1Mang kapa mang ea amang
mosili, o tla silafala;
'me mang le mang ea tloaelanang
le moikhohomosi
o tla tšoana le eena.
2U se ke ua kakasa boima
bo fetang matla a hao,
leha e le ho tloaelana
le motho ea matla
'me ea ruileng ho u feta.
Pitsa ea letsopa e ka kopana joang
le pitsana ea tšepe?
Pitsa ea letsopa e tla e thula
'me e tla pshatleha.
3Morui o etsa phoso,
ebile o eketsa ka likomang;
mofutsana oa fosetsoa,
'me ke eena ea tlamehileng ho inyatsa.
4Morui o tla u tlatlapa,
haeba u ka ba le thuso ho eena;
empa mohla u leng bohloking,
o tla u faralla.
5Haeba u e-na le letho,
o tla phela ho uena;
o tla u tlhotla maruo,
a se na letsoalo la letho.
6Mohla a u hlokang, o tla u qeka,
a u bososelle, 'me a u ruise tšepo;
o tla bua le uena ka mosa, a re:
“Ekaba u hloka'ng?”
7O tla u hlabisa lihlong
ka ho u memela lijong,
ho fihlela a u tlhotlile ka makhetlo
a mabeli kapa a mararo,
'me qetellong o tla u tlepa litšeho.
Ha a ka u bona kamor'a moo,
o tla u furalla,
'me a sisinye hlooho ha a u bona.
8Hlokomela hore u se khelosoe,
'me u se kokobetsoe,
ha u ntse u ithabisa.
9Ha motho oa boemo a u mema,
e-ba lesisitheho,
'me ke moo a tla u mema hangata.
10U se ke ua iketeletsa pele,
esere ua suthisoa;
le teng u se ke ua emella thoko,
esere ua lebaloa.
11U se ke ua mo buisa
joaloka hola e le molekane oa hao,
leha e le ho tšepa
bongata ba lipolelo tsa hae;
hobane ka puo e ngata o tla u nonya,
'me leha a ntse a u bososella,
o tla be a ntse a u hlahloba.
12Ho sehloho ea pepesang
lipolelo tsa hao,
o tla u bakela mathata
esita le hore u ee chankaneng.
13Hlokomela lipuo tsa hao,
'me u falimehe haholo,
hobane bomalimabe bo ntse bo u setse
morao hohle moo u eang.
15Sebopuoa ka seng se rata
se kang sona,
'me motho ka mong o rata mohahabo;
16tsohle tse phelang li ikopanya
ka mefuta,
motho o khomarela ea kang eena.
17Phiri e ka kopana joang le konyana,
'me le moetsalibe a ka kopana joang
le morapeli?
18Khotso e ka ba teng joang
pakeng tsa lekanyane le ntja,
'me khotso e ka ba teng joang
pakeng tsa morui le mofutsana?
19Litonki tse hlaha mahoatateng
ke lijo tsa litau,
ka mokhoa o tšoanang mafutsana
ke makhulo a barui.
20Moikhohomosi o nyonya
boikokobetso,
ka mokhoa o tšoanang morui o nyonya
mofutsana.
21Ha morui a thekesela,
o tšehetsoa ke metsoalle;
empa ha mofutsana a e-oa,
o lahloa esita le ke metsoalle.
22Ha morui a thella,
bathusi ba hae ba bangata;
ha a bua lipuo tse sa utloahaleng,
ba re o nepile.
Ha mofutsana a thella,
batho ba mo nyatsa;
ha a bua ntho e utloahalang,
ha ho ea mo sekehelang tsebe.
23Ha morui a bua, bohle ba khutsa;
'me seo a se bolelang, ba se phafa.
Ha mofutsana a bua, ba re:
“Ana ke mang eena eo?”
'me ha a ka khoptjoa,
ba bile ba mo sutumeletsa fatše.
24Maruo a lokile haeba a sa hokahana
le sebe,
'me bofuma bo bakiloeng
ke ho se tšabe Molimo bo bobe.
25Ke pelo ea motho e fetolang
sefahleho sa hae,
ho bontša molemo kapa bokhopo.
26Sefahleho se thabileng se bontša
pelo e ntle;
empa ho qapa maele ho qosa
boinahano le mokhathala.
