1Hoba lerako le hahoe, ka kenya mamati, ha khethoa balebeli ba menyako, le libini, le Balevi. 2Eaba ke bea Hanani, ngoan'eso, le Hananiea, mookameli oa qhobosheane ea khosi, hore e be baokameli ba Jerusalema. Hananiea e ne e le monna ea tšepahalang, ea tšabang Molimo ho feta batho ba bangata. 3Eaba ke re ho bona: “Menyako ea Jerusalema e se ke ea ba ea buloa ho fihlela ha letsatsi le e-ba hloohong tsa mengala. Ha balebeli ba ntse ba le mosebetsing, menyako ea motse e koaloe, ho be ho beoe mekoallo. Har'a baahi ba Jerusalema le khethe balebeli; ba bang ba lebele libaka tse itseng, ba bang ba lebele kapele ho matlo a bona.”
Lenane la bathōpuoa ba ileng ba khutla
4Motse o ne o le moholo, o le batsi, empa batho ba ne ba le 'maloana, le matlo a e-s'o hahoe. 5Molimo oa ka a ntšusumetsa hore ke khōbōkanye mahosana, le babusi, le sechaba, e le hore ba tle ba baloe ka ho ea ka melōko ea bona. Ka fumana buka ea lenane la melōko, moo ho neng ho ngotsoe mabitso a bathōpuoa ba ileng ba khutla pele. Ho eona ho ne ho ngotsoe tsena:
6“Bana ke baahi ba naha ea Juda, bao Nebukadenesare, khosi ea Babilona, a neng a ile a ba thōpa, a ba isa Babilona. Joale ba boela ba khutlela Jerusalema, le naheng ea Juda; motho ka mong a khutlela motseng oa habo. 7Ba ne ba tle le Serubabele, le Jeshua, le Nehemia, le Asariea, le Raamiea, le Nahamani, le Moredekai, le Bileshane, le Miseperete, le Bigifai, le Nehume, le Baana.
“Palo ea banna ba sechaba sa Iseraele ke ena: 8Ba lelapa la Paroshe e ne e le likete tse peli le lekholo, le mashome a supileng a metso e 'meli; 9ba lelapa la Shefatiea e ne e le makholo a mararo le mashome a supileng a metso e 'meli; 10ba lelapa la Arake e le makholo a tšeletseng, le mashome a mahlano a metso e 'meli; 11ba lelapa la Pahate-Moabe, e leng litlōhōlō tsa Jeshua le Joabe, e le likete tse peli le makholo a robeli, le leshome le metso e robeli; 12ba lelapa la Elame e le sekete le makholo a mabeli, le mashome a mahlano a metso e mene; 13ba lelapa la Satu e le makholo a robeli le mashome a mane a metso e mehlano; 14ba lelapa la Sakai e le makholo a supileng le mashome a tšeletseng; 15ba lelapa la Binui e le makholo a tšeletseng le mashome a mane a metso e robeli; 16ba lelapa la Bebai e le makholo a tšeletseng le mashome a mabeli a metso e robeli; 17ba lelapa la Asegade e le likete tse peli le makholo a mararo le mashome a mabeli a metso e 'meli; 18ba lelapa la Adonikame e le makholo a tšeletseng le mashome a tšeletseng a metso e supileng; 19ba lelapa la Bigifai e le likete tse peli le mashome a tšeletseng a metso e supileng; 20ba lelapa la Adine e le makholo a tšeletseng le mashome a mahlano a metso e mehlano; 21ba lelapa la Atere, ke ho re la Hesekiea, e le mashome a robong a metso e robeli; 22ba lelapa la Hashume e le makholo a mararo le mashome a mabeli a metso e robeli; 23ba lelapa la Besai e le makholo a mararo le mashome a mabeli a metso e mene; 24ba lelapa la Harife e le lekholo le leshome le metso e 'meli; 25ba lelapa la Gibeone e le mashome a robong a metso e mehlano.
26“Ba tsoang Betlelehema le Netofa e ne e le lekholo le mashome a robeli a metso e robeli; 27ba tsoang Anatote e le lekholo le mashome a mabeli a metso e robeli; 28ba tsoang Bete-Asemafete e le mashome a mane a metso e 'meli; 29ba tsoang Kiriate-Jearime le Kefira, le Beerote e le makholo a supileng le mashome a mane a metso e meraro; 30ba tsoang Rama le Geba e le makholo a tšeletseng le mashome a mabeli a motso o mong; 31ba tsoang Mikemase e le lekholo le mashome a mabeli a metso e 'meli; 32ba tsoang Bethele le ba tsoang Ai e le lekholo le mashome a mabeli a metso e meraro; 33ba tsoang Nebo e 'ngoe e le mashome a mahlano a metso e 'meli; 34ba tsoang Elame e 'ngoe e le sekete le makholo a mabeli le mashome a mahlano a metso e mene; 35ba tsoang Harime e le makholo a mararo le mashome a mabeli; 36ba tsoang Jeriko e le makholo a mararo le mashome a mane a metso e mehlano; 37ba tsoang Lode, le Hadide, le Ono e le makholo a supileng le mashome a mabeli a motso o mong; 38ba tsoang Senaa e le likete tse tharo le makholo a robong, le mashome a mararo.
39“Baprista, e leng bara ba Jedaea, oa lelapa la Jeshua, ba ne ba le makholo a robong le mashome a supileng a metso e meraro; 40ba lelapa la Imere e le sekete le mashome a mahlano a metso e 'meli; 41ba lelapa la Pashahure e le sekete le makholo a mabeli le mashome a mane a metso e supileng; 42ba lelapa la Harime e le sekete le leshome le metso e supileng.
