1Ea iketsang mokhelo
o ithata boeena,
tsohle tsa bohlale
o hanyetsana le tsona.
2Sethoto ha se thabele
ho ba le kutloisiso,
se thabela
ho pepesa mehopolo ea sona.
3Bokhopo bo tsamaea le ho tella,
lihlong li tsamaea le ho nyatseha.
4Lipolelo tsa motho li ka boliba,
mohloli oa bohlale
e ka liba se runya-runyang.
5Ha ho molemo
ho bontša leeme ho ba khopo,
ebe u sitisa ea lokileng
ho ahlōleloa ka toka.
6Leleme la sethoto
le baka liqabang,
polelo tsa sona
li se memela ho shapuoa.
7Sethoto se timetsoa
ke lipuo tsa sona,
se tšoasoa
ke leraba la polelo tsa sona.
8Polelo tsa hèlètoane lia hlabosa,
li theohela hamonate
ka pelong ea motho.
9Ea monyebe mosebetsing oa hae
eena ke ngoan'abo sesenyi.
10Lebitso la Morena ke qhobosheane,
ea lokileng o tšabela teng,
a sireletsehe.
11Matlotlo a barui
ke qhobosheane ea bona,
ba hlōma e ka ke marako
a phahameng, a ba sireletsang.
12Boikakaso bo etella timelo pele,
boikokobetso bona
bo tla pele ho tlōtla.
13Ea arabang a sa imamela hantle
ke sethoto, o hlabisa lihlong.
14Ea kulang
o matlafatsoa ke moea oa hae,
moea o hlomohileng
o ka phekoloa ke mang?
15Ea nang le kutloisiso
o fumana tsebo,
tsebe ea ea bohlale
e lethoèthoè ho mo mamela.
16Mpho e betlela mofani tsela,
e 'mee kapele ho mahosi a hae.
17Moqōsi ha a bua ka khotla
e ee ke o bua 'nete,
ho fihlela ha moqōsuoa
a mo hloma lipotso.
18Ho laola ka lōtho
ho felisa liqabang,
ho namole ba matla,
ba loantšanang.
19Ngoan'abo motho ha a khenne
o thata ho feta qhobosheane,
qhobosheane e matla,
liphapang tsona
e ka mekoallo ea qhobosheane.
20Motho o kotula
seo a se jalang ka leme la hae,
o khotsofatsoa
ke polelo tsa molomo oa hae.
21Leleme le ka phelisa,
hape le ka bolaea,
ba ratang ho hèhla
ba tla kotula tholoana tsa hona.
22Ea inyaletseng mosali oa sebele
o lehlohonolo,
ea joalo Morena o mo hauhetse.
23Mofumanehi o kōpa mohau
ka boikokobetso,
morui ha a araba
o mo shashabetsa ka bohale.
24Metsoalle 'motoana
e isa motho timelong,
oa sebele eena o tšepahala
ho feta ngoan'abo motho.
