MAELE 31

₂“Oho, ngoan'aka!

Oho, ngoan'a pōpelo ea ka!

Uena eo ke mo filoeng

ho arabela thapelo tsa ka,

₃se qete matla

a bonna ba hao ka basali,

se cheliete

le basali ba timelitseng likhosi.

₄“Ha ho lokele likhosi, Lemuele,

ho noa veine ha ho li lokele,

ho chachehela joala

ha ho lokele mahosana,

₅esere ha li noele,

molao tsa o lebala,

bafumanehi ba ahlōleloa ka leeme.

₆Ba khatheng la ho shoa

ba noeseng joala,

ba sithabetseng lipelo

le ba noese veine.

₇Ba tloheleng ba noe,

ba lebale bofuma ba bona,

mahlomola a bona

ba se hlole ba a hopola.

₈“E-ba molomo

oa ba sa tsebeng ho ipuella,

u tseke tokelo

tsa bohle ba saretsoeng.

₉Ba buelle,

u ba ahlolele ka toka,

u emele nyeoe tsa bafumanehi

le 'ona mafutsana.”

₁₀Mosali ea khabane

a ka fumanoa ke mang?

Bohlokoa ba hae

bo feta le mabenyane a bohlokoa!

₁₁Monn'a hae

o mo tšepa a sa khanane,

'me bofutsana

a ke ke be a bo tseba.

₁₂Ka matsatsi 'ohle

a ho phela ha hae,

o etsetsa monna

tse molemo e seng tse mpe.

₁₃O batla boea, a batle motsitla,

a sebetse ka matsoho a hae

ka mafōlōfōlō.

₁₄O tšoana le likepe

tsa bo-rakhoebo,

lijo tsa hae o li tlisa li e-tsoa hōle.

₁₅O tsoha bosiu e sa le ka matjeke,

a fepe bohle ba lelapa la hae,

makhabunyane a hae

a a abele mosebetsi.

₁₆Ha a khahloa ke tšimo

eba oa e reka,

a e leme morara

ka tse sebelitsoeng

ke matsoho a hae.

₁₇Theka la hae o le tlama hathata,

a matlafatse le matsoho a hae.

₁₈O lemoha hore khoebo ea hae

ea mo atla,

bosiu bo sa

bone la hae le sa tingoe.

₁₉Toloki o e tšoara

ka letsoho la hae,

tšoele a e tšoare

ka monoana ha a e ohla.

₂₀Bafumanehi o ba fepa a sa khanane,

bahloki le bona a ba atsoe

ka tsoho le batsi.

₂₁Ha lehloa le khetheha

letsoalo ha a na lona,

bohle ba lapa la hae

ba apesitsoe tse mofuthu;

₂₂kallane tsa moalo o itohela tsona,

aparo tsa hae

ke tsa lene e ntle, e perese.

₂₃Monn'a hae

o hlompheha le khorong tsa motse,

ha a lutse teng le baholo ba naha.

₂₄O rōka liaparo tsa lene e ntle

a li rekise,

le 'ona maqhama

bahoebi ba a reka ho eena.

₂₅Matla le seriti

ke tsona aparo tsa hae.

taba tsa kamoso tsona oa li teōla!

₂₆Ha a e-tsoa molomo

o bua ka kelello,

thuto tsa mosa

li tsoe lemeng la hae.

₂₇O seli tabeng tsa lelapa la hae,

hase mokotla o mahlo,

mohlohloa-o-rapame.

₂₈Bana ba hae

ba ema ba re o hlohonolo,

le monn'a hae a rialo,

a b'a 'mabatse, a re:

₂₉“Basali ba bangata

ke basali ba khabane,

empa uena kaofela ua ba feta!”

₃₀Lereli ke thetsane,

botle ke lefeela-feelane;

mosali ea tšabang Molimo

ke eena ea tla rorisoa.

₃₁Mo nee moputso oa matsoho a hae,

mosebetsi oa hae

o mo rorise khorong tsa motse.