TŠENOLO 10

₁Eaba ke bona lengeloi le leng le matla, le theoha leholimong, le aparetsoe ke leru. Hloohong le ne le roetse mookoli, sefahleho sa lona se le joaloka letsatsi, 'me maoto a lona a le joaloka litšiea tsa mollo. ₂Ka letsohong la lona le ne le tšoere bukana e phetliloeng. Lengeloi leo la hata holim'a leoatle ka leoto la lehlakore le letona, le holim'a lefatše ka la le letšehali, ₃'me la hōoa ka lentsoe le leholo, joaloka tau ha e puruma. Hoba le hōoe, ha thoathoaretsa matōlō a supileng. ₄Ha matōlō ao a supileng a se a thoathoarelitse, eare ke re kea ngola, ka utloa lentsoe le tsoang leholimong, le re: “Molaetsa oa matōlō a supileng e be pinyane, u se ke ua o ngola.”

₅Lengeloi leo ke ileng ka le bona le hata holim'a leoatle le holim'a lefatše, la phahamisetsa letsoho la lona le letona leholimong, ₆la hlapanya ka ea phelang kamehla le mehla, ea hlotseng leholimo le tsohle tse ho lona, le lefatše le tsohle tse ho lona, le leoatle le tsohle tse ho lona, la re: “Tieho ha e sa tla ba teng. ₇Ha matsatsi a hore lengeloi la bosupa le bue a se a fihlile, etlare ha le qala ho letsa terompeta, e tla ba sephiri sa Molimo se phethahetse, joalokaha a ne a bolelle bahlanka ba hae, baporofeta.”

₈Lentsoe leo ke ileng ka le utloa le e-tsoa leholimong la boela la bua le 'na hape, la re: “E-ea, u e'o nka buka e phetliloeng, e ka letsohong la lengeloi le emeng holim'a leoatle le holim'a lefatše.”

₉Ka ea ho lengeloi, ka le kōpa hore le 'nee bukana. La re ho 'na: “E nke, u e je. E tla u babela ka maleng, empa ka hanong e tla ba monate joaloka mahe a linotši.” ₁₀Ka nka bukana eo e letsohong la lengeloi, ka e ja. Ka hanong e ne e le monate joaloka mahe a linotši, empa eare hoba ke e koenye, ea mpabela ka maleng. ₁₁Eaba ho thoe ho 'na: “U sa tšoanela ho ea bolela molaetsa kapele ho lichaba tse ngata, le mefuta e mengata, le ba lipuo tse ngata, le likhosi tse ngata.”