutheho eo, 'me a otlana fatše, a ilibana. 7Ba mo emisa, eaba o itihela maotong a Juditha, a isa hlompho ho eena, a re: “A ho bokoe uena, litenteng tsohle tsa Judea le lichabeng tsohle tse tla tšoha ha li utloa lebitso la hao! 8Joale ak'u mpolelle tsohle tseo u li entseng matsatsing ana.”
Juditha, a pota-potiloe ke sechaba sohle, a 'molella tsohle tseo a li entseng, ho tloha letsatsing leo a tsoileng Bethulia ka lona, ho fihlela motsotsong oo a ntseng a bua ka oona. 9Ha a qeta ho bua, sechaba sa hlaba litlatse, 'me motse kaofela oa luma ke mehoo ea thabo. 10Ha Akiore a bona tsohle tseo Molimo oa Iseraele a li entseng, a lumela ho Molimo ka 'nete, a bolotsoa, 'me a amoheloa tlung ea Iseraele; 'me litloholo tsa hae li ntse li le joalo le kajeno.
Pherekano liahelong tsa Holofernese
11Ha bosiu bo e-sa, ba fanyeha hlooho ea Holofernese lerakong la motse. Monna ka mong a hlomela, 'me bohle ba tsoa ka lihlopha ho leba letsoapong la thaba. 12Baasiria, ha ba ba bona, ba tsebisa baetapele ba bona, bao le bona ba ileng ba tlalehela balaoli ba bona, le batsamaisi ba likete le batsamaisi bohle ba bang. 13Eaba ba ea tenteng ea Holofernese, ba re ho ea ikarabellang litabeng tsa hae: “Tsosa morena oa rona, hobane makhoba ana a bile sebete ho theohela ho rona ho re futuhela, e le hore a tle a felisoe kaofela ha 'ona.”
14Bagoase a kena, 'me a kokota lesireng le neng le le ka hare ho tente, hobane o ne a nahana hore Holofernese o robetse le Juditha. 15Empa erekaha ho ne ho bonahala ho se ea utloang, a qhela lesira, 'me a kena ka phaposing ea boroko, a fumana Holofernese a lahletsoe sehateloaneng a shoele, hlooho e le sieo setopong sa hae. 16Bagoase a hooa ka lentsoe le phefa, a bokolla, a lla, a hikitsa, 'me a hahola liaparo tsa hae. 17Eaba o ea ka tenteng eo Juditha a neng a suthetsoe ka ho eona, empa le eena a se ke a mo fumana. A tsoa ka lehlapha-hlapha, ho ea ho mabotho, a hooa, a re: 18“Makhoba ano a re qhekeletse. Mosali a le mong oa Moheberu o tlontlolotse ntlo ea Nebukadenesare. Holofernese o tjapaletse fatše, 'me o khaotsoe hlooho.” 19Baetapele ba lebotho la Baasiria, ha ba utloa tsena, ba hahola liaparo tsa bona, ba tšohile haholo, 'me liahelo tsa luma ke liboko le mekhosi ea bona.
