JEREMIA 16

₁Lentsoe la Morena la boela la fihla ho 'na, la re: ₂“U se ke ua nyala mosali kapa ua ba le bara le barali sebakeng sena. ₃Morena o bua tjena, ka bara le barali ba tsoaletsoeng naheng ena, le ka basali bao e leng bo-'m'a bona, le ka banna bao e leng bo-ntat'a bona: ₄‘Ba tla bolaoa ke lefu le tšabehang. Ba ke ke ba lleloa kapa ba epeloa ke motho, empa ba tla tšoana le khapane har'a naha. Ba tla bolaoa ka sabole, ba bolaoe ke sekoboto, 'me litōpō tsa bona e be lijo tsa matlaka, le lijo tsa libatana tsa naha.’ ”

₅Morena o bua tjena: “U se ke ua kena ka tlung e nang le bofifi, u se ke ua lla le ba ka ho eona kapa ua ba tšelisa, hobane ke amohile sechaba sena khotso ea ka le lerato la ka le kutloelo-bohlōkō ea ka,” ho rialo Morena. ₆“Ba hlomphehang le ba eisehang ba tla shoela naheng ena. Ha ba na ho epeloa leha e le ho lleloa; ha ho ea tla iphatsa kapa a kute moriri oa hae ho bontša masoabi a hae. ₇Ha ho ea tla fepa le ho tšelisa ea llelang bafu, leha e le ea llelang ntat'ae kapa 'm'ae. Ha ho ea tla ba nea ho nooang ho ba tšelisa.

₈“U se ke ua kena ka tlung e nang le mokete, ua lula ka ho eona, eaba ua ja, ua noa. ₉Morena oa mabōtho, Molimo oa Iseraele, o bua tjena: ‘Mehleng ena ea lōna, moo le ntseng le bona, hona sebakeng sena, ke tla felisa mehoo ea thabo le ea nyakallo; ke felise lentsoe la monyali le lentsoe la monyaluoa.’

₁₀“Etlare ha u bolella sechaba sena lintho tsena tsohle, se u botse, se re: ‘Ke hobane'ng ha Morena a re reretse koluoa e kholo hakaale? Re entse bokhopo bofe? Sebe seo re sitetsoeng Morena Molimo oa rōna ka sona, ke sefe?’ ₁₁Joale uena u tle u re ho sona: ‘Ke hobane bo-ntat'a a lōna ba ile ba mphuralla,’ ho rialo Morena, ‘ba latela melimo esele, ba e sebeletsa, ba e khumamela. 'Na ba ile ba mphuralla, ba se ke ba boloka melao ea ka. ₁₂Joale le lōna le entse bokhopo bo fetang ba bo-ntat'a lōna. E mong le e mong oa lōna o latela litakatso tsa pelo ea hae e khopo, e manganga, ha a 'mamele. ₁₃Ka baka leo, ke tla le phahla naheng ena, ke le ise naheng eo lōna le bo-ntat'a lōna le sa kang la e tseba. Naheng eo, bosiu le motšeare, le tla sebeletsa melimo esele, hobane nke ke ka le hauhela.’ ”

₁₄“Ka baka leo, bonang, matsatsi aa tla,” ho rialo Morena, “matsatsi ao ka 'ona ho ke keng ha hlola ho thoe: ‘Re hlapanya ka Morena ea phelang, ea ileng a nyolla bana ba Iseraele naheng ea Egepeta.’ ₁₅Empa ho tla thoe: ‘Re hlapanya ka Morena ea phelang, ea ileng a nyolla bana ba Iseraele naheng e ka lebōea, le linaheng tsohle tseo a neng a ba leleketse ho tsona,’ hobane ke tla ba khutlisetsa naheng eo ke ileng ka e nea bo-ntat'a bona moholo.”

₁₆“Ke tla rōmela batšoasi ba litlhapi ba bangata,” ho rialo Morena, “'me ba tla ba tšoasa. Hamorao ke tla rōmela litsomi tse ngata, 'me li tla ba tsoma lithabeng tsohle, le maralleng 'ohle, le mafarung a mafika. ₁₇Mahlo a ka a talimile metsamao eohle ea bona; ha ea pateha ho 'na, esita le libe tsa bona ha lia pateha mahlong a ka. ₁₈Ke tla ba otlela bokhopo ba bona le libe tsa bona habeli, hobane ba silafalitse naha ena ea ka, ba e tlatsa likoqo tse omeletseng tsa melimo ea bona ea bohata, e nyonyehang.”