LIPESALEMA 49

₂Mamelang, lōna lichaba tsohle;

sekéhang tsebe,

lōna baahi bohle ba lefatše,

₃lōna bafo le lōna marena,

lōna barui le mafutsana hammoho.

₄Molomo oa ka o tla bua tsa bohlale,

pelong ea ka ke tla nahana

tse nang le kelello.

₅Ke tla sekèhèla maele tsebe,

ke tla hlalosa selōtho sa ka

ke ntse ke letsa harepa.

₆Nka tšoha eng nakong tse mpe,

ha ke teetsoe hare ke lira tse khopo,

₇e leng batho

ba tšepileng matlotlo a bona,

ba ithorisang

ka maruo a bona a mangata?

₈Ha ho motho

ea ka lopollang ngoan'abo,

leha e le ho mo lefella ho Molimo.

₉Tefello ea bophelo ba motho

e feta matla a hae,

a ke ke a e lekana le ka mohla!

₁₀Motho a ke ke a phela ho-ea-ho-ile,

a se ke a tseba lebitla.

₁₁O tla fela a bone

hore le ba bohlale baa shoa,

sethoto le leoatla

ba timela ka ho tšoana,

ba siele ba bang matlotlo a bona.

₁₂Mabitla a bona

ke matlo a bona a mehla eohle,

ke leaho la bona

ho isa melōkong eohle,

le hoja linaha li reeletsoe ka bona.

₁₃Motho ea phelelang leruo

o hloka kelello,

o tšoana le liphoofolo tse shoang.

₁₄Ena ke eona tsela ea ba itšepileng,

ke pheletso ea ba khotsofetseng,

ba khotsofaletseng matlotlo a bona.

₁₅Ba khanneloa Qalong ea Bafu

joaloka linku;

lefu e tla ba molisa oa bona.

Ba tla theohela lebitleng,

sebōpeho sa bona se tla senyeha;

Qalo ea Bafu e tla ba leaho la bona.

₁₆Empa Molimo o tla ntopolla,

a 'ntše liatleng tsa lefu.

₁₇U se ke ua tšoha

leha motho a ka rua,

'me matlotlo a ntlo ea hae

a eketseha;

₁₈hobane mohla a shoang

a ke ke a nka letho,

matlotlo a hae

a ke ke a mo sala morao.

₁₉Le hoja ha a sa phela,

a ne a ikuka a le lehlohonolo,

kapa a ne a rorisetsoa

katleho ea hae,

₂₀o tla be a e'o fihla

molōkong oa bo-ntat'ae,

ba ke keng ba hlola ba bona leseli.

₂₁Motho ea phelelang leruo

o hloka kelello,

o tšoana le liphoofolo tse shoang.