1Ona ke molaetsa oa Morena. Morena a bua ho Baiseraele ka molomo oa Malakiea, a re:
Morena o rata Baiseraele
2“Kea le rata,” ho rialo Morena.
“Empa lōna lea mpotsa, le re: ‘U re bontšitse joang hore ua re rata?’
“Na Esau e ne e se ngoan'abo Jakobo?” ho rialo Morena. “Leha ho le joalo ke ile ka rata Jakobo, 3Esau eena ka mo hloea, ka fetola lithaba tsa hae matsoatlare, lefa la hae lona ka le tlohella libatana tsa naha.”
4Baedomo ba ka 'na ba re: “Leha re ripitliloe, re tla boela re tsosa lithako tsa rōna,” empa Morena oa mabōtho o bua tjena: “Ba tla haha, empa 'na ke tla heletsa. Ba tla bitsoa Naha e Khopo, ba bitsoe sechaba seo Morena a se halefelang kamehla.”
5Tsena le tla li bona ka mahlo a lōna, ebe le re: “Morena o moholo; boholo ba hae bo tsejoa le ka nq'ane ho meeli ea naha ea Iseraele!”
Morena o khalemela baprista
6“Mora o hlompha ntat'ae, mohlanka le eena o hlompha mong'a hae. Haeba 'na ke le ntat'a lōna, ha le ntlhomphe ke'ng? Haeba 'na ke le mong'a lōna, ha le ntšabe ke'ng?” ho rialo Morena oa mabōtho. “Lōna baprista, ke lōna ba tlontlollang lebitso la ka.
“Empa lea mpotsa, le re: ‘Re tlontlolotse lebitso la hao joang?’
7“Aletareng ea ka le nyehela ka lijo tse silafetseng.
“Empa lea mpotsa, le re: ‘Re u hlompholotse joang?’
“Ke ha le re tafole ea Morena ea eiseha. 8Na ke hantle ha le nyehela ka phoofolo e foufetseng, le nketsetsa sehlabelo ka phoofolo e hlotsang kapa e kulang? Lekang feela le nyehelle 'musi oa lōna ka phoofolo e joalo? Na hoo ho ka mo thabisa? Na le ka amoheleha ho eena?” ho rialo Morena oa mabōtho.
9“Joale lōna le re: ‘A re ipiletseng ho Morena hore a re hauhele.’ Na a ka le amohela ka linyehlo tse joalo?” ho rialo Morena oa mabōtho.
10“Hoja e mong oa lōna a k'a mp'a koala mamati a Tempele, le tle le se ke la hotetsa mello e se nang thuso holim'a aletare ea ka! Ha kea le thabela ho hang!” ho rialo Morena oa mabōtho. “Le nyehelo e tsoang matsohong a lōna ha nka ke ka e amohela. 11Ho tloha bochabela ho isa bophirimela, lebitso la ka le tla ba leholo har'a lichaba. Libakeng tsohle ke tla nyehelloa ka sehlabelo sa mokubetso, le sa linyehelo tse hloekileng, hobane lebitso la ka le tla ba leholo har'a lichaba,” ho rialo Morena oa mabōtho.
12“Empa lōna le ntlontlolla ka ho bua ka tafole ea Morena, le re: ‘E silafetse!’ Le ka lijo tsa eona le re: ‘Lia nyeliseha!’ 13Le bile le re: ‘Ke ntho e tenang hakaakang!’ 'me le e soenyetsa linko,” ho rialo Morena oa mabōtho.
“Ha le tlisa phoofolo e utsoitsoeng, kapa e hlotsang, kapa e kulang, 'me le 'nyehella ka eona, na nka e amohela matsohong a lōna?” ho rialo Morena. 14“Ho malimabe mothetsi eo ereng ha a e-na le phoofolo e tona mohlapeng oa hae, e ka amohelehang, a ikane hore o tla nyehela ka eona, empa ebe o etsetsa Morena sehlabelo ka e nang le sepha! Etsoe 'na ke khosi e kholo,” ho rialo Morena oa mabōtho, “ 'me ke lokela ho hlomphuoa har'a lichaba.
