JUDITHA 5

₁Holofernese, molaoli e moholo oa lebotho la Baasiria, o ile a tlaleheloa hore bana ba Iseraele ba ntse ba itlhophela ntoa, ba thibile likhoro tsa maloti, ba hahile liqhobosheane litlhorong tsa lithaba tse telele, ba chehile maraba liphuleng. ₂Holofernese a tuka ke khalefo, 'me a bitsa mahosana 'ohle a Moabe, balaoli bohle ba Amone, le babusi bohle ba linaha tse sikileng leoatle. ₃A botsa, a re: “Banna ba Kanana, mpolelleng: Sechaba sena ke sefe se phelang lithabeng? Se phela metseng efe? Lebotho la sona le boholo bo bokae? Matla le bonatla ba lona li tsoa kae? Khosi e se busang, ebile e laola lebotho la sona, ke efe? ₄Ke hobane'ng ba ne ba hanne ho nkhahlametsa, joalokaha lichaba tsohle tsa bophirimela li entse?”

₅Akiore, moetapele oa Baamone bohle, a araba, a re: “Morena oa ka a ke a mamele seo mohlanka oa hae a tla se bolela. Ke tla u bolella 'nete ka sechaba sena se phelang lithabeng haufi le mona; 'me ha u ka ke ua utloa leshano molomong oa mohlanka oa hao. ₆Sechaba sena ke litloholo tsa Bakaldea. ₇Ba kile ba jaka Mesopotamia pele, hobane ba ne ba sa batle ho khumamela melimo ea baholo-holo ba bona, ba neng ba phela Kaldea. ₈Ba ne ba furalle mokhoa oa baholo-holo ba bona, ka ho khumamela Molimo oa leholimo, Molimo eo ba ileng ba mo tseba; 'me eitse hoba ba lelekoe pel'a melimo ea habo bona, ba tšabela Mesopotamia 'me ba lula teng nako e telele.

₉“Ha Molimo a se a ba laetse ho tloha moo ba neng ba jakile teng, le ho leba Kanana, ba aha moo, 'me ba ipokellela khauta le silefera, ba rua mehlapehali ea makhomo. ₁₀Eare ha tlala ea sekoboto e aparela Kanana, ba theohela Egepeta, ba jaka moo, 'me ba phelisoa teng. Moo ba ata haholo, ea e-ba moloko o ke keng oa baloa. ₁₁Empa khosi ea Egepeta ea ba fetohela, 'me ea ba etsetsa bomene-mene ka ho ba sebelisa ho etsa litene, ea ba kokobetsa le ho ba etsa makhoba. ₁₂Ba hooa ho Molimo oa bona, ea neng a otle naha eohle ea Egepeta ka mefuta-futa ea seoa e ke keng ea thibeloa. Ke ha Baegepeta ba ba leleka. ₁₃Molimo a pshesa metsi a Leoatle le Lefubelu ka pele ho bona, ₁₄'me a ba tsamaisa ka tsela ea Sinai le ea Kadeshe-Barnea.

“Eitse hoba ba leleke baahi bohle ba lehoatata, ₁₅ba lula naheng ea Baamore, 'me ka matla a bona ba ripitla Baheshebone. Joale, ha ba se ba tšetse Jorodane, ba hapa naha eohle ea lithaba. ₁₆Hoba ba phahle Bakanana, le Baperise, le Bajebuse, le Bashekeme le Bagirgashe bohle, ba aha moo lilemo tse ngata.

₁₇“Ha feela ba ne ba sa siteloe Molimo oa bona, ba ne ba phela naleng; hobane ba na le Molimo ea hloileng bokhopo. ₁₈Empa ha ba ne ba kheloha tseleng eo a ba laetseng eona, ba bang ba bona ba ne ba timetsoa lintoeng tse ngata-ngata, athe ba bang ba isoa kholehong naheng ea balichaba; Tempele ea Molimo oa bona ea fetoha lesupi, 'me metse ea bona ea haptja ke lira tsa bona. ₁₉Ere hoba ba retelehele hape ho Molimo oa bona, ba khutle libakeng tseo ba neng ba qhalantsoe ho tsona, 'me ba boele ba ahe Jerusalema moo ba nang le Tempele ea bona teng, 'me ba boele ba phele naheng ea lithaba, e neng e setse e se na batho.

₂₀“Joale he, monghali le moren'a ka, haeba sechaba sena se entse phoso efe kapa efe, haeba se sitetsoe Molimo oa sona, 'me haeba re kholisehile hore ba fela ba oetse sebeng, a re nyoloheng, re ba hlasele. ₂₁Empa haeba sechaba sa habo bona se se molato, morena oa ka a ka etsa hantle ho ba lesa, esere Morena le Molimo oa bona a ba haeletsa, 'me lefatše lohle la re tlepa litšeho.”

₂₂Eitse hoba Akiore a qete ho bua, batho bohle ba neng ba pota-potile tente ba qala ho korotla. Balaoli ba Holofernese, le baahi bohle ba lebopong la leoatle le baahi ba Moabe, ba batla hore a khabeloe. ₂₃Ba re: “Ha re na ho tšaba Baiseraele, hobane ke sechaba se fokolang, se se nang matla, se sitoang ho mamella ntoa e boima. ₂₄A re nyoloheng! Lebotho la hao le tla ba metsa ka mothamo o le mong, oho Holofernese, morena oa rona.”