SIRAKA 10

₁'Musi ea bohlale o tla ruta

sechaba sa hae,

'me puso ea motho ea seli e tsitsitse.

₂Joaloka 'musi, bahlanka ba tlas'a hae

ba tla ba joalo;

joaloka mong'a motse, baahi ba oona

ba tla ba joalo.

₃Khosi e hlokang thuto

e tla timetsa sechaba sa eona;

athe motse o tla atlehisoa

ke ho ba seli ha baetapele ba oona.

₄Puso ea lefatše e ka har'a liatla

tsa Morena;

'me o hloaea motho ea lokelang

ka nako e lokelang ho le busa.

₅Katleho ea motho e ka har'a liatla

tsa Morena;

ke Eena ea fanang ka tlotla

ho baetsi ba molao.

₆U se ke ua jara moahisani oa hao

ka pelo

ka baka la phoso efe le efe,

'me se etse letho matšoafo a phahame.

₇Boikhantšo bo hloehile

ka pele ho Morena le ka pele ho batho,

'me ho hloka toka ke phoso

mahlong a Molimo le a batho.

₈Borena bo tsoa sechabeng se seng

ho ea ho se seng,

ka baka la ho hloka toka,

le boikakaso le meharo.

₉Motho a ka ikhantša joang

e le lerole le molora?

Esita leha a ntse a phela,

likahare tsa hae ke sebolu.

₁₀Ho kula ho holelele

ke sesomo ho ngaka;

eo e leng khosi ea kajeno

hosane ke mofu.

₁₁Ha motho a shoele,

lefa la hae ke lihahabi

le libatana le liboko.

₁₂Qaleho ea boikhohomoso ba motho

ke ha a furalla Morena,

ha pelo ea hae e fetohela 'Mopi oa hae.

₁₃Qaleho ea boikhohomoso ke sebe,

'me motho ea se khomarelang

o hasanya manyala.

Ka hona Morena o theoletse holim'a

batho bao likotlo tse khethehileng;

o ba timelitse tu!

₁₄Morena o pethotse literone

tsa babusi,

'me a bea mafutsana sebakeng sa bona.

₁₅Morena o motsutse metso ea lichaba,

'me a hloma baikokobetsi

tulong ea tsona.

₁₆Morena o qethotse naha tsa lichaba,

'me a li ripitla ho ea metheong

ea lefatše.

₁₇O suthisitse lichaba tse ling

'me a li timetsa,

a hlakola khopolo ea tsona lefatšeng,

₁₈Boikhohomoso ha boa ka ba hlolloa

motho,

leha e le bohale bo tukang

bakeng sa ba tsoetsoeng ke mosali.

₁₉Ke mohlobo ofe o lokelang

hlompho? Ke mohlobo oa batho.

Ke mohlobo ofe o lokelang hlompho?

Ke bao ba tšabang Morena.

Ke mohlobo ofe o sa lokeleng

hlompho? Ke mohlobo oa batho.

Ke mohlobo ofe o sa lokeleng

hlompho? Ke ba robang melao.

₂₀Har'a batho ba habo,

moetapele oa bona

o lokeloa ke hlompho;

'me bao ba tšabang Morena

ba hlompshoa ke eena.

₂₂Barui, le ba khethehileng,

le mafutsana,

boithoriso ba bona

e ke e be tšabo ea Morena.

₂₃Hase ntho e lokelang ho nyelisa

motho ea bohlale oa mofutsana,

'me hase ntho e tšoanelehang

ho hlompha motho oa moetsalibe.

₂₄Motho oa boemo, moahloli

le 'musi ba hlompheha,

empa ha ho le ea mong oa bona

e moholo ho feta motho

ea tšabang Morena.

₂₅Mohlanka ea bohlale o tla sebeletsoa

esita le ke batho ba lokolohileng,

'me motho ea nang le kutloisiso

a ke ke a koma-koma

ka baka la hona.

₂₆U se ke ua khantša bohlale ba hao,

ha u etsa mosebetsi oa hao;

leha e le ho ithorisa,

empa u le bohloking.

₂₇Ho molemo ha motho a sebetsa

ka thata 'me a hafa ka nkatana,

ho e-na le ha motho a solla kahohle

a ntse a ithorisa empa a lapa.

₂₈Ngoan'a ka, ha u ithorisa,

e be ka boikokobetso;

u itlhomphe kamoo u lokelang kateng.

₂₉Ke mang ea ka emelang

motho ea sa ithateng,

'me ke mang ea ka rorisang

motho ea itlhomphollang?

₃₀Mofutsana o hlompshoa

ka baka la tsebo ea hae,

ha morui eena a hlompshoa

ka baka la leruo la hae.

₃₁Ha motho a hlompshoa bofumeng,

o tla hlompshoa hakae

ho feta boruing,

'me ha motho a hlompholloa boruing,

o tla hlompholloa hakae

ho feta bofumeng?