Jobo oa tsieleha
1“Bophelo ba motho
mona lefatšeng ke ntoa,
matsatsi a hae ekare a mohiruoa,
2a mohlanka ea labalabelang moriti,
a mohiruoa ea lebeletseng moputso;
3'na lefa la ka
ke khoeli tsa ho sebeletsa lelea,
ke abetsoe masiu a mokhathala.
4Kamehla ha ke robala kea ipotsa:
‘Ekaba neng e tla ba neng ke tsohe?’
Empa siu bo bolelele, boa tosa,
ke hlobaela joalo
ho fihlela mafube a hlaha.
5Libōkō le khòhò tsa mobu
li nkhōmetse,
tlalo la ka le lipekane,
le petla bolalu.
6Matsatsi a ka a potlaka
sa nale ea selōhi,
a be a fele
tšepo eona e nkoekoetla.
7“Molimo, hopola:
Phelo ba ka bo ka moea feela,
mahlo a ka ha a ka ke a bona
tse molemo hape.
8Ea mponang joale,
ha a sa tla boela a mpona,
etlare ha u mpatla
ke be ke le sieo!
9Joalokaha maru a fefoha, a nyamele,
ea theohelang Qalong ea Bafu
a ke ke a nyoloha;
10ha a ka ke a khutla,
a khutlela lapeng la hae,
tulo tsa hae li sala li le feela,
a ke ke a hlola
a lula tulong tsa hae.
11Ka baka leo, 'na nke ke ka khutsa,
ke tla bua
pelo ea ka e tšoenyehile,
ke ipelaetse
pelo ea ka e ngongorehile.
12“Ebe 'na ke leoatle
kapa khanyapa,
ha u mpeetse balebeli ho ntisa?
13Ha ke re: Phate tsa ka
ke tsona tse tla ntšelisa,
moalo oa ka
o nthethefatse ho koma-koma,
14uena Molimo, u ntšosa ka litoro,
ka lipono
u mpakela ho thōthōmela;
15kahoo ke ikhethela lefu
la ho khangoa,
ho e-na le ho phela
ke le masatsoane.
16Bophelo bona ba ka bo ntenne,
nke ke ka phela kamehla eohle;
ak'u ntese,
matsatsi a ka ke mouoane!
17“Motho e n'e le'ng,
ha u mo nketse holimo hakaale,
u bile u mo hlokometse hakaale?
18Kamehla hoseng ua mo hlahloba,
kamehla motsotso ha o fete
u sa mo leke.
19U tla khaotsa neng ho ntjamela,
u k'u mphe tšoeea,
ke metse mathe?
20Haeba ke sitiloe,
ke u sinyelitse'ng?
Uena Molebeli oa batho?
Ke ka life
u nkentseng pakane ea hao,
hoo le 'na
ke seng ke bile ke itenne?
21Ke hobane'ng
ha u sa tšoarele tšito ea ka,
ua tlosa bokhopo ba ka ba fela?
Haufinyane ke tla robala lebitleng;
u tla mpatla, empa ke tla ba sieo.”
