Jesu le mosali oa Samaria
1Jesu a tseba hore Bafarisi ba utloile hore oa hapa, 'me o kolobetsa barutuoa ba bangata ho feta Johanne. 2Feela leha Jesu ka sebele sa hae o ne a sa kolobetse, empa ho kolobetsa barutuoa ba hae. 3Jesu a tloha Judea, a boela a ea Galelea.
4O ne a tšoanetse ho haola ka la Samaria. 5A fihla motseng oa Samaria o bitsoang Sikare, haufi le tšimo eo Jakobo a neng a e nee mora oa hae Josefa. 6Seliba sa Jakobo se ne se le hona moo. Kaha Jesu a ne a khathetse ke leeto, a lula selibeng; e ne e ka ba har'a mpa ea motšeare.
7Mosali oa Mosamaria a tla ho kha metsi. Jesu a re ho eena: “Ak'u mphe, ke noe.” 8Barutuoa ba hae ba ne ba ile motseng ho reka lijo.
9Mosali oa Mosamaria a re ho eena: “U ka nkōpa ho noa joang u le Mojuda, 'na ke le mosali oa Mosamaria?” Bajuda ha ba na taba le Basamaria.
10Jesu a mo araba, a re: “Hoja u tsebile mpho ea Molimo, le hore na ke mang ea reng ho uena: ‘Ak'u mphe, ke noe,’ uena, u ka be u mo kōpile, 'me a ka be a u file metsi a kollang.”
11Mosali a re ho eena: “Monghali, ha u na sekhello, le seliba se tebile; joale metsi a kollang u a nka kae? 12Na u moholo ho feta ntat'a rōna Jakobo ea re neileng seliba see, le eena a noa ho sona, le bara ba hae, le liphoofolo tsa hae?”
13Jesu a mo araba, a re: “E mong le e mong ea noang metsi ana, o tla nyoroa hape; 14athe mang le mang ea noang metsi ao ke tla mo fa 'ona, a ke ke a hlola a nyoroa le ka mohla, empa metsi ao ke tla mo fa 'ona a tla fetoha ka ho eena seliba sa metsi a kopoletsang bophelong bo sa feleng.”
15Mosali a re ho eena: “Monghali, ak'u mphe metsi ao, hore ke se ke ka hlola ke nyoroa, leha e le ho tla kha mona.”
16Jesu a re ho eena: “E-ea, u bitse monna oa hao, le tle koano.”
17Mosali a mo araba, a re: “Ha ke na monna.”
Jesu a re ho eena: “U nepile ha u re: ‘Ha ke na monna,’ 18hobane u bile le banna ba bahlano, 'me eo u nang le eena hona joale hase monna oa hao; moo u buile 'nete.”
19Mosali a re ho eena: “Monghali, ke lemōha hore u moporofeta. 20Bo-ntat'a rōna ba ile ba khumamela Molimo thabeng ena, empa lōna le re Jerusalema ke sona sebaka seo eka khonang ho khumamelloe ho sona.”
21Jesu a re ho eena: “Mosali, ntumele hore nako ea tla eo ka eona le sa tl'o khumamella Ntate thabeng ena, leha e le Jerusalema. 22Lōna le khumamela seo le sa se tsebeng; rōna re khumamela seo re se tsebang, hobane pholoho e tsoa ho Bajuda. 23Empa nako ea tla, 'me e se e fihlile, eo ka eona bakhumameli ba 'nete ba tla khumamela Ntate ka moea le ka 'nete, hobane Ntate o fela a batla ba joalo ho mo khumamela. 24Molimo ke moea, 'me ba mo khumamelang eka khona ba mo khumamele ka moea le ka 'nete.”
25Mosali a re ho eena: “Kea tseba hore Mesia, ea bitsoang Kreste, oa tla; mohla a tlang, o tla re bolella lintho tsohle.”
26Jesu a re ho eena: “Ke 'na ea buang le uena.”
