FILEMONE 1

₁'Na Paulosi, motšoaruoa ka baka la Kreste Jesu, le Timothea ngoan'abo rōna, re lumelisa Filemone, moratuoa eo re sebetsang 'moho le eena, ₂le Afia khaitseli ea rōna, le Arekipose eo re leng bahlabani 'moho le eena, le kereke e phuthehelang ha Filemone, re re: ₃Mohau le khotso ea Molimo Ntat'a rōna le ea Morena Jesu Kreste li ke li be le lōna.

₄Kamehla ha ke u hopola lithapelong tsa ka, ke leboha Molimo, ₅hobane ke utloa ho boleloa tumelo eo u nang le eona ho Morena Jesu, le lerato leo u nang le lona ho balumeli bohle. ₆Thapelo ea ka ke hore tumelo eo u nang le kabelo ho eona e sebetse, e tle e tsoale kutloisiso ea tsohle tse molemo tseo re nang le tsona ho Kreste. ₇Ngoan'eso, lerato la hao le nthabisitse, le ntšelisitse haholo, hobane ke ka uena lipelo tsa balumeli li khatholohileng.

₈Ka baka lena nka ba sebete ho u laela ka Kreste ho etsa se lokelang, ₉empa ka baka la lerato kea u rapela, ke le Paulosi oa leqheku, eo kajeno e bileng e leng motšoaruoa ka baka la Kreste Jesu. ₁₀Ke ipiletsa ho uena malebana le ngoana oa ka, Onesimose, eo ke mo tsoaletseng litlamong tsa ka; ₁₁eena eo pele a neng a se na thuso ho uena, empa joale ea nang le thuso ho rōna ba babeli.

₁₂Ke mo khutlisetsa ho uena, eena eo e leng pelo ea ka. ₁₃Ke lakatsa ho 'mōlōka koano, hore ha ke ntse ke le litlamong ka baka la molaetsa o molemo, a tle a ntšebeletse bakeng sa hao. ₁₄Empa ha kea rata ho etsa letho ntle ho tumello ea hao, esere thuso ea hao ea e-ba ea ho qōbelloa, e seng ea ho ithaopa. ₁₅Mohlomong Onesimose o ile a arohanngoa le uena ka nakoana, e le hore u tle u boele u be le eena kamehla. ₁₆Empa joale ha e sa le lekhoba, o se a feta lekhoba ka bohlokoa; ke ngoan'abo rōna ea ratehang, haholo-holo ho 'na. Joale o tla rateha hakaakang ho uena e le motho, e le molumeli!

₁₇Haeba u nkuka ke le molekane oa hao, mo amohele joalokaha u ne u tla nkamohela. ₁₈Feela haeba a u senyelitse ho hong, kapa a nkile molato ho uena, u tle u o batle ho 'na. ₁₉'Na Paulosi, ke ngotse ka letsoho la ka, ke re: “Ke 'na ea tla u lefa.” Feela ha ke rate ho u hopotsa hore ke ka 'na u leng seo u leng sona: Ke oona molato oa hao. ₂₀E, ngoan'eso, ak'u nthuse ka baka la Morena. Khatholla pelo ea ka ho Kreste.

₂₁Ke u ngolla ke kholisehile hore u tla 'mamela, u be u etse se fetang le seo ke se kōpang.

₂₂Hape u ntokisetse bolulo, hobane ke na le tšepo ea hore ka lithapelo tsa lōna ke tla khutlisetsoa ho lōna.

₂₃Epafarase, eo re leng litlamong le eena ka baka la Kreste, oa lumelisa. ₂₄Le bo-Mareka, le Aresetarekose, le Demase, le Luka, bao re sebetsang 'moho le bona, baa u lumelisa.

₂₅Mohau oa Morena oa rōna Jesu Kreste o ke o be le lōna.