Likahlolo
1Morena a bua ho Moshe, a re:
2“Bua le bana ba Iseraele, u re ho bona: ‘Motho e mong le e mong oa bana ba Iseraele, kapa oa balichaba ba jakileng naheng ea Iseraele, ea neelanang ka bana ba hae ho Moloke, ruri o tla bolaoa. Sechaba sa naha eo se tla mo tlepetsa ka majoe. 3Le 'na ke tla halefela motho eo, 'me ke mo khaole sechabeng sa habo, hobane a neile Moloke bana ba hae, hore a silafatse Sehalalelo sa ka, le ho nyelisa lebitso la ka le halalelang. 4Haeba sechaba sa naha eo se lala ketso ea monna eo ka 'mele, ea ho nea Moloke bana ba hae, se sa 'molaee, 5'na ke tla halefela monna eo le ba lelōko la hae. Ke tla mo khaola sechabeng sa habo, 'moho le bohle ba mo etsisang, ba sebeletsang Moloke.
6“ ‘Motho ea batlang thuso ea mathuela, kapa ea linohe, ea mathang kamora' tsona, ke tla mo halefela, 'me ke mo khaole sechabeng sa habo.
7“ ‘Le ikhalaletse, 'me le tla halalela, hobane ke 'na Morena Molimo oa lōna. 8Le boloke melao ea ka, 'me le e phethe. Ke 'na Morena ea le halaletsang.
9“ ‘Motho ofe kapa ofe ea rohakang ntat'ae kapa 'm'ae, ruri o tla bolaoa. Kaha o rohakile ntat'ae kapa 'm'ae, o tla bolaoa ka baka la molato oa hae.
10“ ‘Haeba monna ofe kapa ofe a feba le mosali oa monna e mong, bobeli ba batho bao ba febang ba tla bolaoa.
11“ ‘Haeba monna a tlontlolla ntat'ae ka ho kena likobong tsa mosali oa ntat'ae, monna eo le mosali eo oa ntat'ae, ruri bobeli ba bona ba tla bolaoa, 'me ba tla be ba bolaoa ka baka la molato oa bona.
12“ ‘Haeba monna a kena likobong tsa ngoetsi ea hae, bobeli ba bona ba tla bolaoa. Ba entse ketso e manyala, 'me ba tla bolaoa ka baka la molato oa bona.
13“ ‘Haeba monna a e-ja monna e mong maotoana, bobeli ba bona ba tla bolaeloa ketso eno ea bona e manyala, ba bolaoe ka baka la molato oa bona.
14“ ‘Haeba monna a kena likobong tsa ngoana le tsa 'm'ae, hoo ke ketso e manyala. Monna le basali bao ba babeli ba chesoe ka mollo, hore manyala a joalo a se ke a hlola a e-ba teng har'a lōna.
15“ ‘Haeba monna a robala phoofolo o tla bolaoa, le phoofolo eo e tla bolaoa.
16“ ‘Haeba mosali a ipeketlela phoofolo hore e mo robale, mosali eo o tla bolaoa, le phoofolo eo e tla bolaoa. Ruri mosali eo le phoofolo eo ba bolaoe. Ba tla bolaoa ka baka la molato oa bona.
17“ ‘Haeba monna a kena likobong tsa khaitseli ea hae, e leng morali oa ntat'ae, kapa morali oa 'm'ae, 'me bobeli ba bona ba bonelana, hoo ke ketso e manyala. Bobeli ba bona ba tla khaoloa sechabeng sa habo bona, moo sechaba se ntseng se bona. Monna eo o tla ahloleloa ho kena likobong tsa khaitseli ea hae, 'me o tla jara bokhopo ba hae.
18“ ‘Haeba monna a kena likobong tsa mosali ea ileng linakong tsa hae, 'me a 'monela, bobeli ba bona ba tla khaoloa sechabeng sa habo bona, hobane monna eo o pepesitse lehatlelo la mosali, le mosali eo o pepesitse mohloli oa lehatlelo la hae.
19“ ‘U se ke ua kena likobong tsa ngoan'abo 'm'ao, kapa tsa rakhali'a hao, hobane ho etsa joalo ke ho kopanya mali a le mang. Ea etsang joalo o tla jara bokhopo ba hae.
20“ ‘Haeba monna a kena likobong tsa 'mangoan'ae, o tlontlolotse rangoan'ae, 'me eena le 'mangoan'ae ba tla ahloleloa molato oa bona, 'me ba tla shoa ba se na bana.
21“ ‘Haeba monna a nyala mohats'a ngoan'abo, hoo ke manyala. O tlontlolotse ngoan'abo, 'me ba tla shoa ba se na bana.
22“ ‘Le tla bōlōka melao eohle ea ka, le litaelo tsohle tsa ka, 'me le li phethe, hore naha eo ke le isang ho eona, hore le e'o aha ho eona, e se ke ea le hlatsa. 23Le se ke la latela melao ea lichaba tseo ke tla li leleka kapele ho lōna, hobane li entse lintho tsena tsohle; kahoo ke ile ka li nyonya. 24Ke itse ho lōna: Naha ea sona e tla ba lefa la lōna; ke tla le nea eona e be leruo la lōna. Ke naha e phallang lebese le mahe a linotši. Ke 'na Morena Molimo oa lōna, ea le khaohantseng le balichaba bao.
25“ ‘Ka baka leo, le tla khetholla phoofolo e hloekileng ho e sa hloekang, le nonyana e hloekileng ho e sa hloekang; le se ke la itšilafatsa ka phoofolo, kapa ka nonyana, kapa ka ntho efe kapa efe e hahabang holim'a lefatše, eo ke le khetholletseng eona hore ha ea hloeka.
26“ ‘Le tla halalela le be batho ba ka, hobane 'na, Morena, kea halalela. Ke le khaohantse le balichaba, hore le tle le be ba ka.
27“ ‘Monna kapa mosali ea nang le moea o bothuela, kapa oa bonohe, ruri o tla bolaoa. O tla tlepetsoa ka majoe, a bolaeloe molato oa hae.’ ”