43“Balevi, e leng litlōhōlō tsa Jeshua, le Kademiele, ba lelōko la Hodefa, e ne e le mashome a supileng a metso e mene.
44“Libini, e leng litlōhōlō tsa Asafo, e ne e le lekholo le mashome a mane a metso e robeli.
45“Ba malapa a balebeli ba menyako, e leng litlōhōlō tsa Shalōme le litlōhōlō tsa Atere, le tsa Talamone, le tsa Akuba, le tsa Hatita, le tsa Shobai, ba ne ba le lekholo le mashome a mararo a metso e robeli.
46“Basebeletsi ba Tempele e ne e le litlōhōlō tsa Siha, le tsa Hasufa, le tsa Tabaote, 47le tsa Kerose, le tsa Sia, le tsa Padone, 48le tsa Lebana, le tsa Hagaba, le tsa Salemai, 49le tsa Hanane, le tsa Gidele, le tsa Gahere, 50le tsa Reaea, le tsa Resine, le tsa Nekoda, 51le tsa Gasame, le tsa Usa, le tsa Pasaeea, 52le tsa Besai, le tsa Mehunime, le tsa Nefusime, 53le tsa Bakabuke, le tsa Hakufa, le tsa Harehure, 54le tsa Baselote, le tsa Mehida, le tsa Haresha, 55le tsa Barakose, le tsa Sisera, le tsa Tama, 56le tsa Nesia, le tsa Hatifa.
57“Ana ke malapa a bahlanka ba Solomone, e leng litlōhōlō tsa Sotai, le tsa Soferete, le tsa Peruda, 58le tsa Jaala, le tsa Darekone, le tsa Gidele, 59le tsa Shefatiea, le tsa Hatila, le tsa Pokerete ea tsoang Sebaime, le tsa Amona.
60“Basebeletsi bohle ba Tempele, le litlōhōlō tsa bahlanka ba Solomone, ba ne ba le makholo a mararo le mashome a robong a metso e 'meli.
61“Bana bohle ke ba neng ba e-tsoa Tele-Mela, le Tele-Haresha, le Kerube, le Adone, le Imere. Empa ba ile ba sitoa ho bontša hore malapa abo bona, le lihlooho tsa bona ke Baiseraele. 62Ba lelapa la Delaea, le la Tobiea, le la Nekoda ba ne ba le makholo a tšeletseng le mashome a mane a metso e 'meli.
63“Ana ke malapa a baprista, e leng litlōhōlō tsa Habaea, le tsa Kose, le tsa Barasilai, ea neng a nyale e mong oa barali ba Barasilai oa Mogileade, 'me a b'a s'a ipitsa ka eena.
64“Bana ba ile ba batla buka ea lelōko la bona har'a tse ling tsa malōko, empa ba se ke ba e fumana; ka baka leo, ba ntšoa tšebeletsong ea boprista, hobane ho ne ho thoe ha baa hloeka. 65'Musisi oa naha a re ba se ke ba ja lijo tse halalelang ka ho fetisisa, ho fihlela moprista a ka ba botsetsa ho Morena, ka ho sebelisa majoe a Urime le Thumime.
66“Sechaba sohle ha se baloa se ile sa etsa likete tse mashome a mane a metso e 'meli le makholo a mararo le mashome a tšeletseng; 67ho sa baloe bahlanka le makhabunyane a bona, a likete tse supileng le makholo a mararo le mashome a mararo a metso e supileng. Hape ho ne ho e-na le libini tsa banna le tsa basali tse makholo a mabeli le mashome a mane a metso e mehlano.
68“Palo ea lipere tsa bona e ne e le makholo a supileng le mashome a mararo a metso e tšeletseng, limmeile li le makholo a mabeli le mashome a mane a metso e mehlano, 69likamele li le makholo a mane le mashome a mararo a metso e mehlano, le litonki tse likete tse tšeletseng le makholo a supileng le mashome a mabeli.”
70Ba bang ba lihlooho tsa malapa ba kenya letsoho mosebetsing ona ka ho fana ka limpho. 'Musisi oa naha a fana ka khauta e etsang boima ba likilo tse robeli, le likotlolo tse mashome a mahlano tsa ho sebeletsa, le liaparo tsa baprista tse makholo a mahlano le mashome a mararo. 71Ba bang ba lihlooho tsa malapa ba fana ka khauta e etsang boima ba likilo tse lekholo le mashome a tšeletseng a metso e robeli, le silefera e etsang boima ba likilo tse sekete le makholo a mabeli le mashome a mahlano, 'me tsena tsohle ba li kenya ka letlōleng, bakeng sa mosebetsi. 72Sechaba sona sa fana ka khauta e etsang boima ba likilo tse lekholo le mashome a tšeletseng a metso e robeli, le silefera e etsang boima ba likilo tse lekholo le mashome a mane, le liaparo tsa boprista tse mashome a tšeletseng a metso e supileng.
73Baprista, le Balevi, le balebeli ba menyako, le libini, le karolo e 'ngoe ea sechaba, le basebeletsi ba Tempele, le Baiseraele bohle, ba aha metseng ea bona.
Esera o balla sechaba Molao
Ha khoeli ea bosupa e thoasa, bana ba Iseraele ba ne ba se ba le metseng ea bona.
