1U se ke ua ithorisa
ka la hosasane,
hobane ha u tsebe
hore le ka u tlela ka life.
2Motho ha a ithorise
o rorisoa ke ba bang,
a ka rorisoa ke basele,
e seng eena a ithorise.
3Lejoe le boima,
le lona lehlabathe,
ho halefisoa ke sethoto
ho boima ho li feta.
4Khalefo e sehlōhō,
bohale boa tlōkōma,
empa mōna
o ka engoa ke mang kapele?
5Ho khalema motho sefahlamahlo
ho molemo
ho feta rato la lekunutu.
6Ho batoa ke motsoalle
ho na le molemo,
empa ho akoa ke sera ke thetso.
7Ea nyōnyōbetseng
o hlaba khora ka sefeamaeba,
athe ho ea lapileng
le ho babang hoa latsoeha.
8Monna ea furallang lapa la hae,
o tšoana le nonyana
e furallang sehlaha sa eona.
9Litlolo le menkoane
li thabisa pelo ea motho,
keletso e ntle ea motsoalle
le eona e thabisa joalo.
10Se furalle motsoalle oa hao
kapa oa ntat'ao,
ha u le bothateng
se itloaetse ho ea ha ngoan'eno;
motsoalle ea haufi o na le thuso,
ho feta ngoaneno ea hole.
11Mor'a ka, hlalefa,
u thabise pelo ea ka,
ke tle ke arabe motho ea 'nyatsang.
12Ea seli o elelloa kotsi,
a batle setšabelo,
empa ea se nang tsebo
o tlatselaka feela,
a oele kotsing.
13Nka seaparo sa ea itlammeng
ho lefa molato oa e mong;
mo ntsise tebeletso
bakeng sa mosali oa sehlola.
14Ea lumelisang mohahabo
ka ho mo tlatsetsa lerata,
a mo tlatsetsa lerata ka matjeke,
tlhohonolofatso ea hae
e tla fetoha thōhako.
15Metsi a rothang ho-ea-ho-ile
ha pula e e-na,
a tšoana hantle le 'malikomang.
16Ho mo tholisa
ho tšoana le ho thiba moea,
kapa ho khakeletsa ole ka seatla.
17Tšepe e leotsoa
ka tšepe e 'ngoe,
monna o tentšoa tšea
ke banna ba bang.
18Ea hlokomelang fate sa feiee,
o tla ja tholoana tsa sona;
Ea baballang mong'a hae hantle,
o tla tlōtloa ke eena.
19Joalokaha motho
a ipona sefahleho ka metsing,
pelo ea motho
le eona ke seipone sa hae.
20Qalo ea Bafu
le mohohlo oa timelo
ha li ke li tlala,
le 'ona mahlo a motho
ha a khotsofale.
21Silefera e hloekisoa
ka ho qhibilisoa pitseng,
khauta eona ka sebōping sa eona,
le motho o ahlōloa
ka botumo ba hae.
22Lehlanya u ka le tulella
ka lefulung,
ua le silella le mabele ka tšilo;
empa bohlanya
bo ke ke ba le tlohela.
23E-ba mafolofolo
ho lekola khutšoane tsa hao,
u hlahlobe mehlape ea hao hantle;
24hobane leruo
ha le hlole kamehla eohle,
le mofapahlooho oa khosi
ha o fetele melōkong eohle.
25Ha joang ba thōkō bo felile,
joang bo bocha bo se bo hlahile,
'me joang bo matsoapong
bo bokeletsoe,
26u tla apara tsa boea ba likonyana,
ka lipotsanyane u reke masimo.
27Bese la lipoli le tla u lekana,
e be lijo tsa hao le tsa lapa la hao.
u fepe le makhabunyane a hao.
