Morena, ak'u nee khosi tlhōlo
1Pesalema ea Davida, e qapetsoeng motsamaisi oa libini.
2Morena a ke a u arabe
tsatsing la matšoenyeho,
lebitso la Molimo oa Jakobo
le u sireletse.
3A ke a u thuse a le Sehalalelong,
a u tšehetse a le Sione.
4A ke a hopole
linyehelo tsohle tsa hao,
a thabele licheso tsa hao.
5A ke a u fe
se ratoang ke pelo ea hao,
a phethahatse merero eohle ea hao.
6Re ke re etsetse
tlhōlo ea hao litlatse,
re phahamise mekhele
ka lebitso la Molimo,
bitso la Molimo oa rōna.
Morena a ke a phethahatse
likōpo tsohle tsa hao.
7Joale kea tseba
hore Morena o nea tlholo,
o e nea Motlotsuoa oa hae,
o mo arabela a le sehalalelong,
a le sehalalelong sa hae
sa leholimo.
O mo arabela ka ketso
tse pholosang,
ketso tsa letsoho la hae le letona.
8Ba bang ba tšepile kariki tsa ntoa,
ba bang ba tšepile lipere,
empa rōna re tšepile
lebitso la Morena,
lebitso la Morena Molimo oa rōna.
9Bona ba tla khōthōmetseha, ba oe,
empa rōna re tla ema re tiile.
10Morena, ak'u nee khosi tlhōlo;
re arabele ha re ipiletsa ho uena.
