LIPALO 1

₁Ka letsatsi la pele la khoeli ea bobeli, selemong sa bobeli bana ba Iseraele ba tlohile naheng ea Egepeta, ha Moshe a le ka Tenteng ea Morena, lehoatateng la Sinai, Morena a bua ho Moshe, a re:

₂“Balang sechaba sohle sa bana ba Iseraele ka malapa abo bona, le ka matlo a bo-ntat'a bona, ho ea ka palo ea mabitso a banna bohle. ₃Uena le Arone le bale banna bohle bao e ka bang bahlabani, ho tloha ka ba lilemo tse mashome a mabeli, ho ea holimo; le ba bale ka mabōtho a bona. ₄Morabeng o mong le o mong le nke monna a le mong ea tla le thusa, e be monna eo e leng hlooho ea lelapa labo.

₅“Ana ke mabitso a banna ba tla le thusa: Lapeng la Rubene e be Elesure mora oa Shedeure. ₆Lapeng la Simeone e be Shelomiele mora oa Surishadai. ₇Lapeng la Juda e be Naheshone mora oa Aminadabe. ₈Lapeng la Isakare e be Netanele mora oa Suare. ₉Lapeng la Sebulone e be Eliabe mora oa Helone. ₁₀Har'a bana ba Josefa: lapeng la Efraime e be Eleshama mora oa Amihude; lapeng la Manase e be Gamaleele mora oa Pedasure. ₁₁Lapeng la Benjamine e be Abidane mora oa Gidoni. ₁₂Lapeng la Dane e be Ahiesere mora oa Amishadai. ₁₃Lapeng la Ashere e be Pagiele mora oa Okerane. ₁₄Lapeng la Gade e be Eleasafo mora oa Deuele. ₁₅Lapeng la Nafthali e be Ahira mora oa Enane.”

₁₆Bana ke bona ba ileng ba khethoa har'a sechaba, e le lihlooho tsa malapa a bo-ntat'a bona, mahosana a likete-kete tsa Baiseraele.

₁₇Joale Moshe le Arone ba nka banna bana ba boletsoeng ka mabitso. ₁₈Ka letsatsi la pele la khoeli ea bobeli, ba khobōkanya sechaba sohle. Monna e mong le e mong, ho tloha ka ba lilemo tse mashome a mabeli ho ea holimo, a bolela lebitso la hae le lelōko la hae, ho ea ka morabe oa hae le lelapa la hae. ₁₉Moshe a ba bala ba le lehoatateng la Sinai, joalokaha Morena a ne a mo laetse.

₂₀Ha baloa bana ba Rubene, letsibolo la Iseraele, ho ea ka melōko ea bona, le ka malapa abo bona, le ka matlo a bo-ntat'a bona; le ho ea ka mabitso a banna bohle bao e ka bang bahlabani, ho tloha ka ba lilemo tse mashome a mabeli ho ea holimo. ₂₁Ba morabe oa Rubene ba ileng ba baloa ea e-ba likete tse mashome a mane a metso e tšeletseng le makholo a mahlano.

₂₂Ha baloa bana ba Simeone, ho ea ka melōko ea bona, le ka malapa abo bona, le ka matlo a bo-ntat'a bona; le ho ea ka mabitso a banna bohle bao e ka bang bahlabani, ho tloha ka ba lilemo tse mashome a mabeli ho ea holimo. ₂₃Ba morabe oa Simeone ba ileng ba baloa ea e-ba likete tse mashome a mahlano a metso e robong le makholo a mararo.

₂₄Ha baloa bana ba Gade, ho ea ka melōko ea bona, le ka malapa abo bona, le ka matlo a bo-ntat'a bona; le ho ea ka mabitso a banna bohle bao e ka bang bahlabani, ho tloha ka ba lilemo tse mashome a mabeli ho ea holimo. ₂₅Ba morabe oa Gade ba ileng ba baloa ea e-ba likete tse mashome a mane le metso e mehlano le makholo a tšeletseng le mashome a mahlano.

₂₆Ha baloa bana ba Juda ho ea ka melōko ea bona, le ka malapa abo bona, le ka matlo a bo-ntat'a bona; le ho ea ka mabitso a banna bohle bao e ka bang bahlabani, ho tloha ka ba lilemo tse mashome a mabeli ho ea holimo. ₂₇Ba morabe oa Juda ba ileng ba baloa ea e-ba likete tse mashome a supileng le metso e mene le makholo a tšeletseng.

₂₈Ha baloa bana ba Isakare ho ea ka melōko ea bona, le ka malapa abo bona, le ka matlo a bo-ntat'a bona; le ho ea ka mabitso a banna bohle bao e ka bang bahlabani, ho tloha ka ba lilemo tse mashome a mabeli, ho ea holimo. ₂₉Ba morabe oa Isakare ba ileng ba baloa ea e-ba likete tse mashome a mahlano le metso e mene le makholo a mane.

₃₀Ha baloa bana ba Sebulone ho ea ka melōko ea bona, le ka malapa abo bona, le ka matlo a bo-ntat'a bona; le ho ea ka mabitso a banna bohle bao e ka bang bahlabani, ho tloha ka ba lilemo tse mashome a mabeli ho ea holimo. ₃₁Ba morabe oa Sebulone ba ileng ba baloa ea e-ba likete tse mashome a mahlano le metso e supileng le makholo a mane.

