LIPESALEMA 71

₁Ke tšabela ho uena Morena,

ke tle ke se ke ka hlajoa ke lihlong,

ka hlajoa ke lihlong le ka mohla.

₂Ak'u 'namolele ka ho loka ha hao,

'namolele u ntopolle;

u ntšekehele tsebe, u mpholose.

₃E-ba lehaha

leo ke tšabelang ho lona,

leo nka tšabelang ho lona kamehla;

u se u laetse hore ke pholosoe,

uena lefika la ka

le qhobosheane ea ka.

₄Molimo oa ka, ak'u 'namolele,

u 'namolele matsohong a ea khopo,

liatleng tsa ea sa lokang,

tsa ea sehlōhō.

₅Morena, Morena oa ka,

u tšepo ea ka,

ke u tšepile

ho tloha bocheng ba ka.

₆U ntšehelitse

ho tloha tsoalong ea ka,

ua ntšireletsa

ho tloha pōpelong ea 'mè;

nke ke ka khaotsa ho u rorisa.

₇Ke joaloka mohlolo ho ba bangata,

empa uena

u setšabelo sa ka sa 'nete.

₈Molomong oa ka

ho tletse thoriso ea hao,

le tlotliso ea hao kamehla.

₉Se ntahle boqhekung ba ka,

u se mphuralle

ha matla a mpheletse;

₁₀hobane lira tsa ka li bua ka 'na,

ba ntaletseng baa nthera,

₁₁ba re: “Molimo o mo furaletse,

mo lelekiseng,

le mo tšoare,

hobane ha ho ea tla mo namolela.”

₁₂Molimo, se be hōle le 'na,

Molimo oa ka,

ak'u potlakele ho nthusa.

₁₃Ba ntoantšang

ba ke ba hlajoe ke lihlong,

ba hlajoe ke lihlong, ba timele;

ba ntakaletsang bobe

ba fetohe sekhobo,

ba fetohe sekhobo, ba tlontlolohe.

₁₄Empa 'na nke ke ka khaotsa

ho u tšepa,

ke tla eketsa ho u rorisa.

₁₅Molomo oa ka

o tla bolela tsa ho loka,

o bolele tsa ho loka ha hao,

le tsa ho pholosa ha hao kamehla,

le hoja nke ke ka tseba ho li bala.

₁₆Ke tla bua ka tsa matla a hao,

uena Morena, Morena oa ka,

ke hopotse batho tsa ho loka ha hao,

ho loka hoo e leng ha hao feela.

₁₇Molimo, u nthutile

ua nthuta ho tloha bocheng ba ka,

'me ho fihlela joale

ke ntse ke tumisa limakatso tsa hao.

₁₈Joale ha ke se ke le leqheku,

hlooho e se e le putsoa,

oho, Molimo, u se ke ua mphuralla,

ho fihlela ke senolela

melōko eohle e tlang

tsa matla a hao

le tsa bonatla ba hao,

₁₉le tsa ho loka ha hao,

ho fihlang holimo-limo,

uena Molimo.

U entse tse kholo, Molimo;

ke mang ea tšoanang le uena?

₂₀Le hoja u nkutloisitse matšoenyeho,

matšoenyeho a mangata,

a bohlōkō,

u tla boela u 'matlafatse,

u boele u 'nyolle

botebong ba lefatše;

₂₁u nkhōlise ho feta pele,

u 'ne u ntšelise hape.

₂₂Joale 'na ke tla u boka ka seletsa,

ka baka la botšepehi ba hao,

uena Molimo oa ka;

ke u roke ka harepa,

uena Ea Halalelang oa Iseraele.

₂₃Molomo oa ka o tla hōoa ka thabo,

o hōoe ha ke u roka,

le oona moea oa ka

oo u o lopolotseng.

₂₄Leleme la ka le tla bolela

tsa ho loka,

le bolele tsa ho loka ha hao kamehla,

ba ntakaletsang bobe ba tlontlolohe,

ba tlontlolohe, ba ferekane.