KOLI-EA-MALLA 2

₁Bonang kamoo Morena

a halefileng kateng!

O sithabelitse Sione

ka leru le letšo-letšo!

Tlōtla ea Iseraele

o e lahletse fatše,

a e lahlela fatše

e theoha leholimong.

Mohl'a tsatsi leo

la khalefo ea hae,

ha aa k'a hopola

bonamelo ba maoto a hae.

₂Morena o timelitse

liahelo tsa Jakobo,

a li timetsa kaofela,

mohau a se na oona;

qhobosheane tsa Morali oa Juda

a li ripitla,

a li ripitla

khalefo ea hae e nts'e tlōkōma;

'muso oa teng a o tlontlolla,

a o tlontlolla le babusi ba oona.

₃Naka la Iseraele o le robile,

a le roba

khalefo ea hae e tlōkōma;

tsoho la hae le letona, le matla,

a le honyetsa ha sera se futuha.

A halefela Jakobo

sa mollo o malakabe,

o malakabe, o timetsang kahohle.

₄O hutse seqha sa hae joaloka sera,

o eme sa mohlabani,

tsoho le letona le phahame;

bohle ba khahlang mahlo

a ba bolaea.

Khalefo ea hae e tukang malakabe,

a e theolela holim'a tente ea Sione.

₅Morena o ka sera sa rōna,

Iseraele o e ripitlile,

a ripitla matlo 'ohle

a likhosi tsa eona.

Qhobosheane tsa eona a li heletsa,

a atisa bofifi le lillo

tsa Morali oa Juda.

₆O runtsōlōtse Tempele ea hae,

a e runtsōlla sa lephèphè tšimong,

sebaea sa hae sa liphutheho

a se ripitla.

Morena o entse hore Sione e lebale,

e lebale matsatsi a mekete,

e lebale le Lisabatha;

ha khalefo ea hae e tuka malakabe,

a nyelisa khosi le eena moprista.

₇Morena o lahlile aletare ea hae,

Sehalalelo sa hae

le sona a se furalla;

marako a matlo a khosi tsa Sione

o neelane ka 'ona

matsohong a lira;

ka tlung ea Morena

lira li entse lerata,

lerata le kang

la mohl'a tsatsi la mokete.

₈Morena o s'a entse qeto

ea ho heletsa,

ea ho heletsa marako

a Morali oa Sione;

khoele ea ho lekanya

o s'a e otlolotse,

ha aa k'a honyetsa tsoho la hae

ha le timetsa.

A etsa hore metero le marako li lle,

bobeli ba tsona a li heletsa.

₉Likhoro tsa Sione

li koahetsoe ke mobu,

mekoallo ea tsona

o e robakile likotoana;

khosi le mahosana

ke bathōpuoa har'a balichaba,

ke bathōpuoa ba leng moo

ho sa rutoeng Molao;

baporofeta ba Sione

ha ba sa bona lipono,

pono tse tsoang ho Morena.

₁₀Baholo ba Jerusalema

ba ituletse fatše,

ba ituletse fatše ba khutsitse,

ba khutsitse ba se na puo;

ba itšetse ka lerole

holim'a lihlooho,

'meleng ea bona

ba apere tse mahoashe,

baroetsana ba Jerusalema

ba inametse fatše.

₁₁Mahlo a ka a foufalitsoe,

a foufatsoa ke likeleli,

moea oa ka o ferekane haholo,

bohlōkō ba pelo ea ka

bo tšolohela fatše,

ka baka la ho timetsoa

ha sechaba sa heso,

ka baka la ho timetsoa

ha bana le masea,

ba timetsoa

ba le literateng tsa motse.

₁₂Bana ba llela bo-'m'a bona,

ba re: “Lijo li hokae,

lino tsona li hokae?”

Ba rialo ba akheha

sa batho ba mahlatsipa,

ba akheha

ba le literateng tsa motse,

bophelo ba bona

bo fela kahanyane,

bo fela bo-'m'a bona

ba ba sikile ka matsoho.

₁₃Ke ntho efe

eo nka u pakelang ka eona?

Ke ntho efe

eo nka o tšoantšang le eona?

Ka u tšoantša le eona,

uena Jerusalema?

Nka u lekanya le eng,

ke tle ke u tšelise?

Ke tšelise uena,

Morali oa Sione,

Morali oa Sione oa moroetsana?

Botebo ba leqeba la hao

bo ka ba leoatle!

Ke mang ea ka tsebang

ho u phekola?

₁₄Lipono tse bonoeng

ke baporofeta ba hao

e n'e le tsa leshano,

tse se nang thuso;

ha baa ka ba u senolela

sebe sa hao,

hore ba u fapose bothōpuoa ba hao.

Ba ile ba u bolella

lipono tsa bohata,

lipono tse ileng tsa u thetsa,

tsa u khelosa.

₁₅Bo-mofeta-ka-tsela ba opa liatla,

ba opa liatla ha ba u bona;

ba letsa mololi,

lihlooho baa li thukutha,

ba soma Morali oa Jerusalema,

ba re: “Na motse oo

ke oona o n'o le motle-motle,

o n'o thabisa lefatše lohle?”

₁₆Lira tsa hao

li u bebenyetsa melomo,

lia u soma,

li u tsikitlanyetsa meno,

li re: “Re timelitse Jerusalema!

Lena ke lona tsatsi

leo esale re le emela,

le fihlile, re bile re le bone!”

₁₇Morena o entse

seo a neng a se rerile,

polelo tsa hae

o li phethahalitse,

polelo tse neng li boleloe

mehleng ea khale;

o u timelitse a se na mohau,

a etsa hore u tlakoe

ke lira tsa hao,

ba u loantšang a ba matlafatsa.

₁₈Pelo tsa sechaba

li ipiletsa ho Morena,

uena Jerusalema, Morali oa Sione,

keleli tsa hao

a li ke li phalle joaloka nōka,

li phalle motšeare,

li phalle le bosiu;

u se ke ua ipha sebaka

sa ho phomola,

mahlo a hao

le 'ona a se k'a phomola.

₁₉Tsoha, u hōoeletse har'a bosiu,

u hōoeletse

ha balebeli ba qala ho santela;

tse ka pelong ea hao

u li tšolle joaloka metsi,

u li tšollele kapele ho Morena.

Phahamisa matsoho a hao,

u a phahamisetse ho Morena,

u a phahamise

ka baka la bana ba hao,

bana ba hao ba bolaoang ke tlala,

e ba bolaea har'a literata tsohle.

₂₀“Oho, Morena, bona,

ak'u inahane:

Eo u kil'a mo etsa tjee ke mang?

Na basali ba lokela

ho ja masea a bona,

ba je bana bao ba ba hōlisitseng?

Na moprista le moporofeta

ba lokela ho bolaoa,

ba bolaeloe ka Sehalalelong,

Halalelong sa Morena?

₂₁Bacha le maqheku

ba rapeletse 'moho,

ba rapeletse literateng,

ba rapaletse har'a lerōle;

bahlankana le baroetsana ba ka

ba shoele,

ba e-shoa ke ho bolaoa ka sabole.

U ba bolaile mohla u n'u halefile,

ua ba bolaea

le mohau u se na oona.

₂₂U bitsitse lira tsa ka

ka nq'a tsohle,

ua li bitsa

eka u li bitsetsa moketeng.

Ka tsatsi leo

u n'u halefile ka lona, Morena,

ha ho le ea mong ea kil'a phonyoha,

ha ho le ea mong ea kil'a sala!

Bao ke ba ōtlileng, ka ba hōlisa,

bohle ba timelitsoe ke sera sa ka!”