Batho ba lokelang thoriso
1Moea oa ka o thabela
ntho tse tharo,
tse thabisang Molimo le batho:
kutloano pakeng tsa bana ba motho,
setsoalle pakeng tsa baahisani,
mosali le monna ba phelang
ka kutloano e phethehileng.
2Moea oa ka o hloile
mefuta e meraro ea batho,
'me ke khopisoa hampe
ke bophelo ba bona:
mofutsana ea ikhohomosang,
morui ea leshano,
sehlola sa monna-moholo
ea se nang kelello.
3Ha ho letho leo u le bokeletseng
bocheng ba hao;
ha ho le joalo, u ka fumana eng
botsofaling ba hao?
4Ho ba seli ha batho ba hlooho
li putsoa ho hotle hakaakang,
'me boeletsi ba ba holileng
bo khahleha hakaakang!
5Bohlale ba maqheku
bo botle hakaakang,
'me keletso e imameletsoeng
ea bahlomphehi e khahleha hakaakang!
6Tsebo ea tsa bophelo
ke mofapahlooho oa maqheku,
'me boithoriso ba bona
ke tšabo ea Morena.
7Ke hopola batho ba robong
bao ke ba bonang e le ba lehlohonolo,
'me le oa leshome nka mo bolela:
Motho ea itumelang ka bana ba hae;
le motho ea phelang ho bona lira
tsa hae li oeloa ke bomalimabe.
8Hape, ho lehlohonolo ea phelang
le mosali ea nang le kelello;
le eena ea e-song ho fose
ka leleme la hae,
le eena ea e-song ho sebeletse
mohiri ea sa lokang.
9Hape-hape ho lehlohonolo
ea nang le kelello e seli;
le eo ea etsang puo ho bamameli
ba mo theelelitseng tsebe.
10O phahame hakaakang
ea fumaneng bohlale!
Empa ha ho ea phahameng
ho feta ea tšabang Morena.
11Tšabo ea Morena e feta tsohle:
a ka tšoantšoa le mang
ea e kakatletseng ka thata?
Basali
13Qeba lefe kapa lefe, empa e seng
qeba la pelo!
Bokhopo bofe kapa bofe, empa e seng
bokhopo ba mosali!
14Tlhaselo efe kapa efe, empa e seng
tlhaselo e bakoang ke lehloeo!
Phetetso efe kapa efe, empa e seng
phetetso ea lira!
15Ha ho bohloko bo bobe
ho feta bohloko ba linoha,
'me ha ho khalefo e tšabehang
ho feta khalefo ea mosali.
16Nka mpa ka lula le tau le khanyapa,
ho e-na le ho phela le mosali ea khopo.
17Bokhopo ba mosali bo fetola
tšobotsi ea hae,
'me bo ntšofatsa fahleho sa hae
se be tjee ka sa bere.
18Monna oa hae o ea kokela lijo
ha baahisani,
'me leha a sa rate
o sisa pelo habohloko.
19Bobe bofe kapa bofe hase letho
ha ho bapisoa le bobe ba mosali;
e ka bomalimabe ba moetsalibe
bo ka mo oela holimo!
20Moepa o lehlohlojane
bakeng sa maoto a motsofali,
mosali ea lehehle o joalo
ho lethola la monna.
21U se ke ua hoheloa ke botle
ba mosali,
'me u se haptjoe ke takatso ea mosali.
22Ho tla ba teng khalefo le boikakaso
le ho hlabisoa lihlong,
ha mosali e le eena ea phelisang
monna.
23Ho nyahama pelo, ho sulafalloa,
pelo e bohloko li bakoa
ke mosali ea khopo.
Matsoho a se nang matla
le mangole a tšeremang
li bakoa ke mosali ea sa thabiseng
monna oa hae.
24Ke ka mosali sebe se qalileng,
'me ka baka la hae bohle rea shoa.
25Se lumelle metsi ho lutla,
leha e le mosali ea khopo ho bua
kamoo a ratang kateng.
26Haeba a sa etse kamoo
u mo laelang kateng,
ikarohanye le eena.
