Jeremia o akheloa ka mokoting o se nang metsi
1Bo-Shefatiea, mora oa Matane, le Gedaleea, mora oa Pashahure, le Jukale, mora oa Shelemiea, le Pashahure, mora oa Malakiea, ba utloa mantsoe ao Jeremia a ileng a a bua ho sechaba sohle, a re: 2“Morena o bua tjena: ‘Ea tla sala motseng ona o tla bolaoa ka sabole, a bolaoe ke sekoboto le ke lefu la seoa. Empa ea tla ineela ho Bakalatiea eena o tla phela; bophelo ba hae e tla ba oona moputso oa hae, 'me o tla phela.’ 3Morena o bua tjena: ‘Ruri motse ona ho tla neelanoa ka oona matsohong a mabōtho a khosi ea Babilona, 'me a tla o hapa.’ ”
4Ka baka leo, mahosana a re ho khosi: “Re kōpa hore monna enoa a bolaoe, hobane o nyahamisa lipelo tsa bahlabani ba setseng motseng ona, le lipelo tsa sechaba ka ho bua lipuo tse kang tsena. Monna enoa ha a lakaletse sechaba sena boiketlo, o se lakaletsa bobe.”
5Khosi Sedekiea a re: “Ke eo, o matsohong a lōna. Ha ho letho leo 'na nka le etsang haeba lōna le sa rate.”
6Eaba ba nka Jeremia, ba mo akhela ka mokoting o chekiloeng ke Malakiea, mora oa khosi, o neng o le lebaleng la chankana, ba mo theolela ka mokoting ka mehala. Ho ne ho se metsi ka mokoting, haese seretse feela. Eaba Jeremia o tetebela seretseng.
7Ha Ebede-Meleke oa Mokushe, eo e neng e le mohlanka ea sebetsang ka tlung ea khosi, a utloa hore ba lihetse Jeremia ka mokoting, ka nako eo khosi e ne e lutse Monyako oa Benjamine, 8Ebede-Meleke a tsoa ka tlung ea khosi, a buisana le khosi, a re: 9“Mong'a ka, khosi ea ka, banna bana ba etselitse moporofeta Jeremia bokhopo ka ho mo lahlela ka mokoting; a ka 'na a shoela kamoo ka mokoting ke tlala, hobane ha ho sa na lijo motseng mona.”
10Eaba khosi e laela Ebede-Meleke oa Mokushe, e re: “Nka banna ba mashome a mararo le e'o ntša moporofeta Jeremia ka mokoting a e-s'o ka a e-shoa.”
11Ebede-Meleke a nka banna bao, a ea le bona ka kamoreng eo ho bolokoang liphahlo tsa khosi ka ho eona. A fihla a ntša liaparo tsa khale tse seng li tabohile, a li theolela ka mehala ho Jeremia, ka mokoting. 12Ebede-Meleke oa Mokushe a re ho Jeremia: “Nka liaparo tsena, u li kenye ka mahafing, u tl'u se k'a sehloa ke mehala.” Jeremia a etsa joalo. 13Eaba ba hula Jeremia ka mehala, ba mo nyolla ka mokoting. Jeremia a boela a lula lebaleng la chankana hape.
Sedekiea o batla keletso ho Jeremia
14Khosi Sedekiea, a eme monyakong oa boraro oa ntlo ea khosi, a laela hore a bitsetsoe Jeremia. Khosi ea re ho Jeremia: “Ho na le seo ke ratang ho u botsa sona; u mpolelle tsohle, u sa mpatele letho.”
15Eaba Jeremia o re ho Sedekiea: “Na ha ke u bolella tsohle, ha u na ho mpolaea? Na ha ke u eletsa u tla 'mamela?”
16Khosi Sedekiea a hlapanyetsa Jeremia ka lekunutu, a re: “Ka Morena ea phelang, ea re neileng bophelo, nke ke ka u bolaea kapa ka neelana ka uena matsohong a banna bana ba batlang ho u bolaea.”
17Eaba Jeremia o re ho Sedekiea: “Morena Molimo oa mabōtho, Molimo oa Iseraele, o bua tjena: ‘Ha u ka fela ua ea ineela ho mahosana a khosi ea Babilona, u tla phela, le motse ona ha o na ho chesoa ka mollo. Uena le ba ntlo ea hao le tla phela. 18Empa haeba u sa ineele ho mahosana a khosi ea Babilona, ho tla neelanoa ka motse ona matsohong a Bakalatiea, 'me ba tla o chesa ka mollo. Uena u ke ke ua phonyoha matsohong a bona.’ ”
19Khosi Sedekiea a re ho Jeremia: “Ke tšaba Bajuda ba neng ba ineele ho Bakalatiea, esere mohlomong Bakalatiea ba neelana ka 'na matsohong a Bajuda bao hore ba ntlhōkōfatse.”
20Jeremia a re ho khosi: “Ba ke ke ba neelana ka uena. Kea u kōpa hle: Hlompha lentsoe la Morena, leo ke u bolellang lona, e le hore u tle u atlehe, 'me u phele. 21Empa haeba u hana ho ineela ho khosi ea Babilona, Morena o ntšenoletse tsena: 22Basali bohle ba setseng ka tlung ea khosi ea Juda ba tla tlisoa ho mahosana a khosi ea Babilona; basali bao ba tla re ho uena:
“ ‘Metsoalle ea hao
e u khelositse ea ba ea u hlōla,
metsoalle ea hao
eo e n'e le letšepa la hao;
maoto a hao a qahiloe tebetebeng,
metsoalle ea hao e u lahlile.’
23“Basali ba hao bohle le bana ba hao, ba tla neoa Bakalatiea. Uena ha u ka ke ua phonyoha matsohong a bona, u tla thōpuoa ke khosi ea Babilona. Ka baka la hao motse ona o tla chesoa ka mollo.”
24Eaba Sedekiea o re ho Jeremia: “U se ke ua tsebisa motho le ea mong mantsoe ana, e le hore u tle u se ke ua bolaoa. 25Empa haeba mahosana a ka utloela hore re ile ra buisana le uena, 'me a re ho uena: ‘Re bolelle seo u neng u se bua le khosi, u sa pate letho, re tle re se ke ra u bolaea; u re bolelle le seo khosi e se buileng ho uena,’ 26uena u tle u re ho 'ona: ‘Ke ile ka bea thapeli ea ka kapele ho khosi, hore e se ke ea mpusetsa tlung ea Jonathane ho ea shoela teng.’ ”
27Eaba mahosana 'ohle a fihla ho Jeremia, aa 'motsa, 'me Jeremia a a araba ho ea kamoo khosi e 'moleletseng kateng. Mahosana a khutsa, kahobane ho ne ho se ea ileng a utloa se Jeremia a se buileng le khosi.
28Jeremia a lula ka lebaleng la chankana ho fihlela ka letsatsi leo Jerusalema e ileng ea hapuoa ka lona. Le eena Jeremia o ne a le teng ha Jerusalema e hapuoa.
