JOBO 37

₁“Fefo sena se thefula methapo

ea pelo ea ka,

ere ha e thanya

e b'e tlohe malulong.

₂Mamelisa ho thoathoaretsa

ha ntsoe la Molimo,

u mamele molumo

o tsoang molomong oa hae.

₃O lumisa letōlō

tlas'a maholimo 'ohle,

halima la hae le e'o fihla

pheletsong tsa lefatše.

₄Lentsoe le purumang

le latela lehalima,

Molimo o pokosela

ka ntsoe la bohosi ba hae;

ha maru a thoathoaretsa

lehalima ha a le thibele.

₅Ho pokosela ha ntsoe la Molimo

hoa makatsa;

o etsa likhōlō

tse fetang kutloisiso ea rōna.

₆Ho lehloa o re:

‘Khethehela lefatše!’

Ho lefafatsane:

‘Fetoha litloèbèlèlè!’

₇Mosebetsi oa motho ka mong

oa o emisa,

batho bohle ba tsebe

mosebetsi oa hae.

₈Batana li hohobela

lilaong tsa tsona,

ebe ka mesimeng ea tsona

lia ipothela.

₉Mamati a chankana ea sefefo

a petlekiloe,

meea e pèpètlang e tlisa serame.

₁₀Ha Molimo a phefumoloha

leqhoa lea bōpeha,

kahohle metsi a fetohe qhoqhoaane.

₁₁Maru a matšo

a lusa pula ea motloporo,

ka maru ao,

Molimo lehalima oa le hasa.

₁₂Maru a nts'a phethesela

tseleng ea 'ona,

a aparetse lefatše kahohle-hohle,

a phetha taelo

tseo Molimo a li entseng.

₁₃Molimo a ka nesa pula

e le kotlo ho batho,

kapa a e nesa

hore fatše le be mongobo,

kapa a e nesa

e le supo sa lerato la hae.

₁₄“Oho, uena Jobo,

ak'u mamele sena:

Khutsa, u k'u nahane

limakatso tsa Molimo!

₁₅Na u tseba kamoo Molimo

a laolang maru kateng,

le kamoo a etsang

hore halima la hae le tsèkèmè?

₁₆Na u tseba kamoo maru

a tšehelitsoeng kateng,

le limakatso tsa eo tsebo ea hae

e phethehileng?

₁₇Na u tseba hore aparo

li futhumatsa joang

ha moea o hlaha boroa,

naha e jele boea?

₁₈Na u ka mo thusa

ho sarolla maholimo,

maholimo a bothata

ba seipone sa lethose?

₁₉“Re rute hore na

re tle re re'ng ho eena;

re sitoa ho rala nyeoe

hobane re lefifing.

₂₀Na a ka bolelloa

hore ke rata ho bua le eena?

Haeba motho a ka bua,

ruri o tla timetsoa!

₂₁“Ho joalokaha moea o fefera maru,

tsatsi le sala 'manameng le khanya,

batho ba sitoa ho le talima

ke ho ba fahla;

₂₂le hlaha ka leboea e ka khauta,

tlōtla ea Molimo

e re kenyetse tšabo.

₂₃Ea Matla 'ohle

re ke ke ra mo fihlela,

o re phahametse ka matla

le ka likahlōlo,

a ke ke be a sokamisa toka ea hae.

₂₄Ka baka leo,

batho bohle baa mo tšaba,

bo-tsebanyane bohle ha a ba natse.”