MATHEU 23

₁Eaba Jesu o bua le matšoele le barutuoa ba hae, ₂o re: “Litsebi tsa Molao le Bafarisi ba lutse setulong sa Moshe. ₃Ka baka leo, phethang, le hlokomele tsohle tseo ba le bolellang tsona, empa le se ke la ba etsisa, hobane ba bua feela, empa ba sa etse. ₄Ba tlama mejaro e boima, ba e bee holim'a mahetla a batho, empa bona, ka bobona, ha ba utloisise ho e thetsa le ka monoana.

₅“Liketso tsa bona tsohle ba li etsa hore ba bonoe ke batho. Ba habōlla mekotlana ea Mangolo a halalelang eo ba e roetseng, ba lelefatsa letjellane tsa likobo tsa bona, ₆ba rata litulo tse kapele meketeng, le litulo tse hlomphehang matlung a thapelo, ₇le ho lumelisoa mabaleng a metse, le ho bitsoa ‘Moruti’ ke batho.

₈“Empa lōna le se ke la bitsoa ‘Moruti,’hobane le na le Moruti a le mong, 'me bohle le bana ba motho. ₉Mona lefatšeng le se ke la bitsa motho ‘Ntat'a lōna,’ hoba le na le Ntate a le mong, leholimong. ₁₀Le se ke la bitsoa ‘Batsamaisi,’ hobane le na le Motsamaisi a le mong, e leng Kreste. ₁₁E moholo ho lōna e tla ba mosebeletsi oa lōna. ₁₂Ea iphahamisang o tla kokobetsoa, 'me ea ikokobetsang o tla phahamisoa.

₁₃“Le malimabe lōna Litsebi tsa Molao le Bafarisi, baikaketsi ting! Le koalla batho 'Muso oa maholimo, empa lōna ka bolōna le sa kene, 'me ha le lumelle le ba kenang ho kena. ₁₄Le malimabe lōna Litsebi tsa Molao le Bafarisi, baikaketsi ting! Le hapa matlo a bahlolohali, le etsa lithapelo tse telele ka boikaketsi; ka baka lena le tla ahlōloa.

₁₅“Le malimabe lōna Litsebi tsa Molao le Bafarisi, baikaketsi ting! Le chalaka le maoatle le lefatše ho sokolla motho a le mong, 'me ha a sokoloha le mo etsa ngoana oa lihele ho feta lōna habeli.

₁₆“Le malimabe lōna batsamaisi ba foufetseng, ba reng: ‘Ha motho a hlapanya ka Tempele, tlhapanyo eo hase letho, empa ha a hlapanya ka khauta ea Tempele, o tlangoa ke tlhapanyo eo.’ ₁₇Lithoto ting le lifofu ting! Ho hoholo ke hofe: Ke khauta kapa Tempele e halaletsang khauta eo? ₁₈Hape le re: ‘Ha motho a hlapanya ka aletare tlhapanyo eo hase letho, empa ha a hlapanya ka mpho e aletareng, o tlangoa ke tlhapanyo eo.’ ₁₉Lifofu ting! Ho hoholo ke hofe: Ke mpho kapa aletare e halaletsang mpho eo? ₂₀Ka baka leo, ea hlapanyang ka aletare, o hlapanya ka aletare eo le ka tsohle tse ka ho eona; ₂₁ea hlapanyang ka Tempele o hlapanya ka eona le ka ea ahileng ho eona, ₂₂'me ea hlapanyang ka leholimo o hlapanya ka terone ea Molimo, le ka ea lutseng holim'a eona.

₂₃“Le malimabe lōna Litsebi tsa Molao le Bafarisi, baikaketsi ting! Le ntša karolo ea leshome ea koena, tenane le sepaile, feela le tlohetse lintho tsa bohlokoa tsa Molao: Toka, mohau le botšepehi. Le ne le tšoanela ho etsa tsena, feela le sa lebale tseo. ₂₄Batsamaisi ting ba lifofu, ba okolang monoang, empa ba metseletse kamele!

₂₅“Le malimabe lōna Litsebi tsa Molao le Bafarisi, baikaketsi ting! Le hloekisa bokantle ba mohope le sejana, empa kahare li tletse tsa bosholu le ho hloka boitšoaro. ₂₆Sefofu tooe sa Mofarisi! Qala ka ho hloekisa bokahare ba mohope e le hore bokantle ba oona le bona bo tle bo hloeke.

₂₇“Le malimabe lōna Litsebi tsa Molao le Bafarisi, baikaketsi ting! Le joaloka mabitla a koetlisitsoeng, a talimehang a khahleha kantle, empa kahare a tletse masapo a bafu le libolu tsohle. ₂₈Le lōna le joalo: kantle le talimeha le lokile, athe kahare le tletse boikaketsi le bokhopo.

₂₉“Le malimabe lōna Litsebi tsa Molao le Bafarisi, baikaketsi ting! Le hahela baporofeta mabitla; le khabisa liemahale tsa mabitla a ba lokileng, ₃₀'me le re: ‘Hoja ebe re phetse mehleng ea bontat'a rōna, re ka be re sa ka ra ba le kabelo le bona polaong ea baporofeta.’ ₃₁Ka baka leo, lea ipaka hore le bara ba babolai ba baporofeta. ₃₂E, qetelang seo bontat'a lōna ba se qalileng!

₃₃“Linōha ting! Malinyane a marabe! Kahlōlo ea lihele le tla e phonyoha joang? ₃₄Ka baka leo, ke le rōmela baporofeta, bahlalefi le Litsebi tsa Molao. Ba bang ba bona le tla ba bolaea, le ba thakhise, 'me ba bang ba bona le tla ba shapela matlung a lōna a thapelo, le ba phalalise le metse eohle; ₃₅hore mali 'ohle a ba lokileng a tšolotsoeng lefatšeng a botsoe ho lōna ho qala ka mali a Abele ea lokileng, ho ea fihla ho a Sakariea, mor'a Barakiase, eo le neng le 'molaele pakeng tsa sehalalelo le aletare. ₃₆Ruri kea le bolella hore tsena tsohle li tla botsoa ho molōko ona.

₃₇“Jerusalema! Jerusalema! Uena ea bolaeang baporofeta, ea tlepetsang ka majoe ba rōmetsoeng ho uena, ke hakae ke lakalitseng ho phutha bana ba hao, joalokaha khōhō e alama litsuonyana tsa eona, empa ua hana! ₃₈Bonang, ntlo ea lōna e tla sala e le lithako. ₃₉Kea u bolella hore ho tloha joale ha le sa tla mpona ho fihlela le re: ‘Ho bokoe ea tlang ka lebitso la Morena!’ ”