Letsatsi la tefelo ea sebe
1Kamora' lefu la bara ba babeli ba Arone, ba neng ba shoe ha ba ne ba etsetsa Morena nyehelo, 2Morena a bua ho Moshe, a re: “Bolella moholoane oa hao Arone hore a se n'o kena ka Sehalalelong ka linako tsohle, kamora' lesira le siretseng sekoahelo sa tefelo ea sebe se holim'a areka ea selekane, e le hore a se ke a shoa, hobane ke tla iponahatsa holim'a sekoahelo sa tefelo ea sebe, ke le lerung.
3“Arone o tla kena ka Sehalalelong ka mokhoa ona: a tlise pohoana ea nyehelo e tlosang sebe, le pheleu ea nyehelo ea secheso. 4O tla apara seaparo se halalelang se fihlang maotong, se entsoeng ka lesela la lene, a tene le borikhoe ba lesela la lene, a itlame ka leqhama la lesela la lene, a roale le tuku ea lene. Liaparo tsena lia halalela, 'me eka khona a tole ka metsi, a nt'o li apara. 5Phuthehong ea bana ba Iseraele a nke lipōli tse peli tsa nyehelo e tlosang sebe, le pheleu e le 'ngoe ea nyehelo ea secheso.
6“Arone o tla tlisa pohoana ea nyehelo e tlosang sebe, eo e leng ea hae, a iketsetse tefelo ea sebe le ba lelapa la hae. 7O tla nka lipōli tseo tse peli, a li emise kapele ho Morena, monyakong oa Tente ea Morena. 8Arone o tla laola liphooko tseo tse peli ka lōtho, 'me lōtho lona le tla ntša e 'ngoe e le ea Morena, e 'ngoe e le ea Asasele. 9Arone o tla tlisa phooko eo lōtho le e ntšitseng e le ea Morena, 'me ka eona a etse nyehelo e tlosang sebe. 10Empa pōli eo lōtho le e ntšitseng e le ea Asasele, e tla emisoa kapele ho Morena e ntse e phela, hore a tle a etsetse tefelo ea sebe holima eona e nt'o lelekeloa lehoatateng ho Asasele.
11“Arone o tla tlisa pohoana ea nyehelo e tlosang sebe, eo e leng ea hae, 'me ka eona a iketsetse tefelo ea sebe le ba lelapa la hae. O tla hlaba pohoana eo ea hae e le nyehelo e tlosang sebe. 12O tla nka sekubetsa se tletseng mashala a hlenneng, se holim'a aletare e kapele ho Morena. A ngoathe mokubetso o silehileng, o monko o monate, a o tlatse matsoho a hae, a o ise kamora' lesira. 13Mokubetso ona a o tšèlè holim'a mollo, kapele ho Morena, e le hore mosi oa mokubetso o tle o koahele sekoahelo sa tefelo ea sebe, se holim'a areka e kentseng matlapa a ngotsoeng Molao, e le hore Arone a se ke a shoa. 14O tla nka mali a pohoana, a fōke holim'a sekoahelo sa tefelo ea sebe ka monoana oa hae, ka nqeng ea bochabela; hape a fōke hasupa kapele ho sona.
15“Joale a hlabe pōli ea nyehelo e tlosang sebe, eo e leng ea sechaba, a tlise mali a eona kamora' lesira. Ka mali a eona a etse joalokaha a ile a etsa ka mali a pohoana, a fōke holim'a sekoahelo sa tefelo ea sebe, le kapele ho sona. 16O tla hloekisa Sehalalelo ka baka la ho se hloeke ha bana ba Iseraele, le ka baka la litlōlo tsa bona le libe tsa bona tsohle. Le Tente ea Morena, e hlomiloeng har'a bona ba sa hloeka, a e hloekise. 17Ho se be motho ka Tenteng ea Morena, ho tloha ha moprista a kena ka ho eona ho ea etsa tefelo ea sebe, ho fihlela a e-tsoa. O tla iketsetsa tefelo ea sebe, a e etsetse le ba lelapa la hae, le sechaba sohle sa Iseraele.
