MATHEU 25

₁“Mohlang oo 'Muso oa maholimo o tla tšoana le baroetsana ba leshome, ba ileng ba nka mabone a bona, eaba ba tsoa ho ea khahlanyetsa monyali. ₂Ba bahlano ba bona e ne e le lithoto, ba bahlano e le ba bohlale. ₃Lithoto tsa nka mabone a tsona, empa tsa se ke tsa nka ole; ₄athe ba bohlale ba ile ba nka ole ka lipitsana le mabone a bona. ₅Ka baka la ho lieha ha monyali, bohle ba thibasela, ba robala.

₆“Joale har'a mp'a bosiu ha hlajoa mokhosi o reng: ‘Monyali ke eo! Tsoang, le mo khahlanyetse!’

₇“Eaba moo baroetsana bao bohle ba tsohang, ba lokisa mabone a bona. ₈Lithoto tsa re ho ba bohlale: ‘Re qhatsetseng ole ea lōna, kahobane mabone a rōna aa tima.’

₉“Ba bohlale ba araba, ba re: ‘Che, e ke ke ea lekana rōna le lōna; le ka mpa la ea ho barekisi, la ithekela.’

₁₀“Eare ba sa il'o ithekela, monyali a fihla; ba itokisitseng ba kena le eena moketeng, 'me ha koaloa monyako.

₁₁“Kamorao ha fihla baroetsana ba neng ba setse, ba re: ‘Monghali, Monghali, re bulele!’

₁₂“A ba araba, a re: ‘Ruri kea le bolella, ha ke le tsebe.’

₁₃“Ha ho le joalo falimehang, kahobane ha le tsebe letsatsi leha e le hora.

₁₄“Ho tla ba joalokaha motho ea neng a etela naheng e hōle a ile a bitsa bahlanka ba hae, a re ba sale le maruo a hae. ₁₅A nea e mong chelete e litalenta li hlano, e mong e litalenta li peli, e mong eena e le 'ngoe, e mong le e mong ho ea ka matla a hae, a nt'o tsamaea. Hang-hang ₁₆ea amohetseng litalenta tse hlano a phakisa a hoeba ka tsona, a etsa phaello ea tse hlano. ₁₇Ka mokhoa o joalo ea amohetseng tse peli a etsa phaello ea tse peli. ₁₈Empa ea amohetseng e le 'ngoe a ea cheka fatše, a pata chelete ea mong'a hae.

₁₉“Eare kamora' nako e telele, mong'a bahlanka bao a tla, 'me a hlahlobisana boemo ba tšebetso le bona. ₂₀Ea neng a amohetse litalenta tse hlano a atamela, a tlisa litalenta tse ling tse hlano, a re: ‘Monghali, u ne u ntšietse litalenta tse hlano: bona, ke entse phaello ea litalenta tse ling tse hlano.’

₂₁“Mong'a hae a re ho eena: ‘Ke hantle, mohlanka ea khabane, ea tšepahalang; u tšepahetse linthong tse seng kae, ke tla u etsa molisa oa tse ngata. Kena, u thabe le mong'a hao!’

₂₂“Ea neng a amohetse litalenta tse peli le eena a atamela, a re: ‘Monghali, u ntšietse litalenta tse peli: bona, ke entse phaello ea litalenta tse ling tse peli.’

₂₃“Mong'a hae a re ho eena: ‘Ke hantle, mohlanka ea khabane, ea tšepahalang; u tšepahetse linthong tse seng kae, ke tla u etsa molisa oa tse ngata. Kena, u thabe le mong'a hao!’

₂₄“Empa ea amohetseng talenta e le 'ngoe le eena a atamela, a re: ‘Monghali, ke ile ka u tseba u le motho ea thata, ea kotulang moo a sa kang a jala, ea bōkellang moo a sa kang a olōsa; ₂₅ke ne ke tšaba, ka hona ka ea pata talenta ea hao mobung: Bona, seng sa hao e ntse e le sena!’

₂₆“Mong'a hae a mo araba, a re: ‘Mohlanka ea khopo, ea botsoa, u tsebile hore ke kotula moo ke sa kang ka jala, 'me ke bōkella moo ke sa kang ka olōsa. ₂₇U ka be u ile ua isa chelete ea ka bankeng, etlere mohla ke khutlang ke e amohele e se e e-na le phaello.

₂₈“ ‘Mo amoheng talenta eo, le e nee ea nang le litalenta tse leshome, ₂₉hobane mang le mang ea nang le letho o tla neoa, 'me o tla ngatafalloa; athe ea se nang letho, o tla amohuoa le seo a nang le sona. ₃₀Mohlanka enoa ea se nang thuso, mo lahleleng kantle lefifing, moo ho tla ba le lillo le litsikitlano tsa meno!’

₃₁“Mohla Mor'a Motho a tlang ka tlōtla ea hae, a e-na le mangeloi 'ohle, o tla lula teroneng ea hae ea botlotlehi. ₃₂Lichaba tsohle li tla phuthehela pel'a hae, 'me o tla khetha ba bang ho ba bang, joalokaha molisa a khetha linku ho lipoli; ₃₃o tla bea linku ka letsohong la hae le letona, lipoli ka ho le letšehali.

₃₄“Joale Khosi e tla re ho ba ka ho le letona: ‘Tloong, lōna ba hlohonolofalitsoeng ke Ntate, le rue 'Muso oo le o lokiselitsoeng haesale lefatše le theoa, ₃₅hobane ke ne ke lapile, la mpha lijo; ke nyoriloe, la mpha ka noa; ke le moeti, la nkamohela; ₃₆ke hlobotse, la nkapesa; ke kula, la ntlhoela; ke le chankaneng, la nchakela.’

₃₇“Ke moo ba lokileng ba tla mo araba, ba re: ‘Morena, ke neng re ileng ra u bona u lapile, eaba rea u fepa; kapa u nyoriloe, ra u fa ua noa? ₃₈Ke neng re ileng ra u bona u le moeti, ra u amohela; kapa u hlobotse, ra u apesa? ₃₉Ke neng re ileng ra u bona u kula kapa u le chankaneng, ra u chakela?’

₄₀“Khosi e tla ba araba, e re: ‘Ruri kea le bolella, seo le se etselitseng e mong oa bao ba banyenyane ho bana beso, le se etselitse 'na.’

₄₁“Joale o tla re ho ba ka ho le letšehali: ‘Tlohang ho 'na, lōna ba rōhakiloeng, le ee mollong o sa feleng, o lokiselitsoeng Diabolosi le mangeloi a hae, ₄₂hobane ke ne ke lapile, la se ke la mpha lijo; ke nyoriloe, la se ke la mpha ka noa; ₄₃ke le moeti, la se ke la nkamohela; ke hlobotse, la se ke la nkapesa; ke kula, ke le chankaneng, la se ke la ntlhoela.’

₄₄“Ke moo ba tla mo araba le bona, ba re: ‘Morena, ke neng re ileng ra u bona u lapile, u nyoriloe, u le moeti, u hlobotse, u kula, kapa u le chankaneng, eaba ha re u etsetse letho?’

₄₅“O tla ba araba, a re: ‘Ruri kea le bolella, seo le sa kang la se etsetsa e mong oa ba banyenyane bana, le 'na ha lea nketsetsa sona.’

₄₆“Joale bana ba tla ea tlhōkōfatsong e sa feleng, ha ba lokileng ba e-ea bophelong bo sa feleng.”