Molora oa sethole se sekhunoana
1Morena a bua ho Moshe, le ho Arone, a re: 2“Ena ke taelo ea molao, eo Morena a e laetseng: Bua le bana ba Iseraele, u re ba u tlisetse sethole se sekhunoana, se se nang sepha, se e-s'ong ho panoe. 3U tla se nea moprista Eleasare, a se ntšetse kantle ho liahelo, se hlajoe moo a ntseng a bona. 4Moprista Eleasare o tla qopetsa monoana oa hae maling, a fōke ka 'ona ka makhetlo a supileng kapele ho monyako oa Tente ea Morena. 5Sethole sena se chesoe moo Eleasare a ntseng a bona. Letlalo la sona, le nama ea sona, le mali a mang a sona, le oona mosoang oa sona, tsena li tla chesoa. 6Joale moprista a nke patsi ea sefate sa kedare, le lehlaku la hisopa, le khoele e khubelu, a li akhele mollong, moo sethole se ntseng se e-cha teng. 7Joale moprista a hlatsoe liaparo tsa hae, 'me a tole ka metsi; kamora' moo a khutlele liahelong. Moprista o tla lula a ntse a le sesila ho fihlela ka phirimana. 8Ea chesitseng sethole sena a hlatsoe liaparo tsa hae ka metsi, a be a tole ka metsi. O tla lula a ntse a le sesila ho fihlela ka phirimana.
9“Monna ea hloekileng o tla bōkella molora oa sethole, a o qhalle kantle ho liahelo, sebakeng se hloekileng. Molora oo o tla bōlōkeloa ho sebelisoa ke sechaba sa bana ba Iseraele, ha se lokisa metsi a ho itlhoekisa. Ke nyehelo e tlosang sebe. 10Ea ileng a bōkella molora ona oa sethole, o tla hlatsoa liaparo tsa hae, 'me o tla lula a ntse a le sesila ho fihlela ka phirimana. Ona e tla ba molao oa mehla eohle ho bana ba Iseraele, le ho mojaki ea jakileng har'a bona.
Tlhoekiso ea ba nang le sesila
11“Mang kapa mang ea amang setōpō sa motho ofe kapa ofe, o tla lula a le sesila ka matsatsi a supileng. 12O tla itlhoekisa ka metsi ao ka letsatsi la boraro le ka letsatsi la bosupa, 'me joale e tla ba o hloekile. 13Mang kapa mang ea amang setōpō, eba ha a itlhoekise, o silafatsa Tente ea Morena. Motho ea joalo o tla khaoloa sechabeng sa Iseraele, hobane ha aa ka a tšèloa ka metsi a ho itlhoekisa. O tla ba sesila, 'me sesila sa hae se tla sallana le eena.
14“Ona ke molao oa ha motho a shoella ka tenteng. Mang kapa mang ea kenang ka tenteng, kapa ea seng a le ka tenteng, o tla ba sesila ka matsatsi a supileng. 15Sejana se seng le se seng se sa koaheloang, se na le sesila.
16“Mang kapa mang ea amang setōpō sa motho ea bolailoeng ka sabole koana naheng, kapa setōpō sa ea ichoeletseng feela, kapa lesapo la motho ea shoeleng, kapa lebitla, o tla ba sesila ka matsatsi a supileng.
17“Motho eo ea sa hloekang ba tla mo nkela molora oa nyehelo ea sehlabelo se tlosang sebe, ba o nyanyatse ka metsi a tsoa khuoa selibeng. 18Ba tla nka lehlaku la hisopa, ba le ine metsing, ebe monna ea hloekileng o fōka ka 'ona holim'a tente, le holim'a tsohle, le holim'a bohle ba moo, le holim'a monna eo ea ileng a ama lesapo kapa motho ea bolailoeng, kapa setōpō sa ea ichoeletseng feela, kapa lebitla. 19Ka letsatsi la boraro le la bosupa, monna eo ea hloekileng o tla fōka enoa ea sa hloekang, 'me a mo hloekise ka letsatsi la bosupa. Monna enoa ea sesila joale o tla hlatsoa liaparo tsa hae, a tole ka metsi, 'me ka phirimana o tla be a hloekile. 20Haeba monna enoa ea sesila a sa itlhoekise, o tla khaoloa sechabeng, hobane o tla be a silafalitse Sehalalelo sa Morena. Ha aa ka a tšèloa ka metsi a ho itlhoekisa, 'me o sesila.
21“Ona ke molao oa bona oa mehla eohle. Ea fōkang ka metsi a ho itlhoekisa, o tla hlatsoa liaparo tsa hae, 'me ea amang metsi a tlhoekiso o tla ba sesila ho fihlela ka phirimana. 22Tsohle tseo motho enoa ea sesila a li amang, li tla ba sesila; le ea li amang o tla ba sesila ho fihlela ka phirimana.”