27Ka nako eo barutuoa ba hae ba fihla, 'me ba makala ha a bua le mosali; leha empa ho ne ho se ea reng: “U batla eng, kapa u buela'ng le eena?”
28Eaba mosali o siea nkho ea hae, o ea motseng, o re ho batho: 29“Tloong, le bone motho ea mpoleletseng tsohle tseo ke li entseng; na ekaba hase eena Kreste?” 30Ba tsoa motseng, ba tla ho eena.
31Barutuoa ba sala ba mo kōpa, ba re: “Rabbi, ak'u je.”
32Empa a re ho bona: “Ke na le sejo seo ke se jang, seo le sa se tsebeng.”
33Barutuoa ba botsana, ba re: “Na ebe e mong o mo tliselitse lijo?”
34Jesu a re ho bona: “Sejo sa ka ke ho etsa thato ea ea nthōmileng, le ho phetha mosebetsi oa hae. 35Ha ke re le ee le re: ‘Khoeli li sa le 'ne, 'me e nt'o ba kotulo?’ Bonang, kea le bolella, phahamisang mahlo, le bone hore masimo a soeufaletse kotulo. 36Mokotuli o se a amohela moputso, 'me lijo o li bōkellela bophelo bo sa feleng, hore mojali a thabe hammoho le mokotuli. 37Ke moo polelo ena e tla netefala: E mong oa jala, e mong oa kotula. 38Ke le rōmile ho kotula seo le sa kang la se sebetsa; ba bang ba sebelitse, 'me lōna le ja mofufutso oa bona.”
39Ba bangata ba Basamaria ba motse oo ba lumela ho eena ka baka la polelo ea mosali ea ileng a paka, a re: “O mpoleletse tsohle tseo ke li entseng.” 40Ha Basamaria ba fihla ho eena, ba mo kōpa hore a hlole le bona; a hlola teng matsatsi a mabeli. 41Ba bangata ho feta ba lumela ka baka la polelo ea hae.
42Ba re ho mosali: “Ha e sa le ka baka la puo ea hao feela re lumelang; re ikutloetse ka borōna, 'me rea tseba hore ruri monna enoa ke Mopholosi oa lefatše.”
Jesu o folisa mora oa letōna
43Kamora' matsatsi ao a mabeli a tloha teng, a ea Galelea, 44hobane Jesu ka sebele sa hae o ile a bolela hore moporofeta ha a hlomphuoe ha habo. 45Ha a fihla Galelea, Bagalelea ba mo amohela, hobane ba ne ba bone tsohle tseo a li entseng moketeng, Jerusalema; kaha le bona ba ne ba ile moketeng.
46A boela a ea Kana e Galelea, moo a neng a fetole metsi veine teng. Hona moo ho ne ho e-na le letōna le leng, leo mora oa lona a neng a kula, Kaperenauma. 47Ha le utloa hore Jesu o fihlile Galelea a e-tsoa Judea, la tla ho eena, la mo kōpa hore a theohe, a e'o folisa mora oa lona, hobane o ne a le makhatheng a ho shoa.
48Jesu a re ho lona: “Ha le sa bone lipontšo le mehlolo ha le ka ke la lumela.”
49Letōna la re ho eena: “Monghali, ak'u theohe hle, ngoana oa ka a e-s'o shoe.”
50Jesu a re ho lona: “E-ea, mora oa hao o phetse.”
Monna eo a lumela polelo eo Jesu a 'moleletseng eona, 'me a ikela. 51Ha a ntse a theoha, bahlanka ba hae ba mo khahlanyetsa, ba re: “Mora oa hao o phetse.” 52A ba botsa nako eo a qalileng ho thuseha ka eona; ba re ho eena: “Maobane, ka hora ea pele motšeare, feberu e ile ea mo tlohela.”
53Joale ntat'a ngoana a tseba hore ke ka eona nako eo Jesu a itseng ho eena: “Mora oa hao o phetse,” 'me a lumela, le ba ntlo ea hae kaofela.
54Mohlolo ona oa bobeli Jesu o o entse Galelea a e-tsoa Judea.
