Jerusalema e thibelloa ke lira
1“Bana ba Benjamine, balehang,
le tsoe Jerusalema!
Letsang lenaka
le le motseng oa Tekōoa!
Hlabang mokhosi
ka khanare ea mollo,
le o hlaba holim'a Bete-Kereme!
Koluoa le timelo e kholo
li hlaha lebōea.
2Ke tla timetsa morali oa Sione,
eena e motle,
ea bokotsoang haholo.
3Balisa ba tla mo futuhela
ka mehlape ea bona,
ba hlome tente tsa bona
ho mo pota-pota,
molisa ka mong
a fulise khulong la hae.”
4“Ba tla re:
‘Itokisetseng ho mo futuhela!
Emang, re futuheng
ha tali e anyesa!
Re malimabe hakaakang!
Tsatsi le se le sekame!
Meriti ea mantsiboea
e hlahlamela lithaba!
5Emang ke hona,
re futuheng bosiu,
qhobosheane tsa hae
re li thuakanye!’ ”
6Moren'a mabōtho o bua tjena:
“Remang lifate, le hahe metèro,
le etsetse Jerusalema thibella.
Ona motse o lokeloa ke kotlo,
kahare ho oona ho tletse khatello.
7Joalokaha seliba se kopotsa metsi,
le motse ona
o kopotsa bokhopo ho oona;
mahahapa le timelo
li utloahala har'a oona,
kamehla ke bona bohlōkō ba oona
le maqeba a oona.
8Itlhokomele ke hona,
uena Jerusalema,
esere lerato leo
ke u ratang ka lona la mphella,
ka u fetola nanaola,
naha e hlokang baahi.”
Baiseraele ba bakoenehi
9Moren'a mabōthō o bua tjena:
“Chaba sa Iseraele
se tla felisoa ho hang,
se tšoane le tšimo ea morara
e khoahlapisitsoe.
10“Nka buisana le mang
ka mo eletsa?
Ke mang ea tla ke a 'mamele?
Tsebe tsa bona ke tsa leshoma,
kahoo ha ba ka ke ba utloa.
Ntsoe la Morena baa le nyelisa,
thabo ha ba e fumane ho lona.
11Le 'na ke bipelitsoe
ke khalefo ea Morena,
ke se ke khathetse
ke ho e thibela.
“E hlatsetse holim'a bana,
bana bana ba literateng,
holim'a bahlankana,
bahlankana bana ba khōbōkaneng;
monna le mosali
ba tla thōptjoa bobeli,
ho thōpuoe raputsoe
le ea seng a khokhoba.
12Matlo a bona a tla abeloa basele,
ho ajoe masimo,
le basali ba bona ka ho tšoana,
ha ke otlollela tsoho la ka
ho baahi ba naha ena,”
ho rialo Morena.
13“Ho tloha ho e monyenyane
ho isa ho e moholo,
bohle ba labalabela
ho fumana qhoqha;
baporofeta le baprista
ka ho tšoana,
kaofela ha bona
ba phela ka bolotsana.
14Maqeba a chaba sa ka baa a oka
joalokaha eka ba oka mengoapo.
‘Khotso! Khotso!’ ba rialo ho batho,
le hoja ba tseba
hore khotso eo ha e eo.
15Na ba ke ba be lihlong
ha ba entse manyala?
Le ho ka!
Ho hang ho bona lihlong ha li eo!
Le ho pulufalloa ha ba pulufalloe;
kahoo ba tla oela har'a ba oeleng,
mohla ke ba otlang ba tla timela,”
ho rialo Morena.
Baiseraele ba lahla tsela ea Molimo
16Morena o bua tjena:
“Emang mateanong a litsela
le qamake, le botse:
‘Tsela ea khale, e lokileng, e kae?’
Tsamaeang ka eona,
'me le tla fumana phomolo.
Empa lōna la re:
‘Ha re ka ke ra e tsamaea!’
17Eaba ke le khethela balebeli,
ka re: ‘Mamelang molumo
oa lenaka ha le lla!’
Empa lōna la re:
‘Ha re ka ke ra o mamela!’
18“Ka baka leo,
mamelang lōna lichaba!
Lōna kaofela bonang
se tla hlahela chaba sa ka!
19Uena lefatše mamela!
Chaba sena ke se tlisetsa koluoa,
e leng tholoana ea merero ea sona,
hoba ha sea mamela mantsoe a ka,
le molao oa ka se o lahlile.
20Mokubetso o tsoang Sheba
o ntlisetsa molemo ofe?
Oa ntšoe e tsoang naheng tse hōle
oona ke ofe?
Nyehelo tsa lōna tsa secheso
ha li amohelehe,
le mahlabelo a lōna ha a nthabise.”
21Kahoo Morena o bua tjena:
“Ke tla hloma likhōpi
tseleng ea chaba sena,
li tla khōpa bo-ntata
le bara ka ho tšoana,
metsoalle le ba ahelaneng le eona
ba tla timela.”
Chaba se tsoang lebōea sea futuha
22Joale Morena o bua tjena:
“Bonang! Chaba se tsoang
naheng e ka lebōea sea tla;
chaba se matla
se tsoa pheletsong tsa lefatše.
23Se hlometse ka liqha,
sa hlomela le ka marumo
se sehlōhō, se bile se hloka mohau;
mantsoe a sona
a hoasa sa leoatle le befile;
se palame lipere,
se theile thekō ea ntoa,
se futuhela uena Morali oa Sione.”
24Baahi ba Jerusalema ba re:
“Botumo ba chaba seo
re se re bo utloile,
matsoho a rōna
a lepeletse ke ho fokola;
litlokotsi le tsona li se li re apere,
bohlōkō bo tšoana le ba mosali,
mosali a kena tlung.
25Se tsoeleng kantle
la tsamaea har'a naha,
le litseleng
le se ke la tsamaea teng,
hobane sera
se hlometse ka lisabole,
tšabo le eona e fumanoa kahohle.”
26“Lōna chaba sa ka,
aparang tse mahoashe,
le be le ipitike har'a molora;
le lle se bohlōkō sa 'mokotsane,
le lle joalokaha eka
le llela mora ea mong,
hoba motimetsi o tla futuha,
a futuhe ka ho tsometsa.”
Jeremia, mohlahlobi oa chaba sa Molimo
27“Ke u entse mohlahlobi
oa chaba sena sa ka,
hore u tsebe tsela tsa sona,
u li hlahlobe.
28Ke chaba sa bakoenehi,
chabe se manganga,
se tsamaeang
ka ho hafotsaka bohata;
ke chaba se tšoanang
le lethose le tšepe,
kaofela ha sona
ke chaba sa balotsana.
29Mofutho o futha haholo,
loto e fella har'a mollo;
mohloekisi o sebeletsa lelea:
Ba khopo ha ba ke ba tšèkèha.
30Ba tla bitsoa silefera e lahliloeng,
kahobane Morena o ba lahlile.”
