MAREKA 13

₁Ha Jesu a e-tsoa ka Tempeleng, e mong oa barutuoa ba hae a re ho eena: “Moruti, ak'u bone: ke majoe a makaakang le mehaho e mekaakang!”

₂Jesu a mo araba, a re: “Ua e bona mehaho e meholo ee? Ha ho na lejoe le tla sala holim'a lejoe le leng le sa heletsoa.”

₃Eare ha a ntse a lutse Thabeng ea Mehloaare, malebana le Tempele, Petrose, le Jakobo, le Johanne, le Andrease ba 'motsa boinotšing, ba re: ₄“Ak'u re bolelle: Lintho tseo li tla etsahala neng? Pontšo e tla ba efe ha tseo tsohle li phethahala?”

₅Jesu a qala ho re ho bona: “Hlokomelang, le se ke la tšoha le khelosoa ke motho ofe kapa ofe. ₆Ba bangata ba tla tla ka lebitso la ka, ba re: ‘Ke 'na,’ 'me ba tla khelosa ba bangata. ₇Ha le utloa mekhosi ea lintoa le malume a lintoa, le se ke la tšoha. Hona eka khona ho etsahale, empa ha e e-s'o be bofelo. ₈Lichaba li tla tsohelana matla, le mebuso e futuhelane; ho tla ba le litšisinyeho tsa lefatše libakeng tse ngata, le litlala tsa sekoboto. Tsena ke qaleho ea litlokotsi.

₉“Ha e le lōna, hlokomelang! Ba tla neelana ka lōna makhotleng, le tla shapuoa matlung a thapelo, le emisoe kapel'a babusisi le mahosi ka baka la ka, e be bopaki ho bona. ₁₀Eka khona molaetsa o molemo o phatlalatsoe ho lichaba tsohle pele. ₁₁Ha ba le tšoara, ba neelana ka lōna, le se ke la itšoenya e sa le pele hore na le tla re'ng, le mpe le bolele seo le se neoang ka nako eo, hobane hase lōna le tla bua, empa ke Moea o Halalelang.

₁₂“Motho o tla èkèloa lefu ke ngoan'abo, le ngoana ke ntat'ae, 'me bana ba tla fetohela batsoali, ba ba bolaee. ₁₃Le tla hlouoa ke bohle ka baka la lebitso la ka, empa ea tla tiisetsa ho isa qetellong, eena o tla pholosoa.”

₁₄“Ha le bona Manyala a Tšenyeho a eme moo a sa lokelang, 'mali a utloisise se boleloang! Mohlang oo ba leng Judea ba balehele lithabeng; ₁₅motho ea sehlōhlōlōng sa ntlo a se ke a ba a theoha leha e le ho kena ho ntša ho hong ka tlung ea hae; ₁₆le motho ea masimong a se ke a ba a khutlela hae ho ea lata seaparo sa hae. ₁₇Ho tla ba malimabe baimana le batsoetse ba matsatsi ao! ₁₈Rapelang hore tseo li se ke tsa etsahala mariha, ₁₉hobane matsatsing ao ho tla ba le litlokotsi tseo ho e-s'ong ho be teng tse joalo, ho tloha tšimolohong ea lintho tseo Molimo a li bōpileng ho fihlela joale, 'me ha li sa tla ba teng hape. ₂₀Hojane Morena ha a tl'o khutsufatsa nako eo, ho ne ho se motho le ea mong ea neng a tla pholoha, empa o khutsufalitse nako eo ka baka la bakhethoa bao a ba khethileng.

₂₁“Mohlang oo haeba motho a ka re ho lōna: ‘Bona, Kreste ke enoa! Bona, Kreste ke eo!’ le se ke la ba la lumela. ₂₂Bo-Kreste ba bohata le baporofeta ba bohata ba tla hlaha, 'me ba tla etsa lipontšo le limakatso, hore, haeba ho ka etsahala, ba tle ba khelose le bona bakhethoa. ₂₃Empa lōna, hlokomelang: Ke le boleletse tsohle e sa le pele.”

₂₆“Joale ba tla bona Mor'a Motho a e-tla a le marung, ka matla a maholo le ka tlōtla. ₂₇O tla rōma mangeloi a hae, 'me a tla phutha bakhethoa ba hae ba e-tsoa liqoleng tse 'ne tsa lefatše, ba e-tsoa pheletsong ea lefatše, ho isa pheletsong ea leholimo.

₂₈“Ithuteng ka setšoantšo sa sefate sa feiee. Ha lekala la sona le nolofala, le fuputsa mahlaku, le ee le tsebe hore lehlabula le haufi. ₂₉Ka mokhoa o joalo, le lōna ha le bona lintho tsena li etsahala, tsebang hore o haufi, o manyako. ₃₀Kannete kea le bolella, molōko ona o ke ke oa fela tseo tsohle li e-s'o etsahale. ₃₁Leholimo le lefatše li tla fela, empa mantsoe a ka ha a ka ke a fela.

₃₂“Empa letsatsi leo kapa hora eo, ha ho ea li tsebang; esita le mangeloi a leholimong kapa Mora ha a tsebe haese Ntate. ₃₃Hlokomelang, le falimehe, hobane ha le tsebe hore na nako eo e tla tla neneng. ₃₄Ho joalokaha motho a eta, a siea ntlo ea hae, a nea bahlanka ba hae matla, e mong le e mong mosebetsi oa hae, a ba a laela molebeli oa monyako ho lebela.

₃₅“Ha ho le joalo falimehang, hobane ha le tsebe hore na mong'a ntlo o tla tla neneng, mantsiboea kapa ka seroko, ka lialla kapa kameso, ₃₆esere mohlomong a le tsometsa, a le fumana le robetse. ₃₇Joale seo ke le bolellang sona, ke se bolella bohle: Falimehang!”