LIPESALEMA 31

₂Ke tšabela ho uena Morena;

ke se ke ka hlajoa ke lihlong

le ka mohla.

Ak'u 'namolele

ka baka la ho loka ha hao.

₃Ntšekehele tsebe,

u potlakele ho ntopolla.

U be lefika

leo ke tšabelang ho lona,

qhobosheane e mpholosang.

₄Uena u lefika la ka

le qhobosheane ea ka;

ntsamaise, u ntataise

ka baka la lebitso la hao.

₅Mphemise leraba

leo ke le chehetsoeng,

hobane ke uena setšabelo sa ka.

₆Ke bea moea oa ka

matsohong a hao;

u ntopolotse Morena,

Molimo ea tšepahalang.

₇U hloile ba sebeletsang

melimo ea bohata,

athe 'na ke tšepile Morena.

₈Ke tla nyakalla,

ke thabele mohau oa hao,

hobane u bone ho hlōpheha ha ka,

ua lemoha matšoenyeho a ka;

₉ha ua ka ua 'neella lira tsa ka,

empa u ntsamaisa ka bolokolohi.

₁₀Nkhauhele Morena,

hobane ke matšoenyehong;

mahlo a ka a motela ke masoabi,

esita le moea oa ka, le 'mele oa ka.

₁₁Bophelo ba ka bo felile,

bo felile ke mahlomola,

lilemo tsa ka li ile ke ho feheloa;

matla a ka a felisoa ke ho hlōpheha,

le masapo a ka a khathetse.

₁₂'Na ke sekhobo

ho lira tsa ka tsohle,

haholo-holo

ho bao ke ahisaneng le bona,

ke koko ho metsoalle ea ka,

ba mponang litseleng baa mpaleha.

₁₃Ha ke sa hopoloa;

joalokaha eka ke mofu,

ke tšoana le ntho e lahliloeng.

₁₄Ke utloa litšebo tsa ba bangata,

ke tšosoa ka nqa tsohle;

batho ba nkunuta ba le 'moho,

ba rera ho felisa bophelo ba ka.

₁₅Empa 'na ke tšepile uena Morena,

ke re: “U Molimo oa ka!”

₁₆Litšiu tsa ka li matsohong a hao;

'namolele liatleng tsa lira tsa ka,

u 'namolele le ho bahlorisi ba ka.

₁₇Ak'u bontše mohlanka oa hao,

u 'montshe sefahleho,

sefahleho se khanyang khotso,

u mpholose ka mohau oa hao.

₁₈Morena, ha ke ipiletsa ho uena

ke se ke ka hlajoa ke lihlong,

empa lihlong

li ke li hlabe ba khopo,

ba khutsisoe

ka ho theoleloa Qalong ea Bafu.

₁₉Ba buang leshano

ba fetohe limumu,

baikakasi bana

ba buang hampe ka ea lokileng,

ba ikhōhōmōsetsang eena,

ba mo nyelise.

₂₀Morena, molemo oa hao

o mokaakang!

U o bōlōketse ba u tšabang;

pontšeng ea bana ba batho

u o etsetsa ba tšabelang ho uena.

₂₁U ba pata ho uena ka sebele,

hōle le merero e mebe ea batho;

u ba sireletsa motlotloaneng oa hao,

hōle le maleme a jalang liqabang.

₂₂Ho bokoe Morena

ea mpontšitseng mohau,

ea mpontšitseng mohau o hlollang,

ha ke ne ke likiloe, ke futuhetsoe.

₂₃Matsoalong a ka, ka re:

“U ntahletse

hōle le sefahleho sa hao.”

Empa ua utloa thapeli ea ka,

ha ke ne ke u llela.

₂₄Ratang Morena,

lōna batšepuoa bohle ba hae;

Morena o baballa ba tšepahalang;

baikhōhōmōsi bona

o ba nea se ba lokelang.

₂₅E-bang sebete, le tiee lipelo,

lōna bohle ba tšepileng Morena.