LIPESALEMA 63

₂Molimo, ke uena Molimo oa ka,

Molimo eo ke 'matlang,

moea oa ka o u nyoretsoe,

'mele oa ka o u hlolohetsoe,

joaloka naha e omeletseng,

e khathetseng, e hlokang metsi.

₃Ka u talima

u le Sehalalelong sa hao,

ka boha matla a hao le tlōtla ea hao.

₄Mohau oa hao o molemo

ho feta bophelo,

molomo oa ka o tla u rorisa.

₅Ke tla u boka ha ke ntse ke phela,

ke phahamise matsoho a ka,

ke a phahamisetse ho uena.

₆Moea oa ka o tla khōra

joaloka ea jang moko le mafura,

molomo oa ka o u rorise,

o u rorise ka lithoko tsa thabo.

₇Ha ke ntse ke robetse kea u hopola,

ke u nahana ka linako tsa bosiu,

₈hobane u mothusi oa ka,

ke nyakalla moriting

oa mapheo a hao.

₉Moea oa ka o u khomaretse,

tsoho la hao le letona

lea ntšehetsa.

₁₀Ba batlang ho timetsa bophelo ba ka

ba tla theohela

botebong ba lefatše;

₁₁ba tla bolaoa ka sabole e bohale,

'me ba jeoe ke liphiri.

₁₂Athe khosi e tla thabela Molimo,

bohle ba ikanang ka eena

ba tla ithorisa,

empa ba leshano

ba tla thijoa melomo.