Boemo ba Jobo
1Ho ne ho e-na le monna e mong naheng ea Use, lebitso la hae e le Jobo. Monna eo o ne a lokile, a hloka koli; a tšaba Molimo, a khesa bobe. 2Jobo o ne a e-na le bara ba supileng, le barali ba bararo. 3O ne a ruile likhutšoane tse likete tse supileng, le likamele tse likete tse tharo, le lipholo tse sekete, le litonki tse tšehali tse makholo a mahlano. O ne a e-na le bahlanka ba bangata, kahoo e le morui ea fetang barui bohle ba Bochabela.
4Bara ba hae ba ne ba ee ba etse mekete malapeng a bona, ka ho latelana, e mong le e mong ka letsatsi leo a ikhethetseng lona, 'me ba meme likhaitseli tsa bona tse tharo ho tla ja, le ho noa le bona. 5Ha mokete o mong le o mong o ne o felile, Jobo o ne a ee a ba bitse, a ba hloekise, a tsohe ka malungoalungoana, a etsetse e mong le e mong oa bona nyehelo ea secheso, hobane ka pelong ea hae o ne a ee a re: “Mohlomong bara ba ka ba ile ba siteloa Molimo, ba mo nyefola ka lipelong tsa bona.” Jobo o ne a ee a etse hona kamehla.
Satane o kōpa ho Molimo ho leka Jobo
6Ka letsatsi le leng mangeloi a Molimo a tla ho Morena, 'me Satane le eena a tla le 'ona. 7Eaba Morena o re ho Satane: “U tsoa kae?”
Satane a araba Morena, a re: “Ke tsoa koana lefatšeng, moo ke neng ke ntse ke ralotsa, ke hahlaula teng.”
8Joale Morena a re ho Satane: “Na u kile ua bona Jobo, mohlanka oa ka? Ha ho ea kang eena lefatšeng! Ke monna ea lokileng, ea hlokang koli, ea tšabang Molimo, ea khesang bobe.”
9Satane a araba Morena, a re: “U re ke feela Jobo a tšabang Molimo? 10Ha ke re ke hobane uena u mo hahetse lerakonyana le mo sireletsang, 'moho le ba lelapa la hae, le tsohle tseo a nang le tsona? U atlehisitse mosebetsi oa matsoho a hae, 'me naheng eohle ho tletse mehlape ea hae! 11Empa hona joale, ha u ka mo ama ka letsoho la hao, ua mo hlakola tsohle tseo a li ruileng, o tla u rōhaka sefahla-mahlo!”
12Morena a re ho Satane: “Ho lokile; tsohle tseo a li ruileng li matsohong a hao, feela eena u se ke ua mo ama ka letsoho la hao.”
Eaba Satane o tloha kapele ho Morena.
Ho timetsoa bana ba Jobo le leruo la hae
13Ka letsatsi le leng bara ba Jobo le barali ba hae ba ne ba le ka tlung ea moholoane oa bona ba e-ja, ba e-noa. 14Leqōsa la fihla ho Jobo, la re: “Lipholo tsa hao li ne li ntse li lema, litonki li ntse li fula pel'a tsona. 15Ke ha Basheba ba li oela holimo, ba li hapa, ba bolaea bahlanka bohle ba hao ka sabole. Ke 'na feela ea phonyohileng ho tla u tsebisa.”
16Eare leqōsa leo le sa ntsane le bua, le leng la fihla, la re: “Letōlō le ile la theoha leholimong, la chesa likhutšoane, le bahlanka ba hao, ha re lore! Ke 'na feela ea phonyohileng ho tla u tsebisa.”
17Eare le leo le sa ntsane le bua, le leng la fihla, la re: “Bakalatiea ba ile ba fihla ka mabōthoana a bona a mararo, a hlaselang, ba futuhela likamele, ba li hapa; ba bolaea le bahlanka ba hao ka sabole. Ke 'na feela ea phonyohileng ho tla u tsebisa.”
18Eare le leo le sa ntsane le bua, le leng la fihla hape, la re: “Bara ba hao le barali ba hao ba ne ba le ka tlung ea moholoane oa bona, ba ntse ba e-ja, ba e-noa. 19Hang-hang ha fihla sefefo se matla, se e-tsoa lehoatateng. Sa liha lihuku tse 'ne tsa ntlo, ea buramela holim'a bona, 'me ba e-shoa. Ke 'na feela ea phonyohileng ho tla u tsebisa.”
20Eaba Jobo oa ema, o hahōla seaparo sa hae, o beola hlooho ea hae, o itahlela fatše ho rapela, 21o re:
“Ke tsoetsoe ke 'mè ke le feela,
ke tla ea lebitleng
ke ntse ke le feela.
Morena o n'a fane,
Morena o amohile,
ho ke ho rorisoe lebitso la hae.”
22Ho tsena tsohle tse etsahetseng, Jobo ha aa ka a etsa sebe, kapa a re Molimo o sebelitse ka mokhoa o sa mo tšoaneleng.
