MAREKA 7

₁Bafarisi le Litsebi tse ling tsa Molao tse tsoang Jerusalema ba phuthehela ho Jesu. ₂Ba bona barutuoa ba bang ba hae ba e-ja lijo ka matsoho a sa hloekang, ke ho re a sa hatleloang.

₃Ho latela moetlo oa baholo-holo, Bafarisi le Bajuda bohle ba ne ba sa je ba sa hatlela ka hloko, ₄'me leha ba e-tsoa lebaleng la motse, ba ne ba sa je ba sa itlhatsoa; ho bile ho e-na le meetlo e meng e mengata eo ba e amohetseng ho e bōlōka, e kang ho hlatsoa mehope, lijana le lipitsa tsa lethose.

₅Bafarisi le Litsebi tsa Molao ba botsa Jesu, ba re: “Ke ka baka la'ng ha barutuoa ba hao ba sa hlomphe moetlo oa baholo-holo, ba e-ja bohobe ka matsoho a sa hloekang?”

₆A re ho bona: “Esaea o porofetile hantle ka lōna baikaketsi ting, joalokaha ho ngotsoe, ho thoe:

₉A boela a re ho bona: “Le tseba hantle ho beela taelo ea Molimo kathōko, e le hore le bōlōke meetlo ea lōna! ₁₀Moshe o itse: ‘Hlompha ntat'ao le 'm'ao,’ a ba a re: ‘Ea rōhakang ntat'ae kapa 'm'ae a bolaoe.’ ₁₁Empa lōna le re: ‘Ha motho a e-na le seo a ka thusang ntat'ae kapa 'm'ae ka sona, feela a re: Hona ke korobane, ke ho re, 'mpho ho Molimo,’ ₁₂ha le sa mo lumella ho etsetsa ntat'ae kapa 'm'ae letho. ₁₃Le fetola lentsoe la Molimo lefeela ka moetlo oa lōna oo le o neeletsanang, 'me le etsa tse ngata tse joalo.”

₁₄A boela a bitsetsa letšoele ho eena, a re ho lona: “'Mameleng bohle, 'me le utloisise! ₁₅Ha ho letho le kenang ka ho motho, le e-tsoa kantle ho eena, le ka mo silafatsang, empa tse tsoang ka ho eena ke tsona tse mo silafatsang. ₁₆Haeba motho a e-na le litsebe ho utloa, a utloe!”

₁₇Eare ha a tloha har'a letšoele, a kena ka tlung; barutuoa ba hae ba 'motsa tsa setšoantšo seo. ₁₈A re ho bona: “Na le lōna le hloka kutloisiso? Na ha le elelloe hore ntho e 'ngoe le e 'ngoe e tsoang kantle ha e kena ka ho motho e sitoa ho mo silafatsa, ₁₉hobane ha e kene ka pelong ea hae, empa e kena ka maleng, e nt'o tsoela mohlabeng?” Ka ho rialo a bolela ho hloeka ha lijo tsohle.

₂₀A re: “Se tsoang ka ho motho ke sona se mo silafatsang, ₂₁hobane ke kahare, lipelong tsa batho, moo ho tsoang mehopolo e mebe: bohlola, bosholu, lipolao, ₂₂le bofebe, meharo, bokhopo, thetso, mekhoa e hlabisang lihlong, mōna, ketseletso, boikhantšo, le bothoto. ₂₃Lintho tsena tsohle tse mpe li tsoa kahare, 'me li silafatsa motho.”

₂₄Ho tloha moo, Jesu a ea sebakeng sa Tire. A kena ka tlung, 'me a lakatsa hore ho se be ea ka tsebang, empa a sitoa ho pateha. ₂₅Hang-hang mosali eo moralinyana oa hae a neng a e-na le moea o litšila, a mo utloela, 'me a ea, a fihla, a itihela maotong a hae. ₂₆Mosali eo e ne e le Mogerike, oa mofuta oa Basiria ba Fenisia; a mo kōpa hore a leleke modemona ho morali oa hae.

₂₇Jesu a re ho eena: “Lesa bana ba khōre pele, hobane hase hantle hore ho nkoe bohobe ba bana, bo akhelloe lintjanyana.”

₂₈A araba, a re ho eena: “Morena, le tsona lintjanyana tse tlas'a tafole li ja makumane a oang ho bana.”

₂₉A re ho eena: “Ka baka la polelo ena, ikele, modemona o tsoile ho morali oa hao.”

₃₀A ea hae, a fumana ngoana a robetse liphateng, 'me modemona o tsoile.

₃₁Jesu ha a khutla sebakeng sa Tire, a boela a ea letšeng la Galelea ka tsela ea Sidone, ka ho haola naha ea Dekapolese. ₃₂Ba mo tlisetsa monna ea tsebetutu, ea lehoelea, 'me ba mo rapela hore a 'mee letsoho.

₃₃Jesu a mo tlosa har'a letšoele, a mo nkela thōkoana, 'me a kenya menoana ea hae ka litsebeng tsa hae; a tšoela mathe, a ama leleme la hae. ₃₄A lelalla leholimong, a feheloa, a re ho eena: “Efatha!” e leng ho re: “Thiboloha!” ₃₅Hang-hang litsebe tsa hae tsa thiboloha, leleme la hae la raroloha, 'me a bua hantle.

₃₆Jesu a ba laea ho se bolelle motho, empa leha a ba laile, ba tsoela pele ho phatlalatsa taba eo. ₃₇Ba hlolloa haholo, 'me ba re: “Tsohle o li entse hantle; o etsa hore bo-tsebetutu ba utloe, limumu li bue!”