JOBO 29

₂“Eka nkabe ke phela

sa khoeli tse fetileng,

sa matsatsi

a ha Molimo a n'a ntisitse;

₃ha bone la hae

le ne le mponesetsa tsela,

ka seli la hae

ke tsamaea le lefifing!

₄Eka nkabe ke le matsatsing

a bocha ba ka,

ha tsoalle sa Molimo

se sa sireletsa lapa la ka;

₅ha Ea Matla 'ohle

a ne a sa na le 'na,

bana ba ka ba mpota-potile;

₆ha lebese le ne le phalla

tseleng ea ka,

mafika a kopotsa phororo tsa ole.

₇“Ha ke ne ke e-ea

khorong ea motse,

ke bea tulo sa ka lebaleng la motse,

₈bacha ha ba mpona

ba ne ba sutha,

maqheku a phahame,

a eme ka maoto;

₉mahosana le 'ona

a khaotse ho bua,

ka matsoho a 'ona a ithibe melomo;

₁₀babusi le bona

ba khaotse ho bua,

maleme a bona

a maname mahalapeng.

₁₁“Ea neng a nkutloa

o n'a mpua hantle,

ea neng a mpona eena a mpakela;

₁₂ke ne ke lopolla mafutsana

a llelang thuso,

ke lopolla le eona khutsana

e se nang mothusi.

₁₃Ea khatheng la ho shoa

o n'a ntlhohonolofatsa,

mohlolohali eena

ke thabisa pelo ea hae.

₁₄Ho loka e n'e le seaparo sa ka,

kahlōlo ea ka e le kobo

le moqhaka oa ka.

₁₅Ke ne ke le mahlo

a ba foufetseng,

ke bile ke le maoto

a ba holofetseng.

₁₆Ke ne ke le ntat'a bafumanehi,

ke le 'muelli

oa bao ke sa ba tsebeng.

₁₇Ke ne ke roba mekoètsèpè

ea ba khopo,

ke pholose

ba seng ba le menong a bona.

₁₈“Ka ithetsa, ka re:

‘Ke tla shoela lapeng ha ka;

matsatsi a ka a ngatafale

sa lehlabathe,

₁₉metso ea ka e name

ho ea fihla metsing,

phōka e lale makaleng a ka,

e lale bosiu bohle,

₂₀tlōtla ea ka e 'ne e nchafale,

seqha sa ka se nchafale

tsohong la ka.’

₂₁“Ha ke bua

batho ba ne ba 'mamela,

ba lebelle keletso ea ka

ba khutsitse.

₂₂Ha ke buile

e n'e ba le se le lumme,

polelo tsa ka li kena hamonate

tsebeng tsa bona.

₂₃Ba ne ba ntebella

sa ha ho lebelloa pula,

polelo tsa ka li thopothela

sa pula ea selemo.

₂₄Ha ke tšeha le bona

ba ne ba tlala letšepa;

ha fahleho sa ka se èla,

ebe ba tsoha molōta.

₂₅Ke ne ke le morena,

ke ba supisa tsela,

ke phela joaloka khosi

har'a mabōtho a eona,

joaloka ea tšelisang

ba apereng bofifi.”