Jesu oa lekoa
1Joale Jesu a khutla nōkeng ea Jorodane a tletse Moea o Halalelang, a tsamaisoa ke Moea feelleng, 2a ntse a lekoa ke Diabolosi ka matsatsi a mashome a mane. A se ke a ja le letho ka matsatsi ao, 'me qetellong ea 'ona a lapa.
3Diabolosi a re ho eena: “Ha u le Mora oa Molimo, e-re ho lejoe lena le fetohe bohobe!”
4Jesu a mo araba, a re: “Ho ngotsoe, ho thoe: ‘Motho a ke ke a phela ka bohobe feela.’ ”
5Hoba a mo nyollele holimo, a mo supisa mebuso eohle ea lefatše ka motsotsoana. 6Eaba Diabolosi o re ho eena: “Ke tla u fa matla ana 'ohle le maruo a mebuso eo, hobane ke e filoe, 'me ke e fa mang le mang eo ke ratang ho mo fa eona; 7ka baka leo, haeba u nkhumamela, e tla ba ea hao eohle.”
8Jesu a mo araba, a re: “Ho ngotsoe, ho thoe:
“ ‘U tla khumamela Morena
Molimo oa hao,
u sebeletse eena a 'notši.’ ”
9Joale a mo isa Jerusalema, a 'mea tlhōrōng ea Tempele, a re ho eena: “Ha u le Mora oa Molimo, itihele fatše ho tloha mona, 10hobane ho ngotsoe, ho thoe:
“ ‘O tla laela mangeloi a hae
hore a u sireletse,’
11ho bile ho thoe:
‘A tla u khakeletsa ka liatla,
esere leoto la hao
la khoptjoa ke lejoe.’ ”
12Jesu a araba, a re ho eena: “Ho itsoe: U se ke ua leka Morena Molimo oa hao!”
13Ha Diabolosi a qetile ho mo leka kahohle, a khaohana le eena ka nakoana.
Jesu o qala tšebetso ea hae Galelea
14Eaba Jesu o khutlela Galelea a tletse matla a Moea o Halalelang; botumo ba hae ba phatlalla tikolohong eohle. 15A ruta matlung a bona a thapelo, a tlotlisoa ke bohle.
Jesu o hanoa Nasaretha
16A ea Nasaretha, moo a hōletseng teng, 'me ho ea ka tloaelo ea hae a kena ka tlung ea thapelo ka tsatsi la Sabatha, a ema, hore a tle a bale. 17A neeloa buka ea moporofeta Esaea, 'me hoba a e phetle, a fumana moo ho ngotsoeng, ho thoe:
18“Moea oa Morena o holim'a ka
hobane a ntlotselitse
ho bolella mafutsana
molaetsa o molemo,
o nthōmetse
ho phatlalletsa bathopuoa
tsa tōkōlōho,
le lifofu hore li tla tutuboloha,
le ho lokolla ba hateletsoeng.
19le ho phatlalatsa lemo sa Morena
sa mehauhelo.”
20Hoba a koale buka, 'me a e khutlisetse ho mothusi, a lula, 'me mahlo a bohle ba ka tlung ea thapelo a e-ba holim'a hae. 21A qala ka ho re ho bona: “Kajeno temana ena ea Mangolo e phethahetse moo le utloang.”
22Bohle ba mo paka, ba makalla mantsoe a mohau a tsoang molomong oa hae, 'me ba re: “Ana eo hase mora oa Josefa?”
23A re ho bona: “Ka sebele le tla mpolella maele ana, le re: ‘Ngaka, iphekole!’ Tsohle tseo re li utloileng hore li etsahetse Kaperenauma, li etse le mona motseng oa heno.”
24Joale a re: “Ruri kea le bolella, ke re: Ha ho moporofeta ea amohelehang motseng oa habo.
25“Kannete kea le bolella, ho ne ho e-na le basali ba bangata ba bahlolohali Iseraeleng mehleng ea Elia, pula e sa ne ka lilemo tse tharo le likhoeli tse tšeletseng, tlala e kholo e le teng naheng eo eohle. 26Empa Elia ha aa ka a rōmeloa le ho ea mong oa bona, haese ho mosali oa mohlolohali, Sarepeta, naheng ea Sidone. 27Ho ne ho bile ho e-na le balepera ba bangata Iseraeleng mehleng ea moporofeta Elisha, 'me ha hoa ka ha hloekisoa le ea mong oa bona, haese Mosiria Naamane feela.”
28Bohle ba ka tlung ea thapelo ba tlala khalefo ha ba utloa tsena, 29ba ba ba ema, ba mo kharameletsa kantle ho motse, ba mo isa selomong sa thabana eo motse oa bona o hahiloeng letsoapong la eona, ba re baa mo lihela, 30empa eena a phunyeletsa har'a bona, a ikela.
Motho ea nang le moea o litšila
31A theohela Kaperenauma e leng motse oa Galelea. A ruta e le ka Lisabatha, 32'me batho ba hlolloa ke thuto ea hae, hobane mantsoe a hae a ne a e-na le matla.
33Ho ne ho e-na le monna ka tlung ea thapelo ea nang le moea o litšila oa modemona; a hōoa ka lentsoe le matla, a re: 34“Oe! U re kene ka'ng, Jesu oa Nasaretha? Na u tlile ho re timetsa? Kea tseba hore na u mang: U Ea Halalelang oa Molimo.”
35Jesu a mo khalemela, a re: “Thōla! Tsoa ho eena!” Eaba modemona o tabanya motho eo fatše har'a batho, o tsoa ho eena o sa mo ntša kotsi.
36Bohle ba hlolloa, 'me ba buisana, ba re: “Taelo ee ke e joang, hore ebe o laela meea e litšila ka borena le ka matla, 'me e tsoe?” 37Jesu a tumisoa libakeng tsohle tsa tikoloho eo.
Jesu o folisa batho ba bangata
38Eare hoba a tsoe ka tlung ea thapelo, a kena ha Simone. Joale mohoehali oa Simone o ne a tšoeroe ke feberu e bohale, eaba ba mo kōpela thuso ho Jesu. 39Jesu a inamela ho eena, a khalemela feberu, 'me ea mo tlohela; a tsoha hang-hang, a nt'o ba sebeletsa.
40Ha letsatsi le likela, bohle ba nang le ba kulang ke maloetse a mefuta-futa ba ba tlisa ho Jesu; a bea matsoho holim'a e mong le e mong oa bona, 'me a ba folisa. 41Le bademona ba ne ba e-tsoa ho ba bangata, ba ntse ba hōoa, ba re: “U Mora oa Molimo!” Empa a ba khalemela, a se ke a ba lumella ho bua, kaha ba ne ba tseba hore ke Kreste.
Jesu oa ruta
42Eare ha bo sele Jesu a tsoa, a ea nahathothe, 'me matšoele a 'matla, a tla ho eena, a mo thiba, hore a se ke a tloha ho 'ona. 43A re ho 'ona: “Eka khona le metse e meng ke e bolelle molaetsa o molemo oa 'Muso oa Molimo, hobane ke rōmetsoe hoo.”
44O ne a ruta ka matlung a thapelo a Judea.
