Thohako ea Molimo ho ba khopo
1U se ua itakaletsa
ho ba le letšoele la bana
ba se nang thuso,
leha e le ho thabela bara
ba sa tsebeng Molimo.
2Leha ba eketseha, u se ba thabele,
haeba ba se na tšabo ea Morena.
3U se ke ua tšepa hore bana ba hao
ba tla phela halelele,
kapa ua itšetleha ka bongata ba bona;
hobane a le mong ea lokileng
o molemo ho feta ba sekete,
'me ho molemo ho shoa u se na thari,
ho e-na le ho ba le bana ba khopo.
4Ka motho a le mong ea seli,
motse o tla tlala sechaba;
empa moloko oa sechaba se khopo
o tla ripitloa.
5Lintho tsa mofuta ona
ka li bona hangata,
'me ka utloa le tse otlang pelo
ho fetang tsena.
6Phuthehong ea baetsalibe
mollo o tla hotela,
'me sechabeng se se nang mamelo
khalefo e hotele.
7Molimo ha aa ka a tšoarela liqhobane
tsa boholo-holo,
tseo ka baka la likhoka tsa tsona
li neng li mo koenehela.
8Ha aa ka a qenehela baahisani le Lota,
bao a neng a ba nyonye
ka baka la boikakaso ba bona.
9Ha aa ka a hauhela sechaba
se ipilelitseng timelo,
se ileng sa ripitloa
ka baka la libe tsa sona;
10leha e le ho hauhela banna bale
ba litaaso ba makholo
a tšeletseng a likete,
ba ileng ba khobokana
ka manganga a bona.
11Esita leha ho ne ho le teng
a le mong feela ea manganga,
e ne e tla ba mohlolo ho eena
ho phonyoha kotlo;
hobane mohau le khalefo
li ho Morena,
'me o bontša matla a hae
ka ho tšoarela,
le ka ho otla khalefong ea hae.
12Joalokaha mohau oa hae o le moholo,
le eona khalemo ea hae e kholo joalo;
o ahlola motho ka mong
ho ea ka liketso tsa hae.
13Moetsalibe ha a ka ke a phonyoha
ka tseo a inketseng tsona,
'me boiphapanyo ba morapeli
ha bo ka ke ba fetoha lefeela.
14Morena o fa mohau oa hae sebaka
sa ho sebetsa;
empa motho ka mong o tla amohela
ho ea ka liketso tsa hae.
17U se ke ua re:
“Ke tla ipatela Morena
'me ke mang holimo mane
ea tla nkhopola?
Har'a batho ba bangata hakaalo-kaalo
ha nka ke ka tsejoa,
hobane 'na ke eng ka har'a libopuoa
tsena tse se nang palo?”
18Bonang, leholimo
le lona leholimo le holimo-limo,
le maliba le lefatše
li tla sisinngoa ke ho tla ha hae.
19Lithaba le tsona,
le metheo ea lefatše,
li tla tsukutloa ke ho thothomela,
ha a li talima.
20Empa ha ho motho ea lekang
ho inahana ka taba tsena:
ke mang ea lekang ho utloisisa
litsela tsa hae?
21Joaloka sefefo seo ho seng motho
ea ka se bonang,
bongata ba mesebetsi ea hae
bo re siretse.
22Ke mang ea tla phatlalatsa
liketso tsa hae tsa toka?
Kapa ke mang ea tlang ho li emela?
Se hole-hole selekane sa hae!
23Sena ke seo motho
ea hlokang kutloisiso a se nahanang:
motho oa setlaopa, ea khelohileng,
o hopola tsa booatla feela.
Bohlale ba Molimo popong
24Ntšekehele tsebe, ngoan'a ka,
'me u rue tsebo,
'me u ke u ele hloko mantsoe a ka.
25Ke tla neelana ka thuto e lekaneng,
'me ke phatlalatse tsebo ka nepo.
26Ka popo ea Morena mesebetsi ea hae
e bile teng ho tloha tšimolohong,
'me hoba a li etse,
a li bea ka mahlofo a tsona.
27A hlopha libopuoa tsa hae
hore li be joalo ka ho sa eeng kae,
ho tloha tšimolohong
ho isa melokong e tlang.
Ha li na ho lapa leha e le ho khathala,
kapa ho tlohela mesebetsi ea tsona.
28Ha ho se sitisang se seng,
'me le ka mohla ha li ka ke tsa hana
ho mamela lentsoe la hae.
29Joale Morena a talima lefatše
'me a le tlatsa ka tse molemo.
30A tlatsa lefatše ka bophara ba lona
ka mefuta eohle ea liphoofolo,
'me tsohle li tlamehile
ho khutlela ho lona.
