LIPESALEMA 29

Thōhōletsang Morena,

lōna bara ba Molimo;

thōhōletsang tlōtla

le matla a Morena.

₂Thōhōletsang tlōtla

e lokelang lebitso la Morena;

khumamelang Morena le khabile,

le khabile ka tse halalelang.

₃Lentsoe la Morena

le utloahala holim'a metsi,

Molimo ea tlōtlehang

oa thoathoaretsa,

Morena o holim'a metsi a maoatle.

₄Lentsoe la Morena le matla,

lentsoe la Morena lea tšabeha.

₅Lentsoe la Morena

le roba lifate tsa likedare,

Morena o roba likedare,

kedare tsa Lebanone.

₆Lebanone o e thalisa

joaloka namane,

le Sirione

joaloka pohoana ea nare.

₇Lentsoe la Morena

le tlōla malakabe;

₈lentsoe la Morena

le tetemisa lehoatata,

Morena o tetemisa

lehoatata la Kadeshe.

₉Lentsoe la Morena

le ekethehisa lifate,

le fōhle meru,

'me ka tempeleng ea hae

bohle ba re: “Oa tlōtleha!”

₁₀Morena o ne a rena

holim'a morallo oa metsi,

Morena ke khosi e renang

kamehla le mehla.

₁₁Morena a ke a matlafatse

sechaba sa hae,

Morena a ke a se hlohonolofatse

ka khotso.