MEETLO 6

₁Morena a bua ho Moshe, a re: ₂“Ha motho a etsa sebe, 'me a siteloa Morena ka ho qhekanyetsa oa habo ka ntho e neng e bōlōkiloe ho eena, kapa e beiloeng paneng, kapa e alimiloeng ka tumellano, kapa e utsoitsoeng, kapa eo a mo hanyapelitseng eona; ₃kapa ere ha a fumane ntho e lahlehileng a etse bolotsana, a hlapanye ka leshano, hore ha aa ka a e fumana, motho ea etsang e 'ngoe ea tsena tsohle o etsa sebe. ₄Ha motho a entse sebe, 'me a fumanoa a le molato, o tla busetsa seo a se utsoitseng, kapa seo a se fumaneng ka ho hanyapetsa, kapa ntho e neng e bōlōkiloe ho eena, kapa ntho e neng e lahlehile, eo a e fumaneng. ₅Le ntho efe le efe eo a e hlapanyelitseng ka leshano, o tla e busetsa ka ho tlala, a be a eketse ka karolo tse mashome a mabeli ho tse lekholo; a e nee mong'a eona mohla a ipoletseng hore o molato. ₆A tlisetse Morena nyehelo ea hae e tlosang molato. E be pheleu e se nang sepha, e tsoang mohlapeng oa hae. Ke uena ea tla lekanya theko ea eona, e be eona nyehelo e tlosang molato, e tlisoang ho moprista. ₇Moprista o tla mo etsetsa tefelo ea sebe kapele ho Morena, 'me o tla tšoareloa tsohle tseo a li entseng ha a tla ba molato.”

₈Morena a bua hape ho Moshe, a re: ₉“Laela Arone le bara ba hae, u re: ‘Ona ke molao oa sehlabelo sa secheso. Sehlabelo sa secheso se tla siuoa holim'a leifo la aletare bosiu bohle, ho fihlela letsatsi la hosasane. Mollo o holim'a aletare o 'ne o fepeloe. ₁₀Moprista o tla apara seaparo sa hae se entsoeng ka lene, a tene le borikhoe ba hae bo entsoeng ka lesela la lene, ebe o ola molora o holima aletare, moo mollo o cheselitseng sehlabelo teng, a bee molora oo kathōko ho aletare. ₁₁Joale o tla hlobola liaparo tsa hae, a apare tse ling, ebe o ntšetsa molora oo kantle ho liahelo, o o isa sebakeng se hloekileng. ₁₂Mollo o holim'a aletare o tla 'ne o fepeloe, o se ke oa tima. Hoseng ho hong le ho hong moprista o tla eketsa patsi mollong, a lokise sehlabelo sa secheso holim'a aletare, 'me a chese mafura a mahlabelo a teboho. ₁₃Mollo o tla 'ne o fepeloe holim'a aletare, hore o se ke oa tima.

₁₄“ ‘Ona ke molao oa nyehelo ea lijo. Bara ba Arone ba tla tlisa nyehelo ena kapele ho Morena, kapel'a aletare. ₁₅E mong oa bona o tla ngoatha phofo e thumisehileng, phofong ea nyehelo, a tlatse seatla; a nke le ole, le mokubetso oohle o holim'a phofo ea nyehelo, ebe o li chesetsa holim'a aletare, e be nyehelo e monko o monate, hore Morena a tle a ba hopole. ₁₆Se setseng, se sa lomosoang, Arone le bara ba hae ba tla se jella sebakeng se halalelang. Ba tla se jella ka seotloaneng sa Tente ea Morena. ₁₇Se phehoe se sa lomosoa; ke ba file sona e le seabo sa bona se tsoang sehlabelong sa ka sa secheso. Se halalela ka ho fetisisa, joaloka sehlabelo sa tšoarelo ea libe le sa tefelo ea melato. ₁₈E mong le e mong e motona oa bana ba Arone o tla se ja; ke taelo ea mehla eohle, melōkong ea bona, bakeng sa mahlabelo a Morena a secheso. Eng kapa eng e se amang e tla halalela.’ ”

₁₉Morena a boela a bua ho Moshe, a re: ₂₀“Ena ke nyehelo ea Arone le bara ba hae, eo ba tla nyehella Morena ka eona mohla Arone a tlotsoang. E tla ba phofo e thumisehileng, e boima ba kilo e le 'ngoe, e le nyehelo ea mehla eohle. Hoseng e be halofo ea eona, mantsiboea e be halofo ea eona. ₂₁E lujoe hantle ka ole, e phehoe ka pane, ebe ea tlisoa. Ha e se e rathetsoe, e tlisoe e le nyehelo ea lijo, e monko o monate ho Morena. ₂₂Mora oa Arone ea tla tlotsoa hore e be moprista bakeng sa ntat'ae, le eena o tla nyehela joalo. Nyehelo ena e tla chesetsoa Morena kaofela. Ona ke molao oa mehla eohle. ₂₃Nyehelo e 'ngoe le e 'ngoe ea lijo, ea moprista, e tla chesoa kaofela, 'me e ke ke ea jeoa.”

₂₄Morena a boela a bua ho Moshe hape, a re: ₂₅“Ere ho Arone le bara ba hae: ‘Ona ke molao oa nyehelo ea ho tšoareloa sebe. Moo phoofolo ea sehlabelo sa secheso e hlabeloang teng, ke hona moo le phoofolo ea nyehelo ea ho tšoareloa sebe e tla hlabeloa teng, kapele ho Morena. Ena ke nyehelo e halalelang ka ho fetisisa. ₂₆Moprista ea etsang sehlabelo sa ho tšoareloa sebe, o tla ja nama ea phoofolo eo. O tla e jella sebakeng se halalelang, ka seotloaneng sa Tente ea Morena. ₂₇Eng kapa eng e amang nama ea eona e tla halalela. Ha seaparo se ka qaphaletsoa ke mali a eona, seaparo seo se qaphalelitsoeng ke mali u se hlatsoetse sebakeng se halalelang. ₂₈Pitsa ea letsopa, e neng e phehile nama, eka khona e pshatloe, empa haeba e phehiloe ka pitsa ea tšepe, eona eka khona e faloe, e hlatsuoe ka metsi. ₂₉E mong le e mong e motona oa baprista o tla ja sehlabelo sena; se halalela ka ho fetisisa. ₃₀Phoofolo ea sehlabelo sa ho tšoareloa sebe, eo mali a eona a ileng a tlisoa ka Tenteng ea Morena, ho tla etsa tefelo ea sebe ka Sehalalelong, ha e ka ke ea jeoa. E tla chesoa ka mollo.