Kanana e ajoa ka lōtho
1Tsena ke linaha tseo bana ba Iseraele ba ileng ba li ja lefa naheng ea Kanana. Ba ne ba li abeloe ke moprista Eleasare, le Joshua mora oa Nune, le lihlooho tsa malapa a merabe ea bana ba Iseraele. 2Lefa leo la ajoa ka lōtho, la abeloa merabe e robong le karolo e 'ngoe ea morabe oa Manase, joalokaha Morena a ne a laetse Moshe. 3Moshe o ne a se a abetse merabe e 'meli, le karolo e 'ngoe ea morabe naha e kamose oane ho Jorodane; feela Balevi bona a se ke a ba abela lefa har'a Baiseraele, 4hobane bana ba Josefa e ne e le merabe e 'meli: oa Manase le oa Efraime. Balevi bona ha baa ka ba abeloa naha, haese metse ea bolulo, le libakana tse e pota-potileng, hore e be tsa makhulo a likhomo tsa bona, le a mehlape ea bona. 5Joalokaha Morena a ne a laetse Moshe, bana ba Iseraele ba etsa joalo, ba aba naha.
Kalebe o abeloa Heborone
6Bana ba Juda ba ea ho Joshua ha a le Gilegale, 'me Kalebe, mora oa Jefune oa Mokenase, a re ho eena: “U tseba seo Morena a neng a se bue ho Moshe, mohlanka oa Molimo, malebana le 'na, le malebana le uena, ha re le Kadeshe-Barenea. 7Ke ne ke e-na le lilemo tse mashome a mane ha Moshe, mohlanka oa Morena, a nthōma re le Kadeshe-Barenea, hore ke e'o hloela naha, 'me eare ha ke khutla ka fihla ka 'mulela sefuba sa ka. 8Bana beso, ba neng ba ile le 'na, ba fihla ba nyahamisa sechaba lipelo, empa 'na ke ile ka latela Morena Molimo oa ka, ka ho tlala. 9Ka lona letsatsi leo, Moshe a hlapanya, a re: ‘Ruri, naha eo leoto la hao le kileng la hata holim'a eona, e tla ba ea hao, le ea bana ba hao kamehla, hobane u ile ua latela Morena Molimo oa ka, ka ho tlala.’
10“Joale bona, ka lilemo tsena tse mashome a mane a metso e mehlano, ho tloha mohla Morena a buang lentsoe lena ho Moshe, ha Baiseraele ba ntse ba lelera lehoatateng, Morena o babaletse bophelo ba ka, joalokaha a ne a bue, 'me ke mona kajeno ke na le lilemo tse mashome a robeli a metso e mehlano. 11Empa le kajeno ke ntse ke le matla joaloka mohla Moshe a neng a nthōma. Matla a ka a kajeno a ntse a ka a nako eona eane; e ka ba matla a ho loana, kapa a ho itsamaela feela. 12Ka baka leo he, 'nee naha ena e maralla eo Morena a neng a bue ka eona mohl'a letsatsi leo. Etsoe uena u ne u ikutloele ka lona letsatsi leo, hore Baanake ba phela moo, 'me metse ea bona ke ea metonana, ea liqhobosheane. Mohlomong Morena o tla ba le 'na ha ke le moo, 'me ke ba leleke teng, joalokaha Morena a buile.”
13Joshua a hlohonolofatsa Kalebe, mora oa Jefune, 'me a mo nea Heborone, hore e be lefa la hae. 14Ka baka lena, Heborone ea e-ba lefa la Kalebe, mora oa Jefune oa Mokenase, ho fihlela kajeno-ea-bokajeno, hobane a ne a ile a latela Morena Molimo oa Iseraele, ka ho tlala. 15Pele ho moo, lebitso la Heborone e ne e le Motse oa Areba, 'me Areba e ne e le senatlahali har'a Baanake.
Joale naha ea phomola, ea hloka ntoa.