18“Joale o tla tsoa, a ee aletareng e kapele ho Morena, 'me a e hloekise. A nke mali a mang a pohoana, le mali a mang a pōli, 'me ka 'ona a tlotse manaka a aletare ho e pota-pota. 19Ka mali a mang o tla fōka holim'a aletare hasupa, a e hloekise, a e halaletse, hore a tlose ho se hloeke ha bana ba Iseraele ho ho eona.
Pōli ea Asasele
20“Ha Arone a qetile ho hloekisa Sehalalelo, Tente ea Morena, le aletare, o tla tlisa pōli e ntseng e phela. 21Arone o tla bea matsoho a hae a mabeli holim'a hlooho ea pōli ena e ntseng e phela, 'me a bolele makhopo 'ohle a bana ba Iseraele, le litlōlo tsohle tsa bona, le libe tsohle tsa bona; a li bee holim'a hlooho ea pōli ena, ebe e isoa lehoatateng ke motho ea khethetsoeng hoo. 22Pōli ena e tla jara makhopo a bona 'ohle. Motho eo a e ise naheng e se nang baahi, 'me a e tlohelle lehoatateng moo.
23“Arone o tla kena ka Tenteng ea Morena, a hlobole liaparo tsa lesela la lene, tseo a ileng a li apara ha a kena ka Sehalalelong, ebe o li siea moo. 24O tla tola ka metsi a le ka Sehalalelong, a apare liaparo tsa hae, a ntan'o tsoa, a etse nyehelo ea hae ea secheso, le nyehelo ea sechaba ea secheso; a be a iketsetse tefelo ea sebe, a e etsetse le sechaba. 25Mafura a nyehelo e tlosang sebe a a chesetse holim'a aletare.
26“Motho ea ileng a isa pōli ho Asasele o tla hlatsoa liaparo tsa hae, a tole ka metsi, 'me kamorao ho moo a kene ka liahelong. 27Pohoana ea nyehelo e tlosang sebe, le pōli ea nyehelo e tlosang sebe, tseo mali a tsona a ileng a tlisoa ho tla etsa tefelo ea sebe ka Sehalalelong, li tla isoa kantle ho liahelo. Matlalo a tsona, le nama ea tsona, le mosoang oa tsona, li chesoe ka mollo. 28Ea li chesang o tla hlatsoa liaparo tsa hae, a tole ka metsi, 'me kamora' moo a kene ka liahelong.
Ho itima lijo
29“Ona ke molao oa mehla eohle ho lōna: Ka letsatsi la leshome la khoeli ea bosupa, le tla itima lijo, le se ke la etsa mosebetsi ofe kapa ofe, e ka ba motho oa letsoalloa, kapa molichaba ea jakileng har'a lōna. 30Ka letsatsi lena, moprista o tla le etsetsa tefelo ea sebe, hore le hloeke, le hloekisoe libeng tsohle tsa lōna kapele ho Morena. 31Ho lōna ke letsatsi le leholo la phomolo, 'me le tla itima lijo. Ona ke molao oa mehla eohle. 32Moprista ea tlotsitsoeng, ea halalelitsoeng hore e be moprista sebakeng sa ntat'ae, o tla etsa tefelo ea sebe. O tla apara liaparo tse halalelang, tse entsoeng ka lesela la lene. 33O tla hloekisa Sehalalelo, Tente ea Morena, le aletare ea tefelo ea sebe; a etsetse baprista, le batho bohle ba phutheho, tefelo ea sebe.
34“Ona e tla ba molao oa mehla eohle ho lōna, hore hang ka selemo le etsetse bana ba Iseraele tefelo ea sebe, ka baka la libe tsohle tsa bona.”
Eaba Moshe o etsa joalokaha Morena a ne a mo laetse.
