Kōpo ea Gade le Rubene
1Bara ba Rubene le bara ba Gade e ne e le barui ba mehlape e meholo ea likhomo; ba lemoha hore naha ea Jarese le naha ea Gileade ke naha ea makhulo a matle a likhomo. 2Bara ba Gade le bara ba Rubene ba fihla ho Moshe le ho moprista Eleasare, le ho baholo ba sechaba, ba re: 3“Linaha tsa Atarote, le Dibone, le Jarese, le Nimera, le Heshebone, le Elale, le Sebama, le Nebo, le Beone; 4tseo Morena a li hapileng ha sechaba sa Iseraele se ntse se tsoela pele, ka naha ea makhulo a likhomo, 'me rōna, bahlanka ba hao, re na le likhomo.” 5Eaba ba re: “Haeba u re hauhetse, re nee naha ena e be lefa la rōna, u se ke ua re re tšele Jorodane.”
Moshe oa ba khalemela
6Eaba Moshe o re ho bara ba Gade le ho bara ba Rubene: “Bana babo lōna ba ile ntoeng; lōna le khotsofalla ho lula moo? 7Le nyahamisetsa'ng lipelo tsa bana ba Iseraele, hore ba se ke ba ea naheng eo Morena a ba neileng eona? 8Bo-ntat'a lōna ba ne ba etse joalo ha ke ba rōma ke le Kadeshe-Barenea, ho ea bona naha. 9Ba ne ba nyolohe ho ea fihla Khohlong ea Eshekole, 'me ha ba bona naha eo, ba nyahamisa lipelo tsa bana ba Iseraele hore ba kene naheng eo Morena a ba neileng eona. 10Ka letsatsi leo khalefo ea Morena ea tlōkōma, 'me a hlapanya, a re: 11‘Ruri, banna bohle bao ke ba nyolotseng Egepeta, ho tloha ka ba lilemo tse mashome a mabeli ho ea holimo, ba ke ke ba bona naha eo ke neng ke e hlapanyetse Aborahama, le Isaka, le Jakobo, hobane ha baa ntatela ka botšepehi. 12Ha ho le ea mong, haese Kalebe, mora oa Jefune, oa morabe oa Bakenase, le Joshua, mora oa Nune, hobane bona ba latetse Morena ka botšepehi.’
13“Joale khalefo ea Morena ea tlōkōmela Iseraele, 'me a ba lelerisa lehoatateng ka lilemo tse mashome a mane, ho fihlela ho felisoa molōko oohle o neng o etse bokhopo moo Morena a ntseng a bona. 14Bonang, le tšoana le bo-ntat'a lōna, le bana ba baetsalibe, le ntse le eketsa khalefo e tšabehang ea Morena hore e tlōkele Iseraele. 15Ha le mo furalla, o tla boela a le lahla mona lehoatateng, 'me le tla tlisetsa sechaba sena sohle timelo.”
Tlhahiso e 'ngoe hape
16Eaba baa atamela, ba re: “Re lakatsa ho hahela mehlape ea rōna masaka mona, le ho hahela bana ba rōna metse, 17empa rōna re tla hlomela, re etelle bana ba Iseraele pele, ho fihlela re ba fihlisa sebakeng sa bona, 'me bana ba rōna ba tla phela metseng ea liqhobosheane ka lebaka la baahi ba naha ena. 18Re ke ke ra khutlela malapeng a rōna ho fihlela bana ba Iseraele bohle ba fumana lefa la bona. 19Rōna re ke ke ra arolelana lefa le bona mose ho Jorodane, le ho ea pele, hobane lefa la rōna re le fumane ka koano, ka bochabela ho Jorodane.”
Ho fihleloa tumellano
20Moshe a re ho bona: “Haeba le ka etsa joalokaha le bolela, la hlomella ntoa moo Morena a ntseng a bona, 21'me mohlabani e mong le e mong oa lōna a tšela Jorodane, moo Morena a ntseng a 'mona, ho fihlela a lelekile lira tsa hae kapele ho eena, 22naha eo e ineetse ho Morena, ebe kamorao ho moo lea khutla, le tla hloka molato ho Morena, le ho Iseraele. Morena o tla le nea naha ena e be lefa la lōna.
23“Empa ha le sa etse joalo, e tla ba le sitetsoe Morena, 'me le ke ke la phema kotlo ea sebe sa lōna. 24Hahelang bana ba lōna metse, le hahe le masaka a linku tsa lōna, 'me le etse seo le se tšepisitseng.”
25Eaba bara ba Gade le bara ba Rubene ba re ho Moshe: “Bahlanka ba hao ba tla etsa joalokaha mong'a rōna a re laela. 26Bana ba rōna, le basali ba rōna, le mehlape ea rōna, le makhomo 'ohle a rōna, tsena li tla sala Gileade. 27Empa bahlanka ba hao ba tla tšelela mose, mohlabani e mong le e mong o tla hlomella ntoa moo Morena a ntseng a bona, joalokaha mong'a rōna a boletse.”
28Malebana le taba ea bona joale Moshe a laela moprista Eleasare, le Joshua, mora oa Nune, le lihlooho tsa malapa a merabe ea bana ba Iseraele, 29a re ho bona: “Haeba bara ba Gade le bara ba Rubene, ba ka tšela Jorodane le lōna, ho ea loana moo Morena a ntseng a ba bona, 'me ka bahlabani bohle ba bona ba hlometseng, eaba le hapa naha, le tle le ba nee naha ea Gileade, e be lefa la bona. 30Empa haeba ba sa tšele le lōna ba hlometse, ba tla abeloa lefa le lōna naheng ea Kanana.”
31Eaba bara ba Gade le bara ba Rubene baa araba, ba re: “Re tla etsa joalokaha Morena a laetse bahlanka ba hae. 32Re tla tšela re hlometse, moo Morena a ntseng a bona, re ea naheng ea Kanana, 'me lefa la rōna le tla ba ka koano ho Jorodane.”
33Joale Moshe a nea bara ba Gade le bara ba Rubene, le karolo e 'ngoe ea morabe oa Manase, mora oa Josefa, naha ea Sihone, khosi ea Baamore; le naha ea Oge, khosi ea Bashane; a ba nea naha le metse e pota-potileng naha eo.
34Bara ba Gade ba haha metse ea Dibone, le Atarote, le Arōoere; 35le Atarote-Shofane, le Jasere, le Jogeboha, 36le Bete-Nimera, le Bete-Harame, e le metse ea liqhobosheane, le ea masaka a linku. 37Bara ba Rubene bona ba haha metse ea Heshebone, le Elale, le Kiriataime; 38le Nebo, le Baale-Meone, le Sibema, 'me ba fetola mabitso a metse eo a pele.
39Bara ba Makiri, mora oa Manase, ba futuhela Gileade, ba e hapa, 'me ba leleka Baamore ba neng ba ahile moo. 40Moshe a nea Makiri, mora oa Manase, Gileade, 'me a aha ho eona. 41Jaire, mora oa Manase, a futuhela metsana e moo, a e hapa, 'me a e rea lebitso la Metse ea Jaire. 42Noba a futuhela Kenate le metsana e e pota-potileng, 'me a e hapa, a e reella ka eena, a re ke Noba.
