Toro ha e re letho
1Motho ea leoatla o tšepa lintho
tsa mafeela-feelane
'me tse fosahetseng,
'me litoro li nea litlaopa mapheo.
2Joaloka motho ea phothomang seriti,
'me a lelekisa moea,
o joalo ea elang litoro hloko.
3Pono ea toro e tšoana
le ntho e hlahang ka seiponeng;
malokana le sefahleho sa motho ke
setšoantšo sa sefahleho seo sa motho.
4Ntho e hloekileng e ke ke ea tsoaloa
ke e sa hloekang;
ntho ea 'nete e ke ke ea tsoaloa
ke eo e seng 'nete.
5Litaola, bolupe le litoro ke masaoana,
li ka khopolo-taba tsa mosali ea
mahlokong a pelehi.
6Haese ha u li romeletsoe
ka thato ea Ea holimo-limo,
se itšoenye ka litoro.
7Litoro li khelositse ba bangata,
'me ba beang tšepo ea bona ho tsona
ba hlolehile.
8Phetheho ea Molao ha e hloke
lithetso tse joalo;
'me bohlale bo qaqisitsoe
ka mokhoa o phethehileng
ke batho ba tšepahalang.
Ho tsamaea
9Motho ea tsamaileng haholo
o tseba ntho tse ngata,
'me eo e leng khale a li bona
o tla bua ka kutloisiso.
10Eo a e-song ho ka a li bona
o tseba li se kae,
empa ea tsamaileng haholo
o tlala bohlale bo bongata.
11Ka bona tse ngata maetong a ka,
'me ke li utloisisa ho feta
kamoo nka li hlalosang kateng.
12Ke hangata ke bileng kotsing ea lefu,
empa ka phonyoha kahobane khale
ke li bona.
Tšaba Morena
13Moea oa ba tšabang Morena
o tla phela,
hobane tšepo ea bona
e ho eena ea ba pholosang.
14Ea tšabang Morena
ha a ka ke a tšaba letho,
leha e le ho ba lekoala,
hobane eena ke tšepo ea hae.
15Ho lehlohonolo moea oa motho
ea tšabang Morena!
A ka itšetleha ka mang?
Ke mang setšehetso sa hae?
16Mahlo a Morena a talimile
ba mo ratang;
ke Eena tšireletso e matla
le setšehetso se shahlileng sa bona,
setšabelo moeeng o chesang
le moriti lebatameng la motšeare,
tšehetso ho khoptjoeng
le phemiso ea ho oa.
17O matlafatsa moea
'me o fa mahlo leseli;
o fana ka phekolo, bophelo le
lehlohonolo.
Mahlabelo
18Ho etsa sehlabelo
ka se ileng sa amoheloa
ka mokhoa o mobe,
ke nyehelo e nang le letheba;
limpho tsa ba robang molao
ha li amohelehe.
19Ea holimo-limo ha a khahloe
ke linyehelo tsa ba khopo,
'me ha a tšoarele libe
ka baka la bongata ba mahlabelo.
20Motho ea etsang sehlabelo
ka ling tsa mafutsana,
o tšoana le ea bolaeang mor'a motho
mahlong a ntat'ae.
21Sengoathoana sa bohobe
ke bophelo ba mafutsana,
ea a timang bona ke 'molai,
22Ho amoha moahisani
se mo phelisang, ke ho mo fenetha,
ho hana ka moputso oa mohiruoa
ke ho tšolla mali.
23Ha e mong a haha
'me e mong a heletsa,
ba amohela'ng haese ho sehla?
24Ha e mong a rapela
'me e mong a rohaka,
Morena o tla sekehela
lentsoe la mang tsebe?
25Haeba motho a hlapa
hoba a tšoare setopo,
'me ebe o se tšoara hape,
ho hlapa ho mo thusitse ka eng?
26Ka mokhoa o joalo,
haeba motho a itima
ka baka la libe tsa hae,
'me a boela a etsa ntho tse tšoanang,
ke mang ea tla mamela thapelo ea hae,
'me ho ikokobetsa ho mo thusitse
ka eng?