₃₂Har'a bana ba Josefa ha baloa bana ba Efraime ho ea ka melōko ea bona le ka malapa abo bona, le ka matlo a bo-ntat'a bona; le ho ea ka mabitso a banna bohle bao e ka bang bahlabani, ho tloha ka ba lilemo tse mashome a mabeli ho ea holimo. ₃₃Ba morabe oa Efraime ba ileng ba baloa ea e-ba likete tse mashome a mane le makholo a mahlano.

₃₄Ha baloa bana ba Manase ho ea ka melōko ea bona, le ka malapa abo bona, le ka matlo a bo-ntat'a bona; le ho ea ka mabitso a banna bohle bao e ka bang bahlabani, ho tloha ka ba lilemo tse mashome a mabeli ho ea holimo. ₃₅Ba morabe oa Manase ba ileng ba baloa ea e-ba likete tse mashome a mararo le metso e 'meli le makholo a mabeli.

₃₆Ha baloa bana ba Benjamine ho ea ka melōko ea bona, le ka malapa abo bona, le ka matlo a bo-ntat'a bona; le ho ea ka mabitso a banna bohle bao e ka bang bahlabani, ho tloha ka ba lilemo tse mashome a mabeli ho ea holimo. ₃₇Ba morabe oa Benjamine ba ileng ba baloa ea e-ba likete tse mashome a mararo le metso e mehlano le makholo a mane.

₃₈Ha baloa bana ba Dane ho ea ka melōko ea bona, le ka malapa abo bona, le ka matlo a bo-ntat'a bona; le ho ea ka mabitso a banna bohle bao e ka bang bahlabani, ho tloha ka ba lilemo tse mashome a mabeli ho ea holimo. ₃₉Ba morabe oa Dane ba ileng ba baloa ea e-ba likete tse mashome a tšeletseng le metso e 'meli le makholo a supileng.

₄₀Ha baloa bana ba Ashere ho ea ka melōko ea bona, le ka malapa abo bona, le ka matlo a bo-ntat'a bona; le ho ea ka mabitso a banna bohle bao e ka bang bahlabani, ho tloha ka ba lilemo tse mashome a mabeli ho ea holimo. ₄₁Ba morabe oa Ashere ba ileng ba baloa ea e-ba likete tse mashome a mane le motso o le mong le makholo a mahlano.

₄₂Ha baloa bana ba Nafthali ho ea ka melōko ea bona, le ka malapa abo bona, le ka matlo a bo-ntat'a bona; le ho ea ka mabitso a banna bohle bao e ka bang bahlabani, ho tloha ka ba lilemo tse mashome a mabeli ho ea holimo. ₄₃Ba morabe oa Nafthali ba ileng ba baloa ea e-ba likete tse mashome a mahlano le metso e meraro le makholo a mane.

₄₄Bana ke bona bohle bao bo-Moshe le Arone ba ileng ba ba bala, ba e-na le mahosana a Iseraele, e leng banna ba leshome le metso e 'meli; e mong le e mong oa bona e le hlooho ea lelapa labo. ₄₅Ena ke palo ea bana bohle ba Iseraele ba ileng ba baloa ho ea ka matlo a bo-ntat'a bona, bao e neng e ka ba bahlabani ba mabōtho a Iseraele, ho tloha ka ba lilemo tse mashome a mabeli ho ea holimo. ₄₆Bohle ba ileng ba baloa ea e-ba likete tse makholo a tšeletseng le metso e meraro le makholo a mahlano le mashome a mahlano.

₄₇Empa ha e le Balevi bona ha ba baa ka ba balelloa le ba merabe e meng.

₄₈Morena a bua ho Moshe, a re: ₄₉“E be ba morabe oa Levi feela bao u sa tl'o ba bala, 'me palo ea bona u se ke ua e balella le ea bana ba Iseraele. ₅₀U khethe Balevi hore e be bona balebeli ba Tente ea Morena, e kentseng areka ea selekane, le balebeli ba lijana tsohle tsa eona, le thepa eohle ea eona. Ba tla jara Tente le lijana tsohle tsa eona, e be basebeletsi ka ho eona, 'me liahelo tsa bona li e pota-pote. ₅₁Ha ho tsamauoa, Balevi ba tla khokhotholla Tente; moo ho robaletsoang teng, ba tla e hloma, 'me e mong osele ea atamelang pel'a eona o tla bolaoa. ₅₂Moo bana ba Iseraele ba tla hloma teng, monna e mong le e mong a robale pel'a tente ea hae, monna e mong le e mong pel'a mokhele oa hae, ho ea ka mabōtho a bona. ₅₃Balevi bona ba tla robala ba pota-potile Tente ea Morena e kentseng areka ea selekane, e le hore sechaba sa bana ba Iseraele se se ke sa halefeloa ke Molimo. Balevi ba tla lebela Tente ea Morena e kentseng areka ea selekane.”

₅₄Bana ba Iseraele ba etsa joalo; ba etsa tsohle joalokaha Morena a ne a laetse Moshe.