Ho oa ha Ninife
1Sera sea u futuhela, uena Ninife,
bea balebeli marakong a tšireletso,
bea lihloèla le litseleng tsa hao;
itlame letheka, u hlomelle ntoa,
u khōbōkanye mabōtho 'ohle a hao!
2Morena o tla tsosolosa
tlōtla ea Jakobo,
a e tsosolose le tlōtla ea Iseraele,
le hoja basenyi ba mo hlōbōlisitse,
ba hataketse makala a morara oa hae.
3Thèbè tsa bahlabani ba hae
ke tse khubelu,
aparo tsa bona le tsona
ke tse khubelu.
Kariki tsa bona tsa ntoa lia tsèkèma,
thekōng ea ntoa
li tsèkèma malakabe;
ka marumo bahlabani baa hlakisa.
4Kariki tsa bona
li phunyeletsa har'a literata,
li etsa menyakoe mabaleng a motse;
li phatsima
sa lirumōla li phatsima,
li chalametsa
sa lehalima le chalametsa.
5Ninife e hlabela
bahlabani ba eona mokhosi,
empa tseleng ea bona
baa khōthōmetseha,
ba khōrōha
ba leba lerakong la motse,
ba khōrōha
ba se ba teteantse lithèbè.
6Marako a thibelang nōka
aa phatloha,
ntlo ea bokhosi eona ea heleha.
7Ninife ea hlōbōlisoa, ea thōpuoa,
makhabunyane aa Ninife aa lla,
a lla sa maebana-khoroana,
a lla a nts'a ikotla lifuba khafetsa.
8Ninife e ka letamo le phatlohile.
Mokhosi ke oo: “Sekoele! Sekoele!”
Empa ha ho le ea mong
ea khutlang.
9Lobelang silefera,
le lobele le khauta!
Tlotlo le oele makhoabane,
ke nyakafatane!
10Ninife e futuhetsoe,
ea lobeloa, ea timetsoa!
Pelo li saretsoe,
mangoele aa tšèrèma,
matla a felile,
fahleho tsohle li pulufetse.
11Ebe joale letsaba la tau le hokae?
Selao sa litaoana sona se kae?
Moo tau e neng e fepela teng
ke kae?
Moo taoana li neng li ipōthela,
li ipōthela teng, li se na tšabo?
12Tau e n'e harōla, e fepa litaoana,
liphofu e li harōlela litauhali;
matsaba a eona e a tlatsa liphofu,
e a tlatsa ka linama
tseo e li harōtseng.
13“Uena Ninife kea u loantša,”
ho rialo Morena oa mabōtho.
“Ke tla chesa kariki tsa hao tsa ntoa,
bahlabani ba hao
ba bolaoe ka sabole,
ke u amohe tsohle
tseo u li hapileng,
bonatla ba hao lefatšeng bo fele,
maqosa a hao
a se hlole a bo bolelisa.”
