Eka khona batho ba bake
1Morena o re:
“Ha u rata ho khutla,
uena Iseraele,
khutlela ho 'na.
Ha u ka tlosa manyala a hao
mahlong a ka,
ua se ke ua hlola u kheloha hape;
2ha u ka hlapanya
ka 'na Morena ea phelang,
ua hlapanya ka 'nete
le ka botšepehi, le ka ho loka,
lichaba tsohle
ke tla li hlohonolofatsa,
lichaba tsohle li tla ntlotlisa.”
3Ho banna ba Juda le ba Jerusalema, Morena o re:
“Ikhatheleng lithite tsa lōna,
le se ke la jala har'a meutloa;
4bolokang selekane sa lōna le 'na,
le ineele 'na ka pelo tsa lōna tsohle,
lōna banna ba Juda
le baahi ba Jerusalema;
esere khalefo ea ka
ea laima sa malakabe,
ea chesa ho se ea ka e timang,
ka baka la bokhopo ba ketso tsa lōna.”
Koluoa e tla hlaba lebōea
5“Bolelang
kahar'a naha eohle ea Juda,
le phatlalletse le Jerusalema,
le re: ‘Letsang lenaka
kahar'a naha eohle!’
Hlabang mokhosi,
le phuthehe, le re:
‘Khōbōkanang, le thèè thekō!
Tšabelang metseng,
metseng e sirelelitsoeng!’
6Phahamisang mokhèlè,
le lebe Sione!
Potlakelang teng, le se ke la lieha!
Ke tlisa koluoa e hlaha lebōea,
koluoa eo e tla ba nanaola.”
7Tau e tsoile selaong sa eona,
motimetsi oa lichaba o futuhile;
o tsoile hae ho senya naha ea hao,
metse e be masupi, e hloke baahi.
8Apara tse mahoashe,
u lle sa 'mokotsane,
khalefo e tlōkōmang ea Morena
ha ea re tlohela.
9“Mohl'a tsatsi leo,”
ho rialo Morena,
“pelo ea khosi le tsa mahosana
li tla nyahama,
baprista ba tla tšoha,
baporofeta ba tsielehe.”
10Eaba ke re: “Oho, Morena Molimo, ruri u thetsitse sechaba sena, le eona Jerusalema, ka ho re: ‘Le tla ba le khotso,’ athe re se le lekhatheng la ho bolaoa ka sabole.”
11Ka nako eo ho tla bolelloa batho bana, le Jerusalema, ho thoe:
“Moea o omeletseng o tla hlaha,
o hlahe tutulung tsa lehlabathe,
o fokele chabeng sa ka,
o e-tsoa lehoatateng;
ha e e'o ba oa ho olosa,
ha e e'o ba oa ho fèfèra,
12e tla ba leholiotsoana,
hobane o tsoa ho 'na,
ke tla be ke ba phatlalletse
le likahlōlo tsa bona.”
Juda e teeloa hare ke lira
13Sera se subuhlellana
sa maru a phethesela,
kariki tsa sona tsa ntoa
li tla sa setsokotsane,
belo la pere tsa sona
le feta la ntsu.
A rōna bale! Re timetse ruri!
14Hlatsoa bokhopo pelong ea hao,
o bo hlatsoe, u pholohe Jerusalema;
pelo ea hao e tla koetla mehopolo,
e koetle mehopolo e khopo
ho fihlela neng?
15Mokhosi o utloahala o e-tsoa Dane,
o hlajoa thabeng ea Efraime
ho bolela tlokotsi!
16“Tsena u li tsebise lichaba tsohle,
u phatlalletse le Jerusalema:
‘Mara a thibellang
a tsoa naheng e hōle,
a futuhela metse ea Juda
ka mehoo ea ntoa,
17a e teela hare
sa banna ba lebetse tšimo,
hobane e mphetohetse,’ ”
ho rialo Morena.
18“Boitšoaro ba hao le liketso tsa hao
ke tsona tse tlisitseng tsena,
tsa li tlisa ho uena;
bona ke bona bokhopo ba hao.
Bona kamoo bo babang kateng!
Kamoo bo u kenang pelong kateng!”
Jeremia o soabela chaba sa Morena
19“Ke lōngoa ke mala!
Ke lōngoa ke mala!
Botebo ba pelo ea ka
bo tletse mahlaba!
Pelo ea ka e uba kahare ho 'na;
nke ke ka khutsa,
hobane ke utloile
molumo oa lenaka
le mokhosi oa ntoa.
20Koluoa li fihla ka ho latellana,
hobane fatše lohle le senyehile;
hang-hang tente tsa ka
lia senyeha,
masira a tsona
a tabohe ka ho panya ha ntši.
21Ke tla bona mokhèlè
ho fihlela neng,
ke utloe molumo oa lenaka
ho fihlela neng?
22“Chaba sa ka se thotofetse,
ha se sa ntseba,
ke tseketseke tsa bana,
ha se na kutloisiso;
ho etsa bokhopo se ho hlalefetse,
ho etsa botle hona ha se ho tsebe.”
Jeremia o bona koluoa e tlang
23Ka talima lefatše, 'me ka le bona
le se na sebōpeho, le se na letho;
le maholimo ha ke a talima,
ka fumana le 'ona a se na lereli.
24Ka talima lithaba,
ka bona li thōthōmela,
maralla 'ohle le 'ona a sisinyeha.
25Ka talima hape,
ka bona ho se na motho,
nonyana tsohle tsa leholimo
li balehile.
26Ka boela ka talima,
ka bona masimo e le mehōla,
metse eohle ea moo
e fetohile masupi,
e helelitsoe ke Morena
ka khalefo e tlōkōmang.
27Morena o bua tjena:
“Lefatše lohle le tla senyeha,
empa ha ke na ho le timeletsa ruri.
28Kahoo lefatše le tla ba le bofifi,
maholimo a holimo le 'ona a fifale,
hobane ke boletse, ke se ke rerile,
nke ke ka fetoha kapa ka checha.”
29Ha rata la bapalami
le ba liqha le utloahala,
baahi ba metse eohle ba tla baleha;
ba tla kena merung,
ba hloelle holim'a mafika;
metse eohle e tla furalloa
ke baahi ba eona,
ha ho le ea mong
ea tla phela ho eona.
30U tla etsa'ng ha u s'u falalitsoe?
Leha u ka apara
seaparo se sefubelu,
leha u ka tlatlapela
mekhabiso ea khauta,
fahleho sa hao
ua se tlotsa ka khokhotsi,
ha u ka ke ua hlola u sa rateha,
baratuoa ba hao ba tla u nyelisa,
ba batle ho timetsa bophelo ba hao.
31Ke utloile sello
se kang sa mosali a pepa,
molumaelo o kang oa mosali,
mosali oa letsibolana;
sello sa morali oa Sione
ha a feheloa, ha a itelela,
a phakalatsa matsoho, a re:
“Ka tla ka le bona!
Bophelo ba ka
bo matsohong a babolai!”
