LIPESALEMA 142

₂Ke lla ho Morena

ka lentsoe le phahameng,

ke etsa thapeli ho Morena

ka lentsoe le phahameng.

₃Ke hlahisa sello sa ka,

ke se hlahisa kapele ho eena,

ke bea tsietsi ea ka kapele ho eena.

₄Ha moea oa ka o imetsoe,

uena u tseba tsela ea ka.

Tseleng eo ke tsamaeang ho eona

ba nchehetse sefi.

₅Ke talima ka tsohong la ka le letona:

Ha ho ea ntsotellang;

ha ho moo nka tšabelang teng,

ha ho motho ea 'natsang.

₆Morena, ke lla ho uena,

ke re: “Ke uena setšabelo sa ka,

u kabelo ea ka

lefatšeng la ba phelang.”

₇Ak'u mamele sello sa ka,

hobane ke kokobelitsoe haholo.

'Namolele ho ba ntlhorisang,

hobane ba mpheta ka matla.

₈Ak'u 'ntše chankaneng,

ke tle ke boke lebitso la hao.

Ba lokileng ba tla mpokanela,

hoba u tla be u ntsoetse molemo.