Pheletso ea ba hatellang mafutsana
1Ho malimabe ba rerang bolotsana,
ba nahanang bokhopo
ba le liphateng tsa bona!
Ha bosiu bo e-sa
baa bo phethahatsa,
hobane ba na le matla
a ho etsa joalo.
2Ba tsoela masimo a batho pelo,
ba a hape,
ba hōnōhele matlo a batho,
ba inkele 'ona;
ba hatella motho
le ba lelapa la hae,
ba mo hatelle, ba je lefa la hae.
3Ka baka leo, Morena o bua tjena:
“Ke ntse ke rera koluoa,
ke e rerela chaba sena,
koluoa eo se ke keng
sa ba sa e phema.
Ha se ka ke sa tsamaea,
sa tsamaea ka boikakaso,
hobane e tla be e le nako,
nako ea tlokotsi.
4Mohl'a tsatsi leo ba tla le soma,
ba le binele koli-ea-malla,
ba re: ‘Re fela re falalitsoe,
Morena o re amohile naha ea rōna,
a e abela bathōpi ba rōna.’ ”
5Kahoo kahar'a phutheho,
phutheho ea Morena,
ha ho na ho ba le motho le ea mong
ea tla le arolela naha ka lōtho.
Baporofeta ba bohata
6Baporofeta ba bohata ba re ho 'na:
“Se ke ua re porofetela,
se ke ua porofeta lintho tsena;
Molimo ha a ka ke
a re hlabisa lihlong.”
7Na ho ka botsoa ntlo ea Jakobo,
ha thoe: “Ebe Morena
o feletsoe ke mamello?
Na tse tjee li etsoa ke eena?”
“Na polelo tsa ka
ha li tlise molemo,
li o tlisetsa ba etsang ho loka?
8Empa lōna chaba sa ka
le iphetotse sera!
Motho oa khotso
ha a feta ka tsela,
a iphetela, a sa nahane tsa ntoa,
le mo amoha kobo a e apere.
9Basali ba chaba sa ka
lea ba leleka,
le ba leleka malapeng,
malapeng a bona a matle;
le amoha bana ba bona tlōtla ea ka,
le ba amoha eona ho-ea-ho-ile.
10Emang, le tsamaee, le tlohe mona!
Baka sena hase sa lona
sa ho phomola,
ka baka la hobane se silafetse,
se senyehile,
se ke ke sa hlola se loka.
11Haeba ea leshano,
ea thetsang, a ka re:
‘Ke porofeta hore veine ea lōna
e tla kopotsa,
joala ba lōna
e be bo bongata haholo,’
eo e ka ba eena
moporofeta oa chaba sena!”
Baiseraele ba tšepisoa topollo
12“Ruri ke tla le phutha kaofela,
ke phuthe lōna bohle
ba ntlo ea Jakobo;
ruri masalla a Baiseraele
ke tla a phutha,
ke a khōbōkanye
sa nku li kena sakeng,
ke a phuthe
sa mohlape o le makhulong,
e be boieane
bo phetheselang ba batho.
13Pula-maliboho e tla ba etella pele;
ba tla roba mekoallo ea khoro,
ba itsamaele.
Khosi ea bona
e tla tsoa pele ho bohle,
ka sehloohong sa bona
Morena a itlhomme.”
